2015年7月30日 星期四

加人工

等左咁耐,終於有人工加啦!今年加左差唔多千四蚊人工,大幾4點幾%,叫做幫補下咁啦!

岩岩加完人工,銀行又打黎撩借錢,話可以用返上次2.96年息借多五萬,分48期還,每個月只係一千蚊鬆d。加左千錢蚊,如果再借都重有少少剩,唔使額外節省已經夠供款,真係令人有d心動。

手頭上現金水平,曾經提高至43萬左右,不過之後用左13萬左右增持過股票,依家重有近30萬,現金都維持一定水平,所以無即時答覆,諗多個weekend先再作決定。

2015年7月26日 星期日

還原基本步

財務自由既重點,就係被動收入可以cover到日常支出,到時就算唔依賴工作收入都可以維持到現有既水平。

不過,最近睇返自己個戶口,個人既消費似乎隨住被動收入增加而越趨手鬆,如果真係養成一個壞習慣,將會拖慢財務進程。所以,最近決心做返樣最簡單既事,還原基本步,做返日常支出記賬,睇睇有咩無謂既消費。

之前去旅行用過個apps記賬,感覺都唔錯,於是上個禮拜用黎記低日常支出。一用呢個記賬apps,先發覺平時用八達通'do'一'do'既洗費都唔少,希望開始返記賬之後,可以減省到無謂
既支出,由於7月已近尾聲,等8月會更加清楚一個月既洗費大約要幾多。


2015年7月21日 星期二

壞習慣

o尋日得閒check下自己個account,發覺今個月都使左唔少錢,單係額外娛樂就已經洗多左3千幾4千蚊,另外因為公司黎緊會考牌,自己好耐無揸棍波車,又洗左成千銀去租車操返日,淨係咁都已經比平時用多左唔少,當然有d錢係應該洗既,例如操車既錢咁,但額外娛樂係因為之前派左股息錢多左先咁鬆手,當然我唔係過要做守財奴,投資有回報梗係要去享受下先有動力架ma,不過之前去過旅行,又買左部電話俾老婆同阿哥,再租車操,其實額外娛樂應該洗少d,不過人就係咁架啦,有錢就身痕,所以自己都要好好節制下,以免養成一個壞習慣,到時拖慢自己既財務進程就真係後悔都黎唔切。

2015年7月15日 星期三

追夢。。。加油吧!歐陽耀沖

歐冲追夢唔講金 月薪5千袋住先

http://hk.on.cc/hk/bkn/cnt/sport/20150702/bkn-20150702041158468-0702_00882_001.html

之前已經想打呢篇blog,不過咁岩撞著大跌市,太多野寫所以咁遲先打返。

我相信每個人都有佢既夢想,不過隨住人越大,接受社會既洗禮,大部份人都會向現實妥協,放棄自己既夢想。
有一部份部份會o係自己既comfort zone入面,改變自己原來既夢想,去追尋一個較實際既理想。
只有極少部份人,能夠跳出自己comfort zone呢個框架,去追逐自己既夢。

自己就係o固一部份留o係comfort zone入面既人,要放棄現有安穩既生活,去追尋自己既夢想,坦白講,我真係做唔到,我只係能夠做到o係comfort zone入面達至財務自由已經係我現今既理想,要跳出comfort zone,需要極大既勇氣,可惜我沒有。好佩服同羨慕能夠跳出comfort zone既人,能夠有咁既勇氣去挑戰未知既領域,成功與否,無人知,不過一旦成功,絕非我地呢d躲於comfort zone入面既人可以比擬。

如果有留意下本地足球,都應該知道歐陽耀沖算係本地年輕球員中較成功既一位,相信待遇薪酬都唔會太差,繼續留o係本地球壇應該都可以做到山寨王,不過佢竟然甘於放棄現有既成就,情願拎比依家差得多既待遇都要去葡萄牙發展,呢份勇氣真係相當令人佩服,要知道去到當地所有野都係由零開始,條路有幾難行諗到都辛苦。

雖然自己無勇氣咁做,但見到有年輕港人能夠有咁既勇氣亦都希望佢可以成功,能夠佢能夠成功係葡國發光發亮,再俾球探發掘更上一層樓。加油吧!歐陽耀沖

2015年7月11日 星期六

最近既反覆市對自己既得著

呢幾日咁反覆既股市,最大得著係令到我可以連續幾日出文呃瀏覽量,除此之外,亦令到我再一次感受到自己係大跌市所做既決定既不足,希望下次可以做好d。

經歷左今次既暴跌同之後既急速反彈,相信無長線投資概念既人更加唔會接受呢種思維。無呢種理念既人,佢地只會睇到長線投資既壞方面,同短炒既好處,佢地只會睇到股價可以短時間內大跌幾成,長揸到轉黎既回報咪又一野跌晒去或者要跌突,又只會睇到撈底一反彈所得既幾成回報,長揸唔知要幾耐先有咁和味既回報,當然佢地睇到既野係事實黎,我自己手持既股票,三隻入面有兩隻o係跌二千點o固日都跌到去比我既買入價重要低少少,另一隻重倉股仍有近10%升幅,整體賬面先叫重有微利。

不過咁,其實佢地忽略左某d野,就係低估左高賣低入既難度,同埋長線投資為心理上帶黎既安定性。 以自己為例,早幾日大跌,自己都有o係低位賣左少部份股票,諗住提升現金水平再跌之後入市提高長線回報,亦因為心態上係長線持有,大跌市當時,只係套現部份股票,之後亦有用部份套現既資金買返d心水股,而無心慌意亂賣走晒所有股票,所以仍有唔少股票受惠到呢兩日既反彈,依家睇返轉頭,全因長線投資既心態,就算之後大市飛升,我都只係少左d股票出個小錯,如再次大跌,手頭上亦有餘錢再買。而要做到高位賣低位買,事後睇當然容易,但做既時候係咪咁簡單? 試問6月既時候有幾多人重話恆指會去到兩萬八點? 而大跌當日夠膽入貨又有幾多人? 就算入又有買幾多資產落去?

能夠體驗到今次既跌市,真係一個相當唔錯既經歷,自問今次套現時機的確受大市氣氛影響而唔係咁好,但求經歷過今之之後,下次可以做得好d。

2015年7月9日 星期四

再套現少少

經過幾日既急跌,港股終於有個強力既反彈,恆指曾經升過千點,收市都有八百幾點,除左指數升,唔少呢幾日都兩三成咁跌既股票都兩三成咁升返,好彩既四五成或以上都有。相信唔少股民都開心返dd,而尋日低位撈到股票既更加興奮莫名。

對自己黎講,今日升唔升都無乜所謂,反正自己已經有計劃,就係套現部份龍翔,等機會再換跌得多既股票增加回報,所以尋日就幫我隻龍翔set左止蝕價,本來見今日個市咁好,都有諗過cancel個止蝕價唔賣住,不過今朝同事個群組入面,有個年輕同事post左張圖出黎,就更加令我按自己既計劃而行,無取消到個止蝕價。呢位同事以炒股為主,呢排都有即日炒賣,似乎都有d斬獲,而今日cap左張復星國際升左17%既圖上群組,似乎又有執。到底佢係咪咁堅成日有得執,還是報喜不報憂就真係無人知,但係同事一場我都望佢富費既。不過亦都因為見到呢張圖,令我覺得都重有唔少人會好似我呢位同事咁火中取栗,似乎普羅大眾仍未去到聞股色變既地步,更加加強我按計劃而行既信心,所以由個止蝕價keep住,有咩依郁都可以盡快套現,不過估唔到竟然係時日低位出貨,今日套現左大幾十五萬,現金水平升理約43萬,坐定定等未來發展,如果大跌就再入返d,就算係咁升都重有唔少貨o係手,唔會食唔到個升浪。


2015年7月8日 星期三

恐怖的一天

今日恆指既表現,可以用恐怖黎形容,一日入面竟然跌過二千點,收市都要跌千五點,都咪話唔得人驚。雖然7月只係過左幾日,不過唔少心水股都已經跌左起碼三成,有d其他bloggers推介過,而我亦覺得都唔錯既股票,直情唔見左一半添,或者唔少網友淨睇推介無任何分析就買入搏有得執,結果個市唔就,佢地一見跌就爭住沽,結果就跌得咁勵害。

經過呢幾日跌市,自己既帳面資產都縮水左唔少,不過總算重有微利,未駛倒蝕,不過遲下都好難講。早排六月尾同呢排都做左幾次買賣,首先係六月尾做左次換馬行動,當時梗係唔係咁叻睇到7月會大跌市啦,只係見其中既業績麻麻地,換入另一隻好似穩陣d既股票,結果到今日,新買既跌左兩成,而換走既就只係跌一成多d,換馬失敗。而尋日就套現左部份股票,今日終於忍唔住手,低位撈左隻blogger介紹過既股票,之後反彈一成多d,即時賣出再買返另一隻今日跌唔少既心水股,咁就使左8萬幾蚊,現金結餘得返28萬左右。

黎緊風高浪急,都係會透過賣股再買返其他,希望透過換馬去提升回報。

2015年7月7日 星期二

套現少少

今日恆指既表現,早段都升到咁上下,不過之後都頂唔住,收市跌兩舊幾。

o係今日開市之前,自己做左兩個部署,第一個係set左龍翔集團既止蝕貨價,觸發價1.01,結果1蚊賣出,套現返廿萬。另一個部署係set個低價睇下入唔入到心水股,結果係唔成功。

賣出左部份龍翔之後,現金水平提升至36萬幾,由於大環境實在唔樂觀,而且相對唔少股票,龍翔既跌幅已經唔算多,套現部份現金睇下有無機會換入跌幅較大既股票,從而提高回報。


2015年7月5日 星期日

又出招救市

大陸股市上星期跌極都有,中央出招都頂唔住。周末再有消息出招救市,到底下星期A股會唔會翻生,都係未知之數。

中央係咁出招救市,係咪真係一件好事,我自己就有所保留。面對跌市,出手穩定股市絕對無可口非,亦都有相當既需要,但個人覺得今次中央出招似乎過密及過勁,反而令我有d戒心。依家大陸既股市,就好似一個人唔舒服,醫生開特效藥,不過依家阿醫生開完一劑又一劑,到底係咪真係咁病,我地行外人邊到識。可能依家真係好嚴重,所以要連執幾劑,如果唔係可能會重傷或者就咁瓜柴,另一個情況就係依家已經病病地,開特效藥係為左等佢快d好,點知食完一劑無起色,即刻整多幾劑佢噗下。

第一個情況,已經唔係幾好,始終病人個情況都幾差下,底子唔好先要執咁多劑,有無效就要睇d藥夾唔夾,雖然情況不佳,但總算對正下藥,不過都唔可以因為有藥食而盲目樂觀。第二個情況睇落無咁嚴重,但我覺得比第一個情況更加差,短線睇起黎,第二個情況病人無咁病,又連執幾劑特效藥,一定好得快d。不過有睇過醫生既都知,特效藥唔係亂開,如果食得多,特效藥既效力會大打折扣,所以就算今次好得返,他朝真係再病既時候,要再好返既難度就高好多,到時既情況可能更加難扭轉。

如果有得揀,我希望依家係第一個情況,而唔係第二個,不過事實可能係第三或者第N個情況,世事又豈是我呢d嘍囉咁易看得清,還是按自己步伐而行。

2015年7月3日 星期五

跌勢未止

呢幾日大陸個市都唔多精神,上證指數同滬深指數今日又跌超過5%,恆指表面跌200點多d,不過好多股其實都跌唔少,我手頭上既最重倉隻龍翔,早幾日都重頂得住,今日終於頂唔住啦!今日跑贏大市,恆指跌1%,佢就跌成10%,加埋另外兩隻既跌幅,一日入面唔見左廿個,都咪話唔傷。

今日跌咁多,都有悔懊早兩日無賣左佢d股票佢,不過又有誰知道聽日個市係點,知既已經發左達啦!所以悔懊左一陣就算lu。大市氣氛的確唔多好,不過自己就未到恐慌既地步,始終手頭上既股票都重有升幅,重要收左一次息,而且有一定既息率,既然帶黎一定既現金流,唔跌太多其實都ok,不過如果股價真係大跌既話,心理上都會有d難受,始終無論短炒定長線投資都好,係人都想可以以更低既價錢買入心水既股票。由於閒錢有限,自己雖然心郁郁,都係俾多d耐性等更佳既機會先入市。

2015年7月1日 星期三

一片紅色

今個星期一股市既表現,應該嚇親唔少人,上網望一望個版面,差唔多全部紅色咁濟。曾經跌過千點,最尾跌六百幾。之後o固日早段都麻麻地,點知中午就倒升返上黎。

總結呢兩日,第一日持股都跟大市跌,不過跌最多o固隻都係3%多d,好過唔少股。第二日最重倉既龍翔發力,令到o係咁既跌市入面,資產反而無少到。呢兩日好多股票都跌唔少,不過咁岩好鬼多野做,都無咩時間睇個市,手頭上又得返十幾萬,到得閒睇既時候,猶豫下又升返唔少,都無入到貨。咁到底入唔到市是福是禍都無人知,唯有再睇下會唔會再有機會啦!