轉新blog

呢個blog之前都有登開廣告，不過老實講，收益得雞碎咁多，叫一年食到一餐咁啦！之但係早排無啦啦俾Google封鎖左唔俾登廣告，無廣告收益對被動收入完全無影響，因為實在太少，不過心裏不爽。本來都唔理架啦，不過早排老婆部電話壞左，送左部新電話俾佢，舊電話整完返黎就過左俾我用，橫掂要重新整理下d資料，忽發奇想不如開過新account，開返個新blog，橫掂blog會繼續打，無理由無啦啦俾人blog左蝕左個茶錢俾佢，於是襯換電話再開新account，個理由係無聊d，不過不爽就係不爽，想做就去做，黎緊大家如果重有興趣，不妨click入去我個新blog支持一下。

http://chungyin2717.blogspot.hk/2016/07/blog-post.html?m=1

股票對沖日常開支

有唔少投資者，鍾意買入某d同生活相關既股票，以對沖日常開支，例如買入中電對沖電費，買入煤氣對沖煤氣費，買入領展對沖日常洗費，對於呢重想法，當然無問題，但我認為無必要。

其實投資既目的係為左回報，只要投資有一定既回報，自然可以補貼日常既開支，根本無需要特登搵返相關既股票去對沖日常既開支，當然，如果呢d相關既股票可以帶黎一定既回報，有持有既價值就唔同講法。千祈唔好攪錯，我地係為左回報既揀選股票，而唔係為左對沖日常開支而揀特定既股票。

金融核爆!?

重記得脫歐公投結果一出，環球股市當日即刻大瀉，報章重用金融核爆黎形容。點知係頭一日跌多d之外，跟住都無咩料到，最近已經好似無左回事咁，環球股市升左唔少，美股升下升下重升穿一萬八千一百點。明明話係核爆，點解咁快就無晒事既? 其實個人認為，金融核爆係遲早會發生，其實自次按危機，到之後所引發既金融海嘯，當時歐美國家早應要找數，只不過美國率先放水，透過財技拖延問題同轉嫁俾其他國家，其他國家都唔係傻，無理由無啦啦幫你埋單，你放水我又放，大家衰埋一堆，總之將問題拖得就拖，結果問題好似無爆煲，但實際只會越黎越大煲，放極水經濟都無咩起色，到再有問題出現既時候，跟本已經再無手段可以去應對，而今次英國脫歐，或者只係引爆既一個引子之一，可能係等於發射核彈前輸入左其中一個密碼，再等其他金融危機出現，輸入埋另外幾個密碼，到真係爆發既時候，除左屍橫遍野之外，重會有段時間寸草不生。呢個世界，出得黎行，預左要還，風流過後都要找數既。

6月支出

六月份收入:148006
收入比平常多唔少，主要係因為套現股票賺左7萬9蚊左右，收息收左3萬8蚊多d，加埋3萬蚊人工，偶爾先有咁多。

六月份支出: 45276
支出比平常多，但其實日常開支維持正常水平，主要係買入認沽期權付出左近萬蚊權金，由於未平倉而錢已付出，所以計入支出一欄。

自6月開始，有筆每月近1300蚊既貸款供完，7月開始加人工，8月新貸款又開始供，如無意外，單靠人工係繼續負現金流，不過計埋投資回報都ok既。

P.S. 唔少留言都問到股票套現出黎既資金已扣成本未，其實依家持有既股票都揸左一段
時間，而今年先開始用呢個apps記賬，之前買入股票既支出未有記錄，所以依家沽出股票既資金，扣除成本有盈餘先計入收入，虧損既話會計返入支出，而黎緊就會每次買入賣出都會即時記錄，咁樣睇落會好似清晰d。

脫歐閙劇

星期五脫歐公投先至出結果，祟英才子先力讚英國脫歐將會如何如何，值得慶賀，點知佢平時讚到又有文化修養，又尊重民主自由既英國紳士，就即刻聯署上書，要求再次公投，理據係投票率唔夠七成半，同埋脫歐派只係贏少少，而現實投票率已經有百分之七十二點二，而唔係得三四成投票率，脫歐派得票亦超過百分之五十，到底點解投票率要超過七成半同勝出一方要超過六成，如果調返轉今次贏既係留歐派，脫歐派係咪可以用同樣理據去要求重新公投? 口就講民主，但點睇呢班人都係想輸打贏要，如果英國短期內真係重新公投，自己親手打破民主制度之餘，亦唔尊重投脫歐派既民眾，真係可笑之極，閙劇一場。

俾著我係歐盟大國既話，既然英國已經公投脫歐，我一定盡能力踢無走，之後就盡力去抵制你，等你痛不欲生，雖然咁做自己都有損傷，但起碼殺一警百，等其他小國唔好亂黎。就算最終你想繼續留低唔話要走，以後簽訂既條款一定嚴苛得多，以警效尤。

到底呢場閙劇會發展成點，我都好有興趣睇落去。

英國脫歐

英國脫歐公投o係o尋日公佈左結果，脫歐派以三個百份點左右贏出，之前唔少人都押注脫歐不成，結果市場大為震驚，環球股市即刻大瀉。但對我黎講，呢個結果係有d意外，但亦非無諗過，因為歐盟國家脫離歐盟係必定會出現既事，只係在於遲定早同埋邊個國家而已，而我一直預期係d風光不出，國力大不如前既國家，英國係其中之一，但我預期係遲d先出現脫歐既情況。

脫歐公投俾我既感覺係高級版港獨公投，曾幾何時，香港因祖國既支援，經濟先重拾起息，就好似英國加入歐盟之後，從中亦獲得唔少好處。但隨住時間流逝，伴隨而黎既負面影響亦逐漸浮現，香港既就中港矛盾自由行過多等等問題，而人本來就係自私同貪婪既動物，有好處時只會貪婪更多，起初好處比壞處黎得大得多，梗係無任歡迎，但當負面情況漸現，一向享受開好處既人更會感到不滿，而且，現實上既大部份好處都落入既得利益者同大財團手中，普羅大眾更感到壞處帶黎既影響比好處多，社會不滿情緒越加激烈。亦因為曾經風光過，唔少人開始質疑現狀，懷緬過去，縕養推翻現狀既情況，從而有港獨同脫歐既思維。

不過好老實講，對於英國既情況，我係完全唔了解，所寫既都係自己諗到就打出黎，到底距離事實有幾遠，我自己都唔知。

原來第一筆股息唔係第一筆

早幾日收到龍翔既股息，重以為係今年第一次收息，點知o尋日得閒既時候，check返一通之前既e-statement，見到6月3號惠記筆股息已經存入左，扣埋雜費共收21250。明明記得之前o係aastock睇過24號先派息，到底係咪aastock唔岩? 不過唔緊要啦，重點係有息收，而龍翔既股息就變成今年第二次收息啦！

16年第一筆股息

早幾日收到今年第一筆股息，係黎自龍翔既，扣埋所有支出，共收17117。不過黎緊收唔到咁多，因為除淨之後套現左部份龍翔，希望遲下有機會換入返合適既股票。

又借5萬

上年同銀行用信用卡借左五萬，有百五蚊coupons送，講左年尾會寄信黎可以去拎，點知無左下文。到早排醒起，打電話去問，佢話一早已經發左信，於是再補發。早個幾月終於收到封換領信，不過自己早排大意跌左銀包，結果cut晒d信用卡，結果寄黎封信上面既信用卡號碼同依家持有既唔同，於是再打去，佢話會同換領部溝通下，通知佢地我轉左卡，之後會覆返我電話。過兩日銀行打黎，話已經ok，隨時可以去拎，跟手就同我講個額重有五萬蚊，可以用返2.96%年利率，分48期，每期1102，總支出52896。其實之前一直都有其他銀行撩我借，不過都做唔到咁平，我見有blog友重平d添，可惜無我份，不過三厘樓下都ok，結果又再借五萬蚊。本來想R返d coupons，可惜位姐姐話上次先有，今次無啦！而佢幫我於截數日後先入數，錢就20號到手，但第一期還款就8月中先還，叫多大半個月可以用啦！

又賣咁d龍翔

上年回報能夠跑贏大市唔少，主要都係靠隻龍翔撐住。今年已經過左一半，算獲利唔少，如果到年尾都大幅跑贏大市，都係龍翔幫到手。

一月既時候已經賣咁部份龍翔割禾青，之後股價都算係平平穩穩咁，見早兩日又升左少少，o尋日又賣咁d鎖定利潤。買入價0.88，賣出1.42，持有年半左右，扣除成本賺7萬9蚊左右，單計股價變動既收益，回報6成多dd。另因已除淨，過幾日將會有3千幾蚊落袋。而已收股息近8千5蚊，不過已經入賬，無計入今次所賺入面。

如果計埋股息收益，今次總回報近7成，以持有不足兩年黎講話，算係唔錯既投資。

買入騰訊7月認沽期權

上個星期尾，以4.935買入數量20既7月騰訊認沽期權，當時騰訊大幾168/169蚊左右，之後慢慢升到依家成172蚊，賬面蝕緊近2千蚊，希望最尾埋單既時候係正數就好啦！                          

5月支出

5月依舊倒水咁倒。
收入有近四萬二蚊，當中三萬蚊多d係人工，已經扣減強迫金，另萬一蚊多少少係之前買入認沽期權既收益，雖然睇落有萬一蚊鬆d，實際賺既其實只係六千幾蚊，只不過4月買入既時候已經將付出既權金入左支出條數，所以今次可以入晒成萬蚊落收入度。

雖然多左收入，不過成個月都要見紅，洗左近五萬蚊。其實今個月既日常洗費keep得幾好，只不過因為老婆轉工前有空閒同佢去左轉泰國，用左萬一蚊左右，再加上佢部電話無啦啦打柴，送左部華為P9+俾佢當提早送生日禮物俾佢，成為4880大元。如果扣除呢d額外支出，今個月係有現金流入既。下個月老婆生日，不過已經送左禮物，最多都係食生日飯既支出，相信開支方面可以控制得好少少既。

又出唔到廣告啦！

早排同老婆去完泰國返黎，收到Google寄黎既email，話我既Adsense已被停用。今次係第二次停止我個Adsense，到底係咩原因，我都唔知道，上一次因為我間中有click下自己既廣告，當呢個係原因，但之後我都什少咁做，除非個廣告我想睇先click入去。想知咩原因，又話要保護獨家偵測系統，無法提供更詳細資訊，想上訴，又話d專家已決定不將我既Adsense復權，真係無晒符。要申請過，或者要用個新既Google account，不過又好似好麻煩咁，好多想都link晒落呢個account入面，睇黎我都係又佢就算啦！

3/4月既支出

呢兩個月依舊入不敷支，3月就負14410蚊，而4月就負11240。其實負數係好正常，因為依家每月還款成16000蚊，佔人工既一半，所以見紅就梗架啦，不過唔好負太多囉！

好可惜既係呢兩個月都負唔少。之前提過買入認沽期權受到重創，蝕左萬幾銀，由於買入時間唔同，所以分返開二至四月都有虧損，三四月都各蝕四千幾銀。三月負得多d，除左期權蝕錢之外，因為結婚紀念日，買禮物加埋同老婆返大陸浸溫泉，而自己大意導致要申請一次性証件既費用，所以洗多左唔少。而4月其實主要因期權虧損，洗費開支其實都正常。

黎緊5月都唔樂觀，因為老婆轉工，返新工前有空檔同佢去幾日泰國玩下，雖然期權方面賺返d，不過都未夠旅行洗費，唯有安慰下自己，既然開心就唔好計較咁多，之後先再慳返d啦！

沽埋剩返既2828認沽期權

前日以5.03沽左一半2828五月既認沽期權，執左二千七蚊左右，o尋日個市繼續跌，我隻認沽期權個價就繼續升，結果就以6.3沽埋剩返o固一半佢，賺四千蚊左右，總共賺左六千幾蚊，雖然補唔返晒，但都叫幫補下上個月蝕左o固d。

不過夜晚道指又跌成百幾點，咁早沽晒可能唔係一個好既決定，到底何時先係比較好既時機，自己都未拿捏得好，可能要再透過經驗既累積先可以做得好d，不過今次埋單有賺已經算唔錯啦！

沽出一半5月2828認沽期權

之前買入認沽期權蝕左成皮野都唔知死，上個月再試下買入2828五月既認沽期權，不過今次就買細左。

呢排恆指都唔多精神，我既認沽期權賬面都有少少賺，由於之前試過賬面賺過成皮，最終只會賺兩舊既經歷，今次決定試下止賺，今日以5.05先沽出一半，賺二千七蚊，剩返一半就有佢先，睇下之後沽埋佢定行駛左佢。

看矛盾後有感

傲慢與偏見係一本好出名既著作，不過好老實講，小弟文化水平低下，睇得最多係漫畫，又有咩資格講呢本巨著，提到呢本書既名，純粹係因為睇左新電視台既節目而對當今社會既感覺黎。

新電視台開左無耐，係威係勢咁，最受港女歡迎既梗係太陽的後裔啦！我都有睇，不過我係睇女神宋慧喬，但係睇左幾集，都係覺得星星的你好睇d。除左呢套劇，開台之前最期待既係另一個節目，就係跟住矛盾去旅行，原本最想睇係曾鈺成同長毛，不過睇完就有d失望，或者兩者都已經有咁上下歷練，知道人生只不過係場戲，會議上總係針鋒相對，但落場之下其實矛盾未必咁深，節目中擦唔出火花。

另外幾對都無咩特別興趣相睇，不過早兩日襟過去，睇到對組合係林日A同元秋，又坐低睇左陣。節目入面，林日A稱要做社會實驗，全程透過一位職員做傳聲筒與元秋對話，雙方無直接講過野。老實講，真係覺得咁做係幾on9，不過又幾有娛樂性既。呢兩個人節目中既相處，某程度亦反映到新一代人與舊一輩既矛盾。對於呢兩個人，本人無特別偏好，叫唔厭惡咁啦！林日A算係年輕一代既代表，佢攪既毛記吸引到唔少黃絲朋友，以及唔少對現狀不滿既年青一代，事實上亦攪得相當成功，有聲有色。節目入面佢唔同元秋直接對話，真正原因係咩？係因為認為元秋唔值得佢尊重，不屑同佢講野? 或是覺得同元秋講都無用，因為佢都唔會聽得入耳或者會去改變? 最終都係林日A自己至知。但唔少年輕人，都不屑與上一輩溝通，有o的覺得上一輩既成功只係因為佢地生於黃金年代，有o的認為上一輩既人掠奪晒d資源，理由林林總總，總之就拒絕溝通。而元秋既係議員，亦係工業家蔣震之女，於社會上應該有d地位，可算上一代既成功人士，節目中雖然笑笑口，但最終都忍唔住要爆，重要好小家咁話睇下林日A本雜誌幾時執。對於蔣麗芸黎講，佢肯參與呢個節目，一開始亦肯主動示好，可能已覺得紆尊降貴，重要俾人羞辱，梗係發火。但同樣地，唔少上一輩人，的確有所成就，但就往往有種睇唔起新一輩人既感覺，又或者有佢講無人講，令年輕一代不願與佢地溝通。

節目入面有一節係林日A同元秋向幾個韓國人進行面試，元秋俾我既印象係好standard既做法，但林日A所問既比較有心思。有時上位者不妨再放但低多少少身段，嘗試聆聽多d後生既想法，其思維來為舊一輩人帶黎新意。而新一輩人亦應多尊重前輩，多吸收人地成功既地方，多溝通交流先有進步，但好可惜，香港就係無呢樣野。

貪下小便宜

唔經唔覺，個市都升返唔少，升到成二萬一點樓上，之前套左出黎既資金都無機會用到。由於d資金都閒置左一排，之前更低既位置都無用到，依家更加唔會用，咁岩上網睇到d儲里數達人既blog，講開最近賣到好行下廣告間銀行開新出糧戶口再加新資金增長，有里數獎賞，一百萬做四個月既定期，全新客戶有六萬里數獎賞，都幾吸引下。反正見d資金閒置左咁耐，不如賺少少里數，呢個計劃，最大既風險係呢幾個月入面個市跌到谷底但資金鎖死無得入市，不過手頭上重有十萬左右既資金，黎緊六月亦有幾萬蚊股息，真係跌市都唔會完全無資金入市，衡量過風險，都覺得做得過，於是上星期五就做左呢個定期計劃，希望呢幾個月唔好跌得咁甘，等呢筆錢回籠之後先跌鑊金啦！

買入銀生H股5月認沽期權

期權代號 HCF90.00Q6 合約名稱 認沽期權 持倉數量 2 現價 1.890 按金 0.00 平均價 2.290 賬面利潤 -800.00 買入數量 0 沽出數量 0

三月既時候，曾經買入建行既認沽期權，結果導致成萬蚊多o的既虧損。不過都未知死，o尋日決定買入2828五月認沽期權，付出近四千六蚊權金，行駛價90。不過買入之後，恆指繼續升，今日暫時輸緊八舊水。今次買入，是吉是兇都唔知，不過個人認為經驗係要透過實戰先可以累積到，適當既學費都無得避，唯一要留意唔好交太多既學費。

開始轉運!?

自從生日之後，d衰運好似開始慢慢遠離我。首先就係攞返之前襟機唔記得拎o固千八蚊。之後就係收到消息，黎緊四月中將會調去之前申請既部門，對於工作，自己無欲無求，新位置將會減少接觸o的自以為高尚貴賓既機會，減少用腦力同佢地鬥智鬥力，相對地應該比較輕鬆，不過就唔會有升職既機會，但自己無所求倒也無所謂，最緊要做得自在。而投資方面，三月經歷左一次慘痛既期權教訓，當然係自己衰，不過都賴落運氣度，經一事長一智，黎緊唔會再咁惱妄，應該無咁易行返衰運啦！

已過的三十四歲生日

話咁快又大一歲，呢個三月生日之前都唔係咁老黎，不過一踏入生日o固日，就似乎開始轉運，o固日零晨心月來潮開個account睇睇，就見戶口多左錢，睇睇原來早兩日之前o係櫃員機無拎既錢已經入返落戶口，一生日就收到呢個好消息，d黑氣應該過啦！

講返生日o固日，由於阿媽好耐之前已經想一齊去海洋公園，今年生日係復活節假期，就岩屋企人都放假，趁正日一齊去，美其名慶祝生日，實際係阿媽去行下。我地一家四口，三個唔洗錢，我同阿哥都生日免費，老豆夠六十五歲又唔洗錢，係我阿媽要俾錢，不過都有八五折coupon，三百三蚊四個人去。不過是日為復活節假，鬼死咁多人，單係買飛入場都排左成個鐘。入到去，兩老唔玩機動遊戲，淨係去睇乜館物館周圍行下，總算唔洗排好耐隊，不過由於佢地唔玩，自己都費事排隊要佢地等，所以我先話係佢地黎。

夜晚老婆就join埋一齊去九龍城食泰國野，由阿媽請客，簡簡單單又過一日。

諸事不順的三月

呢個三月，明明係生日月，但就諸事不順。之前經歷過倒楣日，諗住否極泰來，但之後d黑氣都好似未走咁。

話說上次溫泉之旅，玩完都ok，不過到走既時候，去到九州港碼頭，一落shuttle bus，就有大班白牌司機圍埋黎，話大霧無船搭，我諗住佢地搵生意梗係唔信啦！入到去櫃頭，原來真係大霧取消晒d船，無船返香港。咁問d職員有無車去關口，佢話淨係有車去蛇口，過兩三個字就開車。由於諗住去兩日咁大把，都無買到上網卡，平時都有聽過蛇口呢個地方，實際o係邊真係唔知，不過諗住都係o係深圳，去到點都搵到方法返香港，於是就一野跳左上車。點知一搭就搭左成三個鐘，蛇口落左車，o固度本來有船返香港，不過已經過左時，又無船搭，好在有地鐵可以返羅湖，不過原來蛇口離羅湖好鬼遠，一搭又搭左成個鐘，之後唯有o係深圳行陣街食埋飯先返香港。

除左經歷無船搭，今個月既投資表現真係未如理想。三月係業績月，持有兩隻股票都公佈左全年業績，兩隻末期息都少左，一隻派少左四成，一隻少三成。而之前買既建行認沽期權，呢個月股市升返唔少，所以都係凍過水，應該要蝕成皮野，今次買入認沽期權蝕唔少都算係一個好經驗，提升我對買入認沽期權既經驗值。

希望生日之後黑氣可以遠離我，唔好再出呢d倒楣既文章。

倒楣日

聽日(17號)又到結婚週年，由於一月去左成十二日東京，費事又攞咁多日大假，留返俾其他同事放下，結果淨係拎左三日，買左個兩日一夜既大陸溫泉套票，離港玩兩日就當慶祝。

點知今日一瞓醒，神推鬼拥下check下張回鄉卡，先發現過左期，方寸大亂之下，即刻打去中旅社問下有無辦法攪返張快証，答案係最快第二日既晏晝先有得拎，唯一辦法就係去陸路過關既口岸攪張一次既臨時通行証，不過見電話入面個阿姐答到負負氣氣，都係信唔過，諗起屋企附近有間中旅社，近近地搭車落去親身問下，睇下用死螺哀求既方法，可唔可以即日攪到。點知落到觀塘，先見間中旅社俾人cut左一半，得返攪旅行，無得辦証，唯有死死地搭車去皇崗。

去到車站上車o固陣，突然醒起銀包無錢，即刻落車去襟錢。之後就山長水遠搭車去黃崗，去到黃崗，填晒form，盛為五百七十大洋，俾錢之際發現銀包得o固廿蚊，明明之前先襟左錢，思前想後應該當時太匆忙，唔記得攞錢。當時我真係灰到極點，錢銀固然係其中一個原故，大拿拿成千八蚊無攞到，梗係肉赤啦，不過都重叫有機會無俾人拎到食返落部櫃員機度，最閉係我山長水遠去到但無得攪。就o係我灰爆既時候，同我一齊既重有另一位女士辦緊呢張一臨時通行証，我於是膽粗粗咁用我最大既誠意問佢，可能佢俾我既誠懇樣打動，又或者見我靚仔，竟然肯借錢俾我辦証，呢樣就講笑姐。老實講，能夠無啦啦借幾舊俾個陌生人，香港地真係唔多人做到，之後我地交換左聯絡方法，我再whatsapp感謝佢，女士都覆我江湖救急，唔洗客氣，重叫我玩完返黎先處理，呢次雪中送炭既經歷真係令我好感動，永世難忘。上一輩人都有呢份人情味，但自問我呢一輩，以至再後一輩都未必會有。

辦完証去返銀行，填form等遲下埋完數，就知我o固千八蚊有無俾人攞左。如果最終俾人拎左，今次個旅程就貴啦，本身個套票因為有私人溫泉既關係已經唔平，要成二千六百八十蚊，再加埋辦証五百七，再唔見千八蚊，夠去轉台灣啦！

今次因為自己大意，換黎一個咁貴既教訓，真係自己攞黎。唯一可以安慰下自己既，就係及早發現，總好過聽日去到先發現去唔成，而且能夠感受到人間有情，總算不幸中之大幸。

好似雨過天晴

最近環球股市都升返唔少，港股上返兩萬點，德國指數就升返近一萬點，美股就最堅，唔經唔覺又上返萬七點。

港股升唔少，之前買既建行認沽期權賬面輸唔少。環球股市睇落雨過天晴，之前重一片愁雲慘霧，依家又好似無左回事。雖然股市升返唔少，自己好似miss左低價入貨既機會，買既認沽期權又蝕錢，不過自己都係唔睇好環球經濟，就算點印銀錢點減息，都只係將問題拖延，最終都會爆發出黎，繼而會o係股市反映出黎。所以依家繼續手持現金，等最壞既時刻到來，不過老實講，等候既時間的確好難過，因為唔知自己既決定係咪錯。

血流不止一/二月

由12月開始轉用左呢個叫3Q記賬本既apps，用左一段日子之後，發覺比舊有既好用唔知幾多，大家想記賬既不妨用呢個免費apps。

講返踏入2016後呢兩個月洗費，真係血流不止，人工加投資回報減返開支及供款支出，一月就負三萬九蚊左右，二月就負萬八蚊多o的。其實負咁多既主因係一月去左十二日既日本旅行，總共洗左四期六蚊，而二月就因為過年派利是同買賀禮，更衰既係自己一時控制唔到賭性，輸左七千銀，結果就攪到依家咁。

其實旅費方面，本身都想去轉耐d既旅程，所以雖然洗左唔少，但仍覺得值得。最大問題係無啦啦輸左幾千銀，同投資輸錢唔同 ，今次純粹賭博，小賭可以，但輸成幾千銀理應避免，經歷今次，相信叫買左個教訓，唔會再重蹈覆轍。

黎緊三月係結婚紀念日，應該都要洗錢，不過自己已經由個人洗費著手，盡量慳少少，始終慳自己都唔想伴侶過得太寒暄。

一錯手成一千銀

之前初嘗買入認沽期權少少甜頭，尋日諗住再下一成，買入三月既認沽期權，行駛價比市價低唔太多，當時開市股價升左d，之後慢慢回返少少，由於近行駛價，理應要俾多少少權金先成交到，不過自己係孤寒精，權金都係set低少少，諗住唔成交就算數，無咩所謂，點知轉個頭就成交左，咁就無理佢。隔左陣心月來潮望望個成交紀律，先察覺自己襟錯制，明明想買變左沽，貼價之餘自己on居居收少權金，之後個價又再回多d，結果我唯有俾返多d出黎平倉，咁樣無啦啦就跌左九舊幾，真係肉都赤埋。點解要咁快平倉? 依家道指升緊唔少，如果聽日先平倉可能唔洗蝕咁多，不過以一個咁貼價沽認沽期權非計劃之內，就算錯有錯著有錢賺亦未必係好事，倒不如忍痛認錯就算。今次一時錯手就少左成千銀，呢個教訓都算大，之後每次襟制都要小心d先得。

初嘗買入認沽期權賺兩舊

早排初上買入中銀二月認沽期權，上星期四見得返幾日就月尾，睇黎就算再跌都唔會超過行駛價太多，見有兩舊水左右執，都係平倉算啦！其實其間有過賺近萬既機會，但自己唔識把握，不過初嘗買入認沽期權，能夠以賺錢結終，都算係一個好結果。未來會再嘗試買入認沽期權，希望於跌市期間仍能搵到資產增值既機會。不過話口未完，今日想再買入認沽期權既時候就即立賴野，呢part就留待下回分解。

加息之金翅PK鳥

間中會去書局打下書釘，吸收一下文藝氣息，培養下書卷味，多數齋睇唔買，不過偶爾都會幫襯下，如終有時睇岩本書，都想舒舒服服咁慢慢細味下。

最近行開書局，又入去睇左陣書，睇到本叫 "加息之金翅PK鳥"，揭左幾頁，覺得又OK喎，再睇睇個作者既其他作品，原來以前睇過佢既作品叫做 "次按高清真面目"，o固時覺得都唔錯，分好多次打書釘睇晒全本咁濟，今次唔想咁辛苦，買返屋企慢慢睇。

今日終於睇完，感覺都唔錯，當中講左唔少關於日本經濟神話爆破之後既情況，從而講到香港未來可能出現既情形。有興趣既行開書局可以望下。

以下係網上既本書既簡介:
 通縮是樓災後遺症，比樓災更加可怕。

日本經濟陷於困境，不是因為1990年代樓災爆破，而是因為通縮25年。香港的樓災爆破之後，也會走上日本通縮死路。

不少經濟學者對通縮漠不關心，以為赤字預算和量化寬鬆就可以解決通縮。日本試過，行不通。香港連嘗試的機會也沒有，因為港元匯價與美元單一掛勾。要量化寬鬆就先要脫匯，讓港元匯價自由浮動，否則發鈔太多，赤字太多，大鱷很容易衝破聯匯，打殘香港經濟。

香港已經錯過了2012 年樓市軟著陸機會，2015 年的樓泡太大，爆破之後會引發日本式通縮。當香港出現通縮又無法解決，庸官一定會將香港的儲備用在無用基建，使香港百年基業毀於一旦。更加悲慘的情況是加息加稅，讓小市民的生活更加困苦。

通縮是很少人研究的經濟問題，市面上很少書討論通縮。通縮是甚麼？發展過程是怎樣？有甚麼解救良方？日本的通縮是怎樣發生？ 這本書有齊以上問題的答案。

再沽中銀2月認沽期權

期權代號	XBC2.60N6
	合約名稱	認沽期權
	持倉數量	-100
	現價	0.020
	按金	13,532.00
	平均價	0.022

最近既跌市，自己並無入貨，不過唔係咩都無做，就係試下期權。繼之前買入中銀既認沽期權，星期五再沽返中銀認沽期權，數量同上次一樣，不過行駛價唔同，今次既行駛價係2.6，收2千2蚊權金。

對於期權，自己知既只係好皮毛，只係透港港交所個網入面既期權abc先知最基本既野，不過認為透過實戰，先可以提升到經驗值，趁市差暫時未入市住，手頭上有閒錢有機會就練習，希望跌市既時候都有更多投資既機會。

又鬆動d

黎緊下個月開始，手頭上都會鬆動少少，原因係有一筆借貸終於還晒，每個月release到四千三蚊左右。話就話鬆動d，其實唔計投資回報，都重係負現金流。依家人工扣左強迫金大幾有三萬蚊，租+家用一萬，呢幾個月計過日常開支約一萬左右，所以應該有剩九千至一萬一個月。之前供緊近兩萬一個月，黎緊只係供一萬五千四左右，負現金流約六千。到年中應該會再供完另一筆貸款，每個月會多千二蚊左右，之後就要有排等先會再供完。雖然仍然負現金流，不過有信心投資回報最終會變成正現金流既。

忍耐

自從經歷一月大跌市，不知不覺已經套現左唔少現金，依家手持百二萬多dd。好坦白講，個人對香港以至全球既前景都相當唔睇好，股樓都應該無運行。但當自己手持相當現金，又睇到唔少股票比之前平左唔好，好似幾抵買咁，就蠢蠢欲動想入市。而忍耐唔入市，的確係唔容易，成日都心思思想買貨，到底會幾時按耐唔住，自己都唔知，希望自己繼續忍耐住，等到千載難逢既機會就好啦！

初試買入認沽期權

期權呢家野，自己係完全唔熟悉，之前淨係試過沽認沽期權，收下權金咁，到價就接貨。

今次就試下新野，買入中銀2月既認沽期權，數量100，行使價2.9，付出權金約3550蚊，總支出3656蚊。今次嘗試，已經有左最壞情況既心理準備，就係平倉不成淨付權金，咁都只係將上個月收既權金再貼少少出黎。

今次咁做，都係認為個市唔精神，重有下跌空間，而且自己一直都想試下買入期權，趁呢個機會 以有限資金嘗試一下，等跌市既時候都可以有多d投資既選擇。

亂up油價低迷

我諗上年都無人會估到，油價o係今年竟然會低至廿幾三十蚊一桶。到底產油國為咩o係每出產一桶油都要蝕錢既情況下，重唔減產由得油價下跌? 報章就話係為左打擊美國既頁岩氣公司，可能有人又會諗，燒咁多銀紙，去打瓜左佢地值唔值得呀？當然，產油國表面係為左打瓜頁岩氣既公司，但實際上要得到既，係打垮左佢地之後既掠奪同吞併，確保長遠既利益，再者俾到人地一個signal，下次都會為左打擊對手而不惜代價，令到之後想加入頁岩氣分一杯羹既都要三思。

而且，油價同股市息息相關，如果一早預知油價會跌，又或者知道幾時產油國會坐埋傾下計，從中o係金融市場獲得既利益到底有幾多，真係可能多過賣油。

當然，以我一介蟻民，所講既真係笑死人，不過反正係自己blog，打出黎失禮下都無壞既。

16年1月

今年一開始，個市已經唔精神，月頭咁既跌法，真係幾得人驚，不過到月尾，個市似乎定返唔少，今日重升近五百點添。自己o係呢個跌市入面，主要都係賣貨多，趁龍翔有相當盈利，套現左近四十萬出黎，利潤十三萬多少少。跟住就係沽認沽期權，由於行駛價偏低，到期唔使接貨，淨係權金落袋。由於仍然覺得大圍經濟唔會有起色，相信未來有更佳入市機會，所以繼續忍。到底最終會再創低位，或是恆指去如黃鶴，真係無人知，不過投資講客觀數據之餘，好大程度都係取決於個人感覺，所以都係決定隨心而行。

環海‧東岸業主的十年-----轉載文章

記得上年十月同個後生仔同事傾開計，講開佢買左環海東岸既樓花，之後自己都打左篇文，可見http://chungyin50.blogspot.hk/2015/10/blog-post_14.html?m=1。

平時有早留意下向西村上春樹既facebook，呢條友寫既野，有時真係幾啜核。早兩日見佢出左篇文章，抽買左呢度既業主水，講真好似o係佢o地傷口灑鹽，但向西呢篇文，話唔定真係會變成好多人既現實。高位買左樓，經濟逆轉時，由於勉強上樓，隨時都供唔起。就算真係供得到，資金都會縛死一段長時間，如果遇到投資既好時機，變相錯失既呢d機會。

以下文章轉載自向西村上春樹既facebook
[環海‧東岸業主的十年]

2015年9月，朋友同你講環海‧東岸主打劏房戶，啲單位細到咁點住，仲要三年樓花期，呢啲盤狗都唔屌，扲嚟做一樓一鳳都厭細。你唔聽，你話，你返朝九晚八，買咁大間屋把撚咩，200呎單位執一執佢，即刻有SOHO Feel。雖然$17,000呎，三百幾萬真係貴咗D，但經紀同你講，自住唔怕趺，二十萬首期都唔洗，呢啲筍盤邊度搵？所以你勉強做咗九成半按買到個單位，唔算人生贏家，但都叫上咗車了咗心願。

2016-2017年樓市步入熊市，市區半新樓$10,000呎已成常態，朋友笑你層樓每呎已經跌咗五六千蚊，你話趺咁少好minor，只係技術性調整，個市實會升返，你發誓個盤升到三萬蚊呎個陣，你一定會日日問佢地買咗樓未，再日日同佢計，租人樓幫人賺咗幾多錢，日日同佢地班淡友廢青鞭屍。

2018年了，三年嚟你一直都承受緊熊市週期，你已經無理，因為你好開心，終於可以收樓自住，同你剛拍拖o既女朋友好雀躍咁陪你驗樓，但當佢入到屋發現單位只有二百呎四幅牆o既時候，你見到佢唔出聲眼濕濕，你知道唔多對路，你唯有笑笑口話單位細有細好，管理費段呎計，平都平好多，佢笑唔出，仲流咗一兩滴馬尿，佢最後只係口震震咁問咗句，點解間屋無房但有露台，你唔識答。

2019年初，女朋友終於諗到個藉口同你分手，可惜天意弄人，二百呎單位，唔扑嘢根本無嘢好做，所以住咗唔夠兩個月，佢已經比你搞大咗個肚，只能夠同你繼續生活落去。

2025年，你個仔六歲，有一日佢喊住咁放學，你問佢點解，佢喊住話同學小明間公屋又大又靚，點解你咁窮要住環海‧東岸，你爭啲一時衝動掟咗你呢個不孝子落街，但一諗到個單位變凶宅又即跌兩三成o既時候，你停咗手，然後跪低攬住個仔，你喊住話，你錯在唔係窮，而係唔夠窮。

是日交易@ 2016-01-20

最近動作多多，今日見恆指跌唔少，趁龍翔重有禾青割既時候，再以1.36賣走50000股。本來想換馬同埋沽認沽期權，不過全部唔成功。或者都唔係壞事黎，之前沽既中石油認沽期權，以呢排走勢好大機會都要接貨，今日唔成事變相當留多d資金，可能低處未算低，之後重有更好機會。

15年 12月 開支

過左成大半個月，先醒起未update 12月既支出。

12月開始轉左用另一個app，叫3Q記賬本，比之前既好用。呢個月支出18777，比想像中少，原本諗住聖誕會洗多d，不過因為老婆同屋企人聖經去左短線遊，自己一條友慳返唔少，不過一二月將會大超標，一月就去旅行，二月就要派利是買賀禮，睇黎呢兩個月都係血流成河架啦！

是日交易@ 2016-01-18

今日做左兩項交易

1) 以1.3 再沽100000股龍翔，本想賣完就買返另一隻股，不過唔成功，唯有當增持現金。

2) 沽中海油認沽期權，行駛價5.75，收1000蚊權金。

最近交易

去玩既時間過得真係特別快，十二日既東京之旅眨下眼就玩完，又要返回現實世界。

o係離港短短十日多少少，恆指係咁跌。雖然自己唔係貼市既炒家，不過依家既科技實在太方便，有一張上網卡旅途中依然可以接收資訊處理交易，所以我都會o係返到酒店既時候先睇下股市既表現，睇下有無咩好機會，結果今次旅程入面，自己都做左三次交易。

1) 2016-1-8，以1.34沽100000股龍翔。
2) 2016-1-11 本來想以2.24買入50000股葉氏，但最終只成交左36000股。
3) 2016-1-11 沽中石油認沽期權，行駛價4蚊，權金0.07，共收2800蚊。

講完最近既交易，遲下就補返今次旅程既遊記，今次住左兩間溫泉旅館，價位就貴左d，不過真係好正，值得同大家分享下。

再割禾青

今朝出去玩之前，set左1.34賣十萬股龍翔，結果今晚返黎睇成功沽出，唔計已收股息，利潤有50%多d，或者會換返第二隻都唔定。

係咁跌~~~

小弟4號離港，同老婆去東京玩幾日，15號先返。點知我一走，股市就係咁跌，唔通我咁大影響力!!!!

雖然係去旅行，但o係酒店既時候都有留意下個市，始終要睇下有無執雞或者割禾青既機會ma。話就話個市係咁跌，不過個人都無咩太大既感覺，一黎仍在旅行mode，二黎自己既持股跌幅有限，而且手頭上現金唔少，跌得多或者係入市好機會。之後重會跌幾多，真係無人知，黎緊會做既應該都係沽認沽期權，今朝起身見個市唔精神，都set左沽認沽期權，不過收市都唔成功。黎緊應該都會咁做，行駛價低少少，權金少d都唔緊要，唔成功亦都無所謂，最緊要真係行駛既時候個價唔好太高。

Update完呢篇，應該要到旅行完先會再更新，唔知返黎香港既時候，恆指到底會係幾多點呢？

展望2016

眨下眼15年話咁快就過左，之前檢討完，係時候展望一下未來16年。

賣股收益方面，14/15呢兩年算做得唔錯，不過因為之前海嘯期間以比較低既價錢買入股票，所以等左咁上下時間，14年算係收成期。而15年主要因為收成期套現之後換入龍翔，無啦啦有段時間佢又爆升，叫割左部份禾青咁先叫做得好d。但黎緊今年個市睇落都麻麻地，除非再有機會割禾青，否則都係播種期，所以都唔會有咩期望，有固然好，無就播定種等遲下收成。

股息方面，由於割左部份禾青，如果唔將資金入返市，就會得返九萬幾一年，希望有機會入返市，能夠維持返一個月一萬就好。

期權方面，無特別期望，o岩既先沽認沽期權收少少權金幫補下。

借貸方面，除非特別抵，如果唔係唔會再借。

黎緊呢年既投資環境應該無上年好，希望做到展望所講既就已經算唔錯。