2014年12月28日 星期日

2014 聖誕快樂

聖誕岩岩過左去,其實對我黎講,大時大節同閒日都無咩分別,因為人地放假既時候,我都可能返緊工,所以我已經無咩感覺。

當然,如果自己單身寡仔,求求祈祈過都無所謂,不過有另一半就唔係咁講既,始終都希望身邊人過得開開心心。今年24,25號都要返工,陪唔到老婆,26號終於放假,決定陪老婆食返餐好既慶祝返。去左一間o係大坑食日本野既小店,全程由師傅發板,雖然價位唔平,兩個人食左成二千七銀,但真係一分錢一分貨,食材新鮮到不得了,再坐o係壽司枱等師傅逐一將精緻美食奉上再加以介紹,絕對係物有所值。與其去酒店食buffet或者去集團式食店食Christmas set,擺明俾人劏,倒不如去呢d小店,用平日既價錢豪少少去慶祝一番,感覺更加值得,另外亦當支持一下小店既經營。當唔少香港人話集團壟斷整個市場既時候,佢地有冇身體力行去支持那些小店?


今個聖誕period,除左食餐好既,之後又日同老婆周圍行街食飯,又送左禮物俾老婆同d兒甥仔女,都使左唔少錢,反而自己就只係因為d衫著左好多年,終於洗左千幾蚊買返幾件靚少少既衫褲,其實如果我自己一個人,洗既錢真係有限,我呢d人真係闊佬人地,孤寒自己。睇黎一個人既財務自由唔難,不過加埋身邊人都係冇咁易啦!始終都希望偶爾能夠俾身邊人好一d既野啦!

2014年12月23日 星期二

我看許仕仁一案

今日許仕仁一案終於有判刑,一干人等分別判監五年至7年半,當中被判最重既係許仕仁。曾經貴為特區政府既三巨頭之一,臨老竟然落得如斯下場,可謂疚由自取,唔抵可憐。

政務司司長既月薪成三十幾萬,而新地顧問年薪四百幾萬,重未計其他福利,雖然同富豪無得比,但絕對唔係現任財爺所講既等閒中產之流。

對於我地呢d普通打工仔,千萬既資產可能已經達至財務自由,當然,以大家既層次唔同,以我地呢d凡人既層次去比較未必公平,始終搵三四十萬一個月,洗費冇理由同搵我地搵o固兩三萬既相同,始終許仕仁接觸既大部份都係政商界既要人,生活既圈子無可能同我地d蟻民比擬。 不過睇返許仕仁既洗費,奢華程度已經遠超佢既入息,長期都入不敷支,先導致佢後來以權謀私。

其實許仕仁呢單case,對我地呢d追求財務自由既普通人黎講,真係一個好好既反面教材。因為就算搵幾錢都好,如果唔可以控制自己既物慾,無好既財商,都可以有超過自己入息既消費模式,只會導致債台高足既下場,永遠都無可能達致財務自由。對於追求財務自由既人黎講,搵幾多錢係重要,但更重要既,就係控制自己既物慾。呢一方面,就要靠個人既修為啦! 好在自己既興趣都唔係咩消費活動,依家最大既喜好,就係睇blog,間中寫下blog,一蚊都唔使,重有雞碎咁多收益添。

有時做人,簡簡單單,更加易滿足,反而無追求物質既煩惱,更易達致財務自由。

2014年12月20日 星期六

借貸容易忽略既小地方

早兩日又做左筆算幾低息既分期,之後塘人兄問開如果申請太多會唔會影響信貸評級既問題,跟住70後兄再補充返一個月比人TU三次就要降級,從而帶出信貸評級呢個好易令人忽略既問題。

我自己既幾筆貸款,除左一筆係幾年前查過我信貸紀錄外,之後再續借都冇check過,而另外幾筆都係我用開佢地既銀行服務,主動搵我,亦都冇話check我個信貸紀錄,所以久而久之,自己都忽略左呢樣野。大部份人做借貸,最關心既梗係利率既問題,自己都唔例外。不過如果行做貸款,好似自己既其中一筆,銀行會查你既信貸評級,之後先開個息率俾你,當然息率唔岩,可以唔借,但唔好諗住試多幾間,格下價,因為好似70後兄所補充,俾人TU多幾次就會降評級,到時息率就更加唔會平。

其實影響信貸評級既,重有好多方面,例如申請持有多張信用卡,拖欠還款等。信貸評級係銀行評估你財務能力既其中一部份,對於無借開錢既人,信貸評級銀行應該會睇多d。而對於做開貸款既人,信貸評級報告入面清楚列埋借貸還既紀錄,銀行都會睇埋同埋更加看重,從而評估你既還款能力,如果一向準時還款,相信銀行對你既評估都唔會差得去邊既。

以上都只係自己既見解,如有錯誤,希望有人士可以提點下,糾正我既誤解。

2014年12月18日 星期四

意料之外既借貸

之前收到銀行寄黎既傳單,見到有個開心分期計劃,就係只要單次簽帳滿三百蚊,合併夠八舊水以上,就可以做分期,十二個月或者廿四個月,手續費0.12%,見咁抵於是今日打去問,結果就係呢個分期計劃,只係適用於交稅之後幫你做返分期,其他消費就做唔到咁抵。跟住個姐姐就建議另一個計劃俾我,月平息0.19%,我即刻話唔使,因為我都用緊呢間銀行既借貸,月平息都係0.15%,而且依家重o係VIP添,無理由重要貴左架,所以都唔使再傾落去。

之後個姐姐見我誠意拳拳咁打黎問,又係銀行既忠實擁躉,就話幫我問下可唔可以做到0.12% o固個,不過因為之前已經個額已經所剩無幾,最多做到六萬,雖然係少,不過咁抵梗係照試啦!

過左個幾鐘,位姐姐打返俾我,同我講無問題,我話做48期得唔得,都ok, 就係咁,無啦啦又再借多六萬蚊,每個月都係千幾蚊,真係抵! 黎緊股市再跌又多少少彈藥啦!

2014年12月14日 星期日

默默增持後既現金水平

隨住金鐘被清場,佔中對市場既影響已經微弱乎其微,自己亦默默將資金投入返股票市場入面。不過個人都係對香港經濟唔太樂觀,所以增持左一隻業務與香港經濟冇關既股票,未來就算香港經濟唔好,其業績被影響機會亦都唔大。

原來唔經唔覺,經過多次既增持,已經投入左六成半既資金。未來都會繼續將手頭資金投入股票市場,咁岩美股大跌三百幾點,又係入市既時候都唔定。

2014年12月7日 星期日

小數怕長計

之前申請左個一通既戶口,都冇咩點用過,早輪因為自己做錯事,賣晒銀行戶口入面既股票,成手現金。於是將手頭既錢撥去一通個戶口,預備隨時入貨,之後趁機分段入左隻心水股。尋日見得閒少少,比較返自己用一通同銀行入同等數量股票既洗費,原來都差成千蚊有多,以前因為用開銀行戶口,方便開一直都冇咩留意當中既費用,買入已經相差成千銀,如果計埋賣出既費用,又差成千,一來一回,都幾襟計。雖然話証卷行好似冇咁穩陣,不過我又唔係咁諗,好似一通咁,全程都係上網攪,比起銀行既成本都不知少幾多,所以應該唔會太危險既。如果只係純粹普普通通既買賣,用一通既成本真係抵好多。

2014年12月5日 星期五

經一事,長一智

上次講到自己做錯事,過度高估佔中為市場帶黎既震盪,結果依家揼春揼到爆。唯一安慰自己既係叫賺住做錯事,總算揼左千鳩幾下之後揼少一兩下。

唔錯都錯左,咁到底今次有冇d咩既得著?

第一就係加強左自己對長線投資既信心。雖然今次係做錯決定,但其實睇返呢幾年所作既長線投資,回報其實都唔錯,如果今次唔係自己衰,繼續持有既話,個回報應該都值得期待下。

第二,就係需要降低大圍氣氛對自己既影響。今次做錯事,除左因自己既睇法外,好大程度大圍既氣氛亦都影響左自己短線既操作。既然好似之前所講,自己既長線投資紀錄都唔錯,就應該減少唔擅長既短線操作,咪俾大圍氣氛影響到。

第三,就係肯定左換馬既操作。之前都吼左隻心水股,不過心頭上現金有限,而且隻股成交量少,自己成日set個價都入得有限貨。今次做錯事成手現金,所以最近默默增持,入左一半現金既貨,都算有d安慰。

經一事,長一智,今次既錯誤,希望再冇下次。

2014年11月30日 星期日

又做錯事啦!!

之前因為個人睇法,認為佔中會為股票市場帶黎相當既影響,於是將手頭上既股票套現為現金,維持一個相當高既現金水平,雖然之後候機投入返部份資金,亦不能否認今次可能做錯。

當時我將手頭上既新華文軒同中國銀行沽清,今日睇返兩者股價,文軒比賣價平左7毫多dd,而中銀就升左5毫子, 睇落都無做錯,但因為中銀持股量多好多,如果當時唔做任何行動賬面資產反而上升。

文軒股價加股息既回報,可算相當唔錯,但中銀既回報因為賣早左就普普通通。依家手頭上現金水平仍維持一個較高位置,唔排除會再購入心水既股票。而走寶既中國銀行,唯有檢討下,希望下次會把握到自己手持股票既升值。

2014年11月21日 星期五

入下貨先

之前套現左大部份股票,之後先醒起除左手頭上既資產外,重有強迫金,於是再將手頭既強迫金由股票基金轉返做保本,變相套現,突然現金水平高左唔少,甚至可以話有d失算,因為一直計漏左強迫金o固份。所以之前一直物色緊機會,希望投入返多少少資金,於是o係十月尾,同早幾日,見到隻想入好耐既股票,於是一口氣投入25%既資金,目標係將手頭既現金投入50%-75%,而強迫金暫時按兵不動,當備用資金。

2014年11月18日 星期二

Nov 大板遊


呢排懶左update, 因為去左大板玩左一個星期。雖然話最近yen平左唔少,不過日本既洗費其實都唔算平,成個trip洗左三萬幾蚊。計埋早排去蘇梅,今年既回報已經洗左2/3有多,本來之前都無諗過再去玩,不過老婆未返新工,當同佢玩埋呢排,反正之後佢都無咁快有大假。

今次旅行,有個驚喜,就係upgrade上business, 原來business又真係好舒服,不過今次我一行數人都有得upgrade, 會唔會反映到航空業環境唔係咁好? 不過我未坐過商務,可能一向都係咁都唔奇。但呢d免費upgrade既體驗,話唔定係航空公司既策略都唔奇,因為今次咁舒適既經歷,真係會令人心動,以後去旅行都轉乖商務客位,前提當然要銀包負擔得起。

另外,去旅行既時候,洗錢既心態都好唔同,平時都唔會咁手鬆,一去玩就鬆手好多,買買下都買左唔少野。不過睇返香港既旅遊業,似乎開始停滯不前,旅遊業走下坡,影響唔係單一咁簡單,一連串既行業都會受影響,零售、物流、飲食重有好多睇落唔多關事既,其實背後都會受影響。

今次旅程之後,應該要到下年先會再去,希望下年既旅程都係唔使自己份人工出就好啦!

2014年11月3日 星期一

香港將不及以往「完美」

東方日報A1頭條:意大利名牌恐撤離


早兩日睇到東方既頭條,內文寫歐美民主國家的駐港商會明確批評佔中。其會長樊秉傲(Fabio De Rosa)接受報章訪問時表示,佔中開始後會員銷售量大削三至四成,其中零售及物流業更成重災區,不少會員紛紛放慢原先的擴張計劃,警告若佔領行動到聖誕消費旺季仍未結束,部分會員將被迫關閉部分分店、開始裁員、甚至考慮撤資。

我自己就覺得講到考慮撒資,以依家既情況,似乎誇左d。不過,報導入面提到「為意大利與香港的蜜月期畫上句號」(The honeymoon between Italy and Hong Kong is over)以及香港將不及以往「完美」,相信將會o係長遠未來既經濟反映出黎。
從商最重要既到底係咩?當然就係賺錢,而一個穩定既社會就提供一個最佳既營商環境。一直以黎,香港都係一個絕佳既營商地方,低稅率,治安好,政治穩定,法治健全。但自呢次佔中之後,我都相信某程度上外資都唔會好似以前咁放心,當有戒心既時候,投資自然較之前保守, 你試想下,原本100分既地方,跌到得80分,其實分數都唔差既,不過對外資黎講,係差左20%,會有所顧慮係好自然。呢方面既影響,唔會即刻浮現出黎,而係會慢慢於長遠反映,如果香港維持依家呢個政治情況,負面既反映可能會更快出現。

2014年10月30日 星期四

睇黎香港呢次既經濟好景週期開始步入完結既時候

http://www.bastillepost.com/hongkong/1-政事/399376-薪常會倡僅最高薪5級公務員加薪3

公務員薪俸及服務條件常務委員會,向特首呈交2013年公務員薪酬水平調查報告書,建議總薪級表第45至49點的高級公務員,加薪3%,其餘薪級則維持不變。
薪常會調查了128間私人機構,發現屬公務員總薪級表最高5級,即第45至49點(87,340至103,190元)的公務員薪酬,與私人機構相差約8%,建議加薪3%。
但屬公務員第一標準薪級表(10155元至13745元),及總薪級表第0至44點(9930元至86440元)的職位薪酬,則與私人機構大致相約,建議維持不變。

公務員呢份工,其實係咪真係咁好,真係見人見至。係經濟好既時候,公務員其實唔係咁吃香,因為出面d工計埋人工花紅,待遇真係唔差,自從轉左強積金之後,其實公務員既待遇唔係好似街外人諗咁好,好多福利都cut晒,而且經濟好時,某d行業加人工既幅度好多時都多過公務員。不過公務員有樣好,就係穩定。係經濟唔好既時候,往往比出面好少少。比如出面減緊人工,公務員就凍薪多。出面要裁員,公務員就減人工,所以公務員凍薪或者減人工,其實反應到出面既經濟有幾唔好。雖然依家只係薪常會既建議,而且唔係所有公務員都建議凍薪,不過有得咁既建議,而且凍薪係佔大部份,可以想像到來年經濟既預期都唔慌樂觀。睇怕香港呢次既經濟好景週期都係開始步入完結既時候。

2014年10月26日 星期日

滬港通唔通

香港交易所昨發通告,指至今尚未取得啟動滬港通批准,滬港通無實施確實日期。

正如自己之前所料,以佔中既發展,滬港通無咩可能係十月推行,不過市場仍然有唔少人一廂情願地諗住會如期推出。今次既暫停,係意料之內,最怕係無止境擱置,因為代表中央已經認為香港不穩既政治情況係唔適合作為國家既金融中心,咁就真係大件事。舉一反三,既然香港政治咁唔穩定,唔落實滬港通之後,重有冇咩其他有利既政策會擱置?? 一諗到呢到,我都不禁擔心香港既前景。

睇黎呢輪股市表現都會好似過山車咁,大家都要坐穩d至好。

2014年10月20日 星期一

再部署

之前講過套現左唔少股票,上個星期初,做左第二個部署,就係將一半既強迫金由高風險轉返去保本基金,同時將黎緊既月供都轉埋做保本,等未來轉返做高風險既時候有多d資本。

可能有d人會話,既然唔睇好香港未來中線經濟情況,預計股市都會隨經濟回落,點解唔賣晒d股票同轉晒d強迫金wow, 好簡單,自己有信心但唔等於唔會睇錯,依家咁做,就算錯左,都叫做錯唔晒,重可以享受到牛市既好處。而且就算睇岩左,時機都未必即刻發生,話唔埋要等多一年半載,咁都重可以搭多程順風車。

你不理財,財不理你,之前淨係掛住管理自己既組合,幾乎忘記左強迫金個戶口,好在突然靈光一閃醒起,即刻做野。

2014年10月17日 星期五

睇大方向跌

本來以為香港呢個亂局,會為股市帶黎一個唔細既衝擊,但估唔到,局勢越難拆解,個市反而升返上黎,真係難明。坦白講,自己睇短線成日都睇錯,但仍相信自己對大方向會跌既睇法。

香港依家呢個亂局,基本上睇唔到解決既方法,就算對話都唔見得有咩結果,只係希望到時有個落台階。但隨住各方有機心人士於唔同位置插旗搵著數,群熊(狗熊是也)各據,下台階搭唔搭得成都好難講。而隨住部份茲事者越趨激烈,和平落幕就更加難。亂局既影響,將會續步反映係香港既經濟方面,各行業都不能獨善其身。

第二,祖國而至外國等外圍經濟,都唔見會有咩好消息。而且美國唔知幾時會宣佈加息,更什美國已經有兩宗伊波拉確診,一旦全球大爆發,威力大過沙士。

子彈就已經上晒彈夾,不過都係瞄準d先出手。

2014年10月9日 星期四

難跨的心理關口

早一陣子賣左大部份既股票,呢排又升返d,話就話投資左唔少年,但每次做完決定,市場有相反反應既時候,先係會懷疑自己做錯左,但事實係咪做錯,只有時間可以証明。之後就會想做相反既行為,好似今次我賣完之後,見個市升返就有衝動想入返市。我諗唔少人都遇到過呢個問題,坦白講,呢個心理關口,真係唔易克服,希望自己最終能忍得住,忠於自己既計劃,咪俾自己既心理影響到自己既投資。

2014年10月8日 星期三

滬港通會否如常推行?

之前賣左大部份股票,最大原因係最近既亂局,其次係手頭上唔多現金。賣左股之後,手頭上既現金比率大增,而短期會否投入返市場,就睇滬港通會否如傳言一樣o係十月推行。雖然無確實日子,但之前市場都認為十月會推行,但觀乎現在既亂局,阿爺重會唔會俾咁多甜頭唔聽話既小朋友,我真係唔樂觀,除非真係如期行滬港通,否則d錢都係又佢擺住先算數。

2014年10月7日 星期二

止賺左先

之前將手頭上三分二既股票止賺左,要好仔細咁講當中既回報,真係有o的難,因為呢兩隻股票,我o係09/10年開始,至到14年,分階段入左幾次貨,每次數量都唔同,唔同階段買既貨,回報率都唔同。不過簡單咁以整體黎計,其中一隻股息加埋股價收益有18%多dd。另一隻就有118%既回報。算不過不失啦!依家手頭上既資金十分充裕,等機會先會再入市。


2014年10月2日 星期四

佔中後遺症之奇想

"佔中"活動發展到依家呢個地步,相信唔容易解決。有d人講最壞既情況係解放軍既介入,但我會諗到另一個惡劣情形。

其實自回歸之後,中央的確有心想攪好香港,對香港算相當照顧,由以前既自由行政策到近期既滬港通都見到政策對香港既偏斜。然而,自"佔中"行動之後,中央會唔會開始覺得香港養唔熟? 原本諗住攪好香港,做過榜樣俾人睇,但既然你地唔領情,咁就放任你地自身自滅,先cut晒自由行,再慢慢cut埋之前對香港有利既政策,而且由得現在既政治亂局維持落去,等香港既經濟慢慢衰落。到民不聊生既時候,先俾民主你地,但到時咩人都無力迴天。犧牲一個香港,俾其他市睇到就算有民主都未必有民生,以警效尤。

當然呢個只係自己個人既奇想,但如果真係向咁既方向行,香港真係無運行。

2014年9月29日 星期一

賣貨套現

今日做左一次大買賣,就係將手頭上既2/3既股票套現晒出黎,主要係親眼見到現時佔領運動既困局。

佔領活動已經玩到第三日,大致秩序都算可以,亦都見到大部份參與者既質素都唔錯。但係無論最後結果係點都好,香港都係輸家。如果佔領活動有序咁持續落去,結果可能變成一個長期既佔領,絕對相當影響香港既經濟。但如果隨住部份參與者行為失控,好大機會情形一發不可收拾,令警方需要更強力既介入,到時可能令反政府者攪更多事出黎,令政局更加混亂,股樓一定會受影響。

其實只要佔領行動一展開,香港既經濟都會受到影響,眼見現時既困局唔易解決,將手頭上部份股票減持,候機再入。

2014年9月28日 星期日

淺談最近既亂局(ii)

其實一連幾日o係添馬廣場既罷課集會活動都好和平,警民都無任何衝突情況發生,但所有野都由集會去到尾聲學民思潮有預謀地煽動學生闖入人民廣場而改變。當學生強行進入人民廣場,其實對所爭取既野係無幫助,而警方清場亦係一定既行動,傳媒集中報導警方既行動,從而鼓動到其他市民。之後,佔中三恥乘機進行騎劫,強行將罷課集會轉變為佔中,借機利用罷課學生達到佔領既目的。佔領港島主要既幹道,最終一定會引致清場既結果,清場一定會引發示威者同警方既對抗,會使用一定既武力。而部份市民見到呢個情況,亦自發出黎支持學生,導致依家既亂局。好多人都將責任推俾警察,但正如我所講,清場係一定會發生, 示威者同警方既對抗一定會出現,只係時間既問題。警方既清場手法,有針著餘地,但面對大批示威者,可能呢個係唯一辦法,而清場前亦有相當多既時間俾示威者離開,當然,係咪應該再俾多o的時間,呢方面的確值得商榷。示威者同警方都有責任,但最大責任,係將罷課行動強行演變成佔領行動既人,變相推學生進行違法活動,從而鼓動其他市民,為求達致一己目的而犧牲其他人既始作俑者。

2014年9月27日 星期六

淺談最近既亂局

某程度上,香港最近既亂局,陰謀論o黎講,係有心人一手策動。其實早幾日o係添馬公園攪既擺課集會行動,一直都係和平咁進行,集會及警方雙方面都無任何衝突。但坦白講,參與既人士有限,o係社會亦引起唔到太大既迴響。而整個事情既轉裂點,就係擺課行動尾聲既時候,學民思潮既黃之鋒號召同煽動學生衝入去人民廣場,之後所引起既後續事情。

佢o地之後亦承認係有預謀咁做,大義凜然咁話要奪回人民廣場,但我真係好懷疑背後既動機。其實係人都知,強行闖入人民廣場,好大機會引黎警方既清場,但學民思潮仍默謀咁做,好大原因係之前擺課行動引唔起市民既關注。要有noise,要引起注意,最好既方法就係煽動學生去做某d行為,從而引起警方既行動,再透過傳媒,集中放大某部份警方既行動,從而引起大眾對學生既同情同關注。而煽動學生闖入人民廣場,只要警方進行清場,清場一定會用相當既武力,只要傳媒加以報導,就達到引起市民關注既目的。

其實我相信唔少學生係關心政事,但當事態發展至此,我都唔能夠唔懷疑背後推波助瀾之輩既用意,點解會由當初既和平集會突然演變成闖入人民廣場?但我唔能夠否認反對政府陣營呢個策略係成功,只不過害苦了有熱誠既學生同前線既警員。

2014年9月18日 星期四

由寫blog看到自己投資既相似之處

o岩o岩個blog突破左五位數字,慢慢向住六位方向進發,而由呢個blog入面,睇到唔少同我自己既投資相似之處。

由今年一月開始寫blog,文章慢慢由零,累積到依家有六十幾篇。瀏覽量慢慢由百,千到依家過萬。其實文章既累積,就好似資產既收集。當寫得咁上下文章,你寫文章既水準始終都有所提升,就好似當你累積左咁上下既投資經驗時,o係挑選較優質既資產既功力都應該會比以前好既。而隨住文章既數量,自自然然會吸引到觀眾既追看,瀏覽量亦會慢慢提升上黎。而瀏覽量就好似收集資產之後所得既被動收入一樣,呢個進程雖然漫長,但隨住越多資產,被動收入會越快。以前要咁上下時間先累積到一千,到後期會越黎越容易達到。

由萬到十萬,要唔少時間,由十萬到百萬,都係唔簡單,由百萬到千萬,直頭有d難度。但當你儲到咁上下資產既時候,就會發覺以前用唔少時間唔簡單既事,原來比想像中快同簡單。

呢個就係我既投資方向,希望我既資產同我個blog一樣蒸蒸日上。

2014年9月17日 星期三

10000大關


一月開blog,到三月尾個瀏覽量去到四位數,累積既瀏覽量終於達至五位數。講真,比想像中快左唔少,下次就係達六位先會再出,不過應該無咁快lu。多謝咁多位鼎力支持。

2014年9月15日 星期一

與一位後輩閒談

原來唔經唔覺,已經o係呢行做左十一年幾,未至於係老屎忽,不過都叫有d資歷咁啦!對於d後輩,我都樂意提點下,始終佢o地賴野,我o地都有可能要執手尾,再者佢地做唔到野,咪又係我o地做。

最近拍開個做左三四年既後輩,佢做野都幾有交帶,又上心,對份工都重有相當熱誠。我呢份工話難做又未至於,不過有好多地方要注意既野,需要經驗積累所得既技巧。難得有唔錯既後輩,拍佢既時候我不時同佢分享下做野既小技巧。

除左工作既話題,亦都有講下私人野。知道佢黎緊會結婚,講開住既問題,知道佢o岩o岩買左樓,觀塘舊區,450尺,六樓,成四十幾年樓,要成380萬。佢俾三成首期,之後月供萬一多d。求其計下,首期都要百二萬,已經未計其他洗費,佢話屋企人幫佢五十萬,另外就係佢同未來老婆攪掂。雖然話屋企人幫手,但四年左右已經儲到唔少,冇好似依家d後生咁洗腳唔抹腳,我都有讚佢。

如果睇返尺價,相對其他樓,好似幾抵咁。不過咁,成四十幾年樓,供廿五年,到供完已經成六十幾年樓,當中大大小小既維修費,每月供款管理費加差餉,其實有排計。當然,我都明自住係有實際需要,如其租樓幫人供,不如自己做業主。呢方面我係理解,我自己都係過來人,自己結婚已經年半有多,如果唔係老婆屋企平租俾我o地,而係出去租,已經供左廿幾萬啦!而且呢段時間,樓價又升左浸,計埋唔止廿幾萬,所以我真係唔夠膽講話佢買樓係錯。

聽到咁既情況,真係幾感慨下。自己好彩,可以有平租既地方,唔使挨貴租又唔使o係高樓價之下因為住屋需要而勉強買樓。而後輩有屋企人幫忙,亦都比唔少人幸福,但係咪真係好事,都要待時間黎証明。佢依家供緊萬一/二蚊,如果將屋企人幫忙既五十萬攤返開廿五年還,每個月又要俾多千幾銀,加埋差餉管理費,每個月淨係投放o係間成幾十年既樓已經要萬四/五蚊,未計可能將來會加息,雖然屋企人未必要佢還。但樓價去到咁唔合理既程度,屋企人幫手俾部份首期入事,到頭黎是福是禍,真係無人知曉。睇得通既,我都唔使咁苦惱啦!

2014年9月13日 星期六

買夢+夢已醒


o尋日最多香港人做既事,應該就係o係電腦面前訂挨瘋,而今日最多人做既事,應該就係買六合彩發金多寶橫財夢。

其實係人都知中頭獎既機會極細,如果從經濟角度睇,直頭唔應該買六合彩。不過,理性皆理性,人係感情既動物,一百幾十,或者一千幾百,買既係一個夢,夢會醒係理所當然,但夢中可以胡思亂想所帶來既歡愉,諗下都興奮啦!再者,始終有dd夢境成真既可能。

不過好可惜,話咁快夢已經發完,聽日又要繼續工作,唯有努力等投資既收成啦!

2014年9月12日 星期五

埃瘋息,你訂左未?

我諗尋日晏晝最多人做既行為,就係上apple個網,不停refresh refresh 再refresh個板面,務求訂到i phone6。本來我都想訂返一兩部,不過唔係自用,只係諗住順勢賺返d。不過好可惜,我份工有時要返通宵,咁o岩尋晚先挨左晚,起身已經過晒開賣時間,見電話whatsapp既group都係咁講買唔買到,不知幾熱鬧。

今次i phone6開賣,似乎都帶黎炒作熱潮,但坦白講,身邊識既唔少人,都唔係想轉用i phone6,大部份都係想順勢賺返d,當然仍有部份係果粉會支持。事實上,自教主仙遊之後,蘋果既產品已經失去以往既魅力,依家叫做重heat純粹係以前剩落既效應。而今次i phone6,我淨係覺得硬件提高左,而無左以前既i phone所帶黎既震撼。以前i phone真係帶黎innovation,真係創新走前世界幾步。但依家純硬件既提升,坦白講,android咁多間廠兢爭,硬件上我唔認為apple有咩領前。

雖然我就唔覺i phone6有咩咁出色,但唔代表無水位,不過相信今次炒作既時間唔會長啦!

2014年9月11日 星期四

有消息真係唔要!?

最近,因緣際會見過某上市公司主席個仔一面咁大把,之後返去睇下呢間上市公司咩料子,當時九毫半紙,對上一日跌左8個%左右,係咁易睇下呢幾年業績,睇完完全唔係我杯茶。第二日返工,同同事講開呢間野,有個同事話收到內幕消息,呢隻野會炒上個半樓上,而呢個同事係有可能收到d風既,不過既然唔係我杯茶,聽完係咁易應過下就算,點知o固日就即刻升左15%以上。不過再過一日,隻股又跌返唔少,得返0.98。對於呢d消息,自問真係無能力把握到,當然,有能力食到既,我係唔反對啦!始終投資/投機,最緊要係賺到錢姐。

2014年9月6日 星期六

夾錢買樓!?

之前o係止凡兄個blog入面,睇到有位90後既朋友留言,佢話有個諗法 就係搵身邊既朋友 夾份一齊 買樓供樓 初步構思係三人合資 每人首期預150000左右 大家既負擔係每個月可以拎4-5000出黎。

我相信有唔少年輕既朋友,特別係出黎做左唔係好耐野既,佢地睇住樓市係咁升,手頭上儲左一o的錢,想入市但係又唔夠俾首期,就諗住同朋友夾首期,而且之後夾份供又冇咁大壓力,有咁既想法其實真係好平常。

不過夾份買樓,有唔少問題要解決,最基本會諗到既係大圍經濟不景氣時,朋友出現經濟問題時點供款既問題。但係其實就算自己供樓,都應該要諗定呢個問題。不過有一個問題,係一個人買樓既時候唔會遇到既,而呢個問題,竟然唔係出現係樓市跌或是經濟不景,反而係出現o係樓價升既時候。一個人買樓,樓價升梗係好啦!但夾錢買樓,樓價升可能係一個大問題。一個人買樓,幾時賣都可以自己做決定,自己承擔返責任。但當夾錢買樓,要達成共識其實真係唔容易。試想下升左20%既時候,你想賣但係你朋友睇好會再升唔想賣,或者調返轉,你朋友想賣你唔想,但係你地又冇條件買埋對方o固份,最尾因財失義,可能朋友都冇得做。

呢方面我反而覺得夾錢買樓既朋友會考慮得到,反而更加需要留意。投資最唔想遇到當然係蝕錢啦!但夾份買樓可能係少數投資賺錢既時候會帶黎唔少既麻煩。

2014年9月3日 星期三

止蝕奧園

之前投機性地以1.4買入中國奧園,早幾日以1.305將所有持股沽清,虧損左6.8%左右。

忍痛止蝕既原因,最主要為出黎既業績未如理想,而自己係投機性質,所以立即壯士斷腎。可惜今日又升返少少,上返1.34,係有d可惜,不過唔後悔,因為投機,唔係原先所想就更加要當機立斷。

2014年8月31日 星期日

個人借貸投資經驗小分享

最近留意到似乎多左人講借錢買股票去賺息差,當中有o的人好似以為冇咩風險。而事實上,借錢投資賺息差既最大風險,就係你承擔左風險仍不自知。而講到借貸投資,我建議有興趣既人士,先去睇睇止凡兄既blog, 當中有一系列文章分享借貸既風險,相當之詳細,可以了解多o的先再決定。而既然止凡兄對借貸既風險已講得咁詳盡,我就分享少少自己做借貸既小經驗就算啦!

首先,我自己做貸款之前,唔會假設一個最壞既情況,因為如果你假設一個最壞既情況,你會覺得風險係大到你唔會考慮做借貸去投資。
以我自己為例,我份工好平穩,加人工唔會加得多,但減人工都有限,裁員機會亦都近乎零。所以我唔會假設自己失業搵唔到工,只會將減人工既福度放大,例如預計最多減10%既人工,我會放大至減30%。而股息方面,由現有既股息率減半。
如果預期咁既減幅係承擔到,先考慮借。

而做左貸款之後,值得留意既,係因為想盡早追回支出而做錯決定。我自己就曾經受影響令到自己早左買入股票。而且多左錢,手頭鬆左,都有可能影響自己既決定,呢方面亦都要留意。

其實咁大個人,做任何決定都應該心思熟慮,評估過風險先決定,千祈唔好見人借你又借,因為每個人既情況都唔同,自己的事自己諗。

2014年8月30日 星期六

又借

早排銀行打黎,因為我之前做落既貸款已經還得7788,淨返兩期就還晒,所以銀行方面就打黎,免審查,用返之前既條件就可以借返相同既金額。其實之前借貸既條件真係麻麻地,借廿萬,月平息0.183%,分三十六期還,就咁睇都重ok, 不過重有6000蚊手續費,計返年利率應該要成6.4%,真係唔平。不過o固時手頭上冇晒資金,但心目中有隻心水股去到一個相當低殘既價位,而且已經有另一筆貸款o係身,o固時借貸經驗尚淺,以為唔容易再借,衡量過應該承擔得到,所以決定借。

如果單講回報,呢次算係成功,以現價計,股價加埋股息既回報,扣除所有支出,起碼有幾十%既回報。

但如果依家能夠時光倒流,我會借,但唔係同呢間銀行借,而係搵間利率平d既先借。因為6%+既利息真係唔平,如果每年慳到兩至三個%,三年就有多6-9%既回報。

而今次佢一講用返上次既條件,我就已經叫佢唔使講啦!有過幾次借貸既經驗,知道自己係可以有再平d既條件,而且股市唔似當時咁低殘,回報無之前咁容易,所以息率唔o岩都冇諗住去借。之後銀行方面主動幫我減息,搓左幾板之後,依家借廿個,36期,年利率3厘3多dd,手頭上冇咩備用現金,如果市跌都入唔到幾多貨,計過相信過到自己既壓力測試,都叫借得過既。

呢筆資金,會待目標既股票去到心水既價位就會出擊,同一筆資金,但每月既支出由59xx減到去57xx,感覺又真係唔錯。

2014年8月24日 星期日

港鐵撞成狗之我感

講真,今次港鐵真係抵閙,不過唔係前線既員工,而係港鐵既管理層。

第一,員工點解唔捉走/抱走隻狗,坦白講,呢隻流浪狗既,唔係芝娃咁細隻,雖然睇落唔似會攻擊人,但有冇人百分之百保證抱隻狗既時候佢唔會以為捉佢而襲擊人? 可能愛狗人士成日接觸狗隻無問題,但對於冇受過訓練既員工,如果平時冇接觸狗隻,會怯都唔出奇。

第二,係員工既意識問題。由港鐵開放日既模擬片段,已經見到港鐵對待進入路軌既流浪動力物既方針。員工接受點既訓練,便會養成點既意識,當然唔係話前線員工完全冇錯,但佢地冇重視流浪動物既意識,而著眼班次既準時,某程度係管理層所造成。

第三,唔俾其他人救狗。如果其他人救狗時做成任何損傷,到時追究責任時,到底邊個負責? 所以唔俾係好合理。

雖然講左咁多點好似包庇港鐵,但港鐵真係做得好差。狗都有生命,係咪真係準時緊要過狗仔既生命? 呢個真係值得反思。而今次事件,我認為管理層責任最大,而前線員工唔係完全冇責任,但做成咁既局面,完全係管理層既問題。希望今次事件,真係可以引起港鐵作出改善。

2014年8月22日 星期五

有小小酸

岩岩睇見個o係外國留學既女仔朋友fb, post左佢男朋友送俾佢既2 month anniversary 禮物,就係一架09年既Audi R8。

睇到o固刻,真係有d酸溜溜既感覺。R8係我心目中既愛車之一,幾錢真係唔清楚,淨係知新車過百個,咁我相信09年二手價平極有限卦。以我依家既財務進展,相信都唔會捨得擁有呢架車。

對於屋邨仔出身既我,其實一早就明白自己已經輸在起跑線上,再加上自己只求安穩既心態,知道自己係無咩可能成為富人,明白到富人係一個遙不可及既距離,所以對現狀已經知足,現階段只係希望透過節儉儲蓄去作投資,播種等之後收成,未來可以輕輕鬆鬆咁過活。

雖然話知足常樂,但當親身睇到人地有父蔭既係咁易就可以出手送架貴車俾人,而自己就節約咁過日子去投資,心中都係有點不是味兒。不過咁,人比人,比死人,酸過下食返d甜野就ok 啦!都係o固句,知足常樂,所以望下我隻811就黎突破7 蚊大關又甜返lu。

2014年8月20日 星期三

物極必反

成語入面,我好鍾意物極必反呢四個字,因為無論係個人方面,以至係社會既情況,呢幾隻字都可以完完全全可以反映到現實既情況。

以個人為例,善良係好事,但如果太過善良,事事不問原因就幫,最終只會係咁被人攞著數,善良就變左蠢。又好似做事方面,辦事能力高當然係好事,但如果鋒芒過露,只會招來麻煩,睇過下三國都知到有楊修之死啦!

社會方面,自由民主既社會唔係唔好,不過太自由就變左無紀律,太民主既就只會做成對政策既拖拖拉拉。而政策方面既例子,自由行曾經係救活香港既靈丹妙藥,但過多大陸遊客就導致社會上種種既問題同不滿。

而呢幾隻字,放o係樓市同股市一樣適用。當樓市股市火熱既時候,個個都話唔會跌,只會升,但過往既現實已經證明左樓市同股市去到極至之後,就會跌返咁上下。但係到底幾時先係極致既,呢樣野就要自己衡量啦!

而個人投資方面,都要量力而為,借貸做得好既可以增大回報,但過度借貸有機會另你番唔到身。

所以,另四隻字都係我其中中個做人既宗旨。

2014年8月18日 星期一

組合屢創新高

最近自己個組合屢創新高,相信未來一段時間會再試高位。隨住細價樓屢創高位,樓市既炒作空間又再少d。相對樓市, 依家h股仍處於合理水平,A股更處於一個低水平,上升既空間似乎大得多。如果要炒作既話,相信股票比樓市更有條件。個人覺得A股未來會成為帶動h股上升既動力。如果A股真係起動,隨現有組合會得益外,個人既強積金都投資唔少落A股市場,相信都會係收成既時候。

2014年8月13日 星期三

盡早養成前往財務自由既思維 (2)

上次講完其中一個人生既選擇可能會拖慢財務自由既進程,今次就講另一個可能會有重大影響既選擇。

就係選擇左一個同你o係財務理念唔相近既伴侶。後生仔揀伴侶,好容易就俾對方既外在瞞騙左,而忽略內在既條件。當然,唔係話叫你揀件豬扒,但如果因為貪一時既外在,揀左個只係識買名牌既港女,你有你既財務理念,佢有佢幫妳倒水,試問幾時你先到彼岸。反而揀返個財務理念較相似既另一半,對財務自由既進展有好大既助力。反正男人都唔係想要天長地久,只在乎一刻既佔有,到你有咁上下成績既時候,適時去玩一玩可能更合符經濟原則,當然,道德上并唔建議啦!就算大家步速唔同,大方向同步已經足夠,最怕你行左時佢行右,咁就有排都冇得財務自由啦!

2014年8月11日 星期一

我又講講強迫金

最近止凡兄出左篇強迫金既文章,我都趁熱鬧分享下。

我諗大部份打工仔,都唔會鍾意強迫金,個個月出糧都冇咁d,係人都唔鍾意啦!不過我又唔係咁諗wow,我自己就buy強迫金設立既原意,如果唔係咁,大部份人咪又係會洗鬼埋佢。不過原意好又如何? 實際運作唔掂都冇鬼用啦!依家強迫金最為人疚病既,就係低回報高收費,姐係燒鵝既價錢,蔗渣既味道,重要冇得揀唔食。不過依家社會唔知點解只係著眼左減少收費上,其實止凡兄講得冇錯,如果回報率係好既,俾多d收費我諗冇人詐形,可惜回報就提升唔到,唯有向減收費著手,但係又做唔到真係減wow,所以咪怨聲載道!

但係講到尾點都係自己錢,係咪應該要睇緊d? 我見唔少人都話睇到冇用,有d就話得雞碎咁多費事理。我真係奇怪,你又唔係錢多到洗唔晒,因為錢唔多就唔理? 呢d係咩理論? 就係應該錢唔多,就更加要睇緊d, 時間流流長,累積起黎就唔少啦!

我今日睇返自己強迫金個戶口,原來累積既金額,已經達到我現有資產既一半,當然,有咁既成績,我公司既額外供款都有支持。如果問我做過咩,就係我係大市唔好既時候,將保本轉做港股同A股既市場,跟住就累積到今日。其實簡單既操控,可能未必跟得貼大市,但長線都會跟到大方向。適時作出操控,將會提高長遠既回報,總算可以安慰自己係不幸中之大幸lor。

2014年8月5日 星期二

個人既負債比率

岩岩再問朋友借入十萬蚊,計返依家未還既貸款,大約係我既7個半月人工左右。如果將未還貸款同我既資產黎計,我個人既負債比率大約15%。

現階段財務狀況相當健康,有機會既話,唔排除將負債比率提升至30%左右,以提高槓桿比例。

當然,要考慮過風險既問題,先再決定下一步點做。

2014年8月4日 星期一

不借不借還是借

岩岩睇止凡兄既blog, 講開借錢投資既問題,自己之前都有咁既煩惱。

早排提過銀行打黎撩借錢,借廿萬,分三年還,月平息0.18%,計返4厘多d, 比我之前借既貴。思前想後,又睇到另一個blogger借貸既息率比我既平,同銀行搓左兩板都冇得平,最終都無問銀行借。

不過咁,唔係等於我放棄。其實之前一直有一個諗法,就係問我個老死借。我呢個老死, 算係專業人士,人工高我d,不過有增長空間。平時都知佢儲到個錢,之前傾開,先知佢d錢唔多投資,只係之前用小部份買左d滙豐,其餘都係擺o係度,有問過佢點解唔再投資,佢就答我無時間睇,跟住同佢傾過投資既野,不過到近來佢都冇再做新既投資。既然佢d錢都o係擺,我就同佢傾不如借我,我計返上次銀行做俾我既息率俾佢,最尾傾過, 因為佢有考慮下年求婚,想留個錢旁身,只係借左十萬俾我,年利率3.3,一年後先本利歸還。

坦白講,雖然貸款金額少左,同時借既年期短左,但利率又平返,而且了係一年後先一次過還,又比銀行期期還彈性左,夠期如果老死唔等錢用。老死方面又好過擺o係銀行得雞碎咁多息,又唔慌我冇錢還,算係一家便宜兩家著。

夠期如果老死唔等錢用,到時會再借俾我,息率到時先再傾。

2014年8月1日 星期五

收到google寄黎既pin啦!!

尋晚同以前一齊training既同期食完飯, 返到屋企樓下, 信箱有封google寄黎既野, 終於收到 google 
adsense寄黎既pin。

要收到呢個pin, 要預估收益累積到有一百蚊先會寄黎, 雖然係一個小到無輪既數目, 不過都算值得記低。希望下次再收到google寄黎既野, 會係一張支票啦!

其實好耐以前, 自己都有打yahoo blog, 不過打左無耐就荒廢左。不過今次打blog, 似乎比較有熱誠, 一黎依家對理財有相當既興趣, 二黎唔可以否認, google o係管理blog上面做得比較好, 再加埋blogger可以從自己既blog分享到收益(雖然好少), 但令我地呢d業餘blogger更加投入, google自己又有廣告收益, 真係winwin既情況。

可以想像, 現階段科網股入面, google係做得比較好,
相信前景亦都可以期待下。

2014年7月30日 星期三

買入3883中國奧園

今日以1.4入左60000股中國奧園, 投機性質, 見大股東最近用左8千幾萬增持, 平均價成1.5多d, 臨近中期業績,奧園(03883)首半年累計實現合同銷售升38%, 相信中期業績會唔錯, 博一博睇下有冇轉炒下。

2014年7月27日 星期日

借唔借好呢?

早兩日銀行又打電話黎, 話我張信用卡可以做個分期套現, 可以借到廿萬, 分三十六個月還,。月平息約0.18%。

我依家都15/16, 個心就想借, 因為睇返呢幾年既回報, 夠俾息之餘, 都會有一定進賬, 透過借貸來做個槓桿, 以提高現有既回報。但對於未來經濟環境, 始終有d戒心, 雖然承擔到借貸既風險, 但一不小心, 將會拖慢未來既進程。

不過, 個人既傾向都係選擇會借, 始終心目中係有幾隻想買既股票, 只不過所剩現金唔多, 做左借貸之後, 將會係岩價既時候, 再買心水既股票。


2014年7月25日 星期五

豐收月-第二浪

早幾日, 終於收埋第二浪既股息, 有五十幾k, 收埋呢次, 今年就再冇得收lu, 真係令人有d失落。不過重有五個月既時間, 話唔定會再買入某d股票, 再有被動收入都唔奇。

2014年7月23日 星期三

811 小突破

上一篇文章先分享過我呢隻股票, 我重o係文中講到呢隻股通常升得多d之後, 就會回返咁上下, 本來諗住呢個情況會維持多一段時間, 估唔到今日就黎個小突破, 一下子就衝過六蚊呢個關口, 真係令人有d意外。

事實上個人係相當睇好文軒, 希望不久將來可以黎個大突破, 達至兩位數字。

2014年7月19日 星期六

我的持股(1)

之前一路都冇講過自己所持既股票, 原因係覺得自己都未到同人分享既功力。 不過之前篇文章塘人兄問開, 既然人地唔介意, 我都分享下我既持股, 大家不妨俾下意見。

我手頭上得三隻股票, 不過比例上頭兩隻已經佔左大部份, 剩返o固隻係抽新股返黎, 得雞碎咁多, 不提也擺。


咁唔講第三隻, 就講o下第二份量既持股。


呢隻就係811新華文軒。我2011年開始, 幾年間買入左幾次, 計返平均價買入價3.6左右。


當初點解會買呢隻股?

當時覺得文軒業績穩定, 股息吸引。文軒係做文化產業, 而文化產業係國家重點之一,另外, 我認為文軒最大優點,係有印刷教科書。唔知大家有冇留意到有d新聞, 日本既教科書將釣魚臺列入日本領土放入教科書入面, 日本既教科書亦都修飾美化日本侵略既史實。國家要對民眾有更好既管治, 有咩好得過由細開始洗佢地腦, 我相信日本如是, 其他國家如是, 祖國亦都一樣。所以國家唔會隨便引入兢爭者, 就算有兢爭, 亦都需要經過精挑細選, 數目應該有限。o係咁既背景之下, 業績增長有限, 但同樣地波動唔大, 穩定性高, 息率又好, 安全性十足, 所以決定買入。


依家對呢隻股既睇法?
大致同以前既睇法差唔多, 不過又兩個比以前好既因素出現。第一係祖國放寬左一孩政策,當然文軒所屬地區未必第一時間得益, 但此為大方向, 相信遲早文軒都會受惠, 不過未必係好大既得益。第二, 係文軒排緊隊返A股, 之前望過下文軒希望透過發A股, 用籌集得黎既資金支付新發展, 將發行唔超過1億既新股, 而新項目總投資14億左右, 如果咁計發, 每股個價要成14蚊, 重要係人仔黎wow, 而且文軒對比其他同類A股個價都係偏低, 相信會有相當潛在既升幅。

不過未來大方向都係電子學習同埋電子書, 到底會對文軒有幾大影響都係未知數, 呢個係要留意既地方。另外, 呢隻野最近重上招股價, 每次升得多d之後, 都會回返一定價位, 可能係持貨者坐艇坐得太耐, 見收左咁多年息, 股價又上返水面所以減持, 唔排除呢個情況會繼續一段時間。

可能自己持有呢隻股票, 有所偏愛, 覺得可以長期持有。

2014年7月15日 星期二

豐收月-第一浪

今日百無聊賴既時候, 睇返自己戶口既結餘, 明明之前冇咩錢剩, 突然間又多左d既, 先醒起原來尋日係豐收月既第一擊。

睇返條數, 原來收左三萬三蚊息, 計返平均買入價, 有9厘幾, 而且現價比買入價高出唔少, 心理上相當良好。

如果股價繼續升既話, 到心目中既價, 會賣走一部份既股票, 換入另一隻, 透過升值, 換馬, 去提升股息收入既回報。

2014年7月14日 星期一

盡早養成前往財務自由既思維 (1)

如非有父蔭, 要達至財務自由, 當然越早開始越好。 最大原因, 係越長時間, 覆利效應就越厲害。
其實除左覆利效應之外, 及早養成前往財務自由既思維, 可能改變到你o係人生既某d選擇, 從而令你更早達成目標。

人生當中有幾個選擇, 好多人不奇然會做左, 而呢幾個選擇, 好有可能會影響左財務自由既進程。

第一樣就係搬出黎住。就算唔係100%, 應該都有99%既後生仔女, 搵到錢就有搬出黎住既念頭。我自己都後生過, 曾經都有咁既想法, 坦白講, 我同屋企人既關係都唔錯, 不過老媽子既嘮嘮叨叨,雖然知佢為我好, 但都覺得唔耐煩, 都想搬出去享受下無拘束既生活。如果有d年輕人同屋企關係麻麻地, 又或者居住環境唔多好好, 真係會有更大既衝動搬出去。不過咁, 搬出去除左租金之外, 重有水電媒零零碎碎既雜費, 重未計一日三餐wow。你俾屋企既家用, 一定冇你搬出去既洗費咁多。如果及早養成前往財務自由既思維, 可能會提升到你既容忍力, 繼續住o係屋企儲多個錢作投資。

第二樣就係........

2014年7月9日 星期三

政治氣氛影響選股

最近香港社會既氣氛變得越黎越唔好, 民粹主義亦越黎越強烈。o係呢個政治氣氛之下, 令某d人對投資有所卻步。我就未至於被影響唔去投資, 不過咁既氣氛下, 我就避免投資某d與民生太相關既股票, 特別係以下既公用股, 我諗我都會避免沾手。
第一係地鐵公司。
話就話地鐵公司係公用股, 其實佢係一隻地產股多心d。票務既收益同物業既收益比較起黎, 真係少得多。不過黎緊物業市道似乎見頂, 就算有升都唔會多, 而什麼沙中線等又超晒支, 票務收入應該最穩定既, 又可能o係咁既氣氛之下, 想加價都冇咁容易, 更甚可能補貼更多落去。以股東黎講, 更係賺得越多就越好, 不過未來地鐵應該就做唔到。
第二就係兩電。
兩電o係利潤管制保護之下, 年年有錢賺。 不過電費與民生息息相關, 未來唔會冇得賺, 不過一定冇以前咁易賺啦!
總之與民生相關太多既, 都盡量少掂為妙。


2014年7月3日 星期四

亂局-轉載

最近睇左篇文章, 我覺得幾有意思, 於是問過blog主轉載於此多謝blog主咁大方分享。

轉載自http://luan-invest.blogspot.hk/2014/07/blog-post.html?m=1


2014年7月2日星期三


亂局

正當香港人的焦點全都落在政改爭拗、佔領中環,內地打貪卻進入了另一階段,6月30日報道指中央軍委副主席徐才厚涉嫌受賄賣官,被開除黨籍並移交軍事法庭。政權穩定最重要是軍方權力,打貪打至解放軍第二把交椅的將領,實在是很高政治風險。

為 何我將內地打貪政治風險跟香港政治拉上關係?我只能說,看事情不要只看表面,很多市民為理想為公義,這點是無容置疑的,但政治鬥爭的背後,並不是簡單談理 想,而是背後勢力的角力,講的全是利益分配,如果有人感覺亂局中有神來之手,我可以肯定地說神來之手不只一隻,背後勢力究竟是什麼,相信不到事情的另一 邊,可能都不會知道。不過,亂可為一些外人有機可承,亂、推倒重來,可為一些人帶來翻身的機會! 香港的亂是否跟現時大陸的政治環境有關?跟美國圍堵中國有關?好難排除這些可能! 推倒重來之後,究竟由什麼背後勢力的代理人上台?

今天的香港仍然是全世界資訊最流通的地方,遊行集會最多的地方,有沒有人真正比較過香港和美國的資訊流通自由度?如果說我們將會失去,那個「將會」是幾時?香港真的差到要將擁有的幸福推倒,然後建立將來可能更好的制度?那個「將來」、「可能」會是更差又如何?

曾 經有朋友提過希望香港不會變成庫爾德族人,講起庫爾德族人,倒令我想起一段庫爾德族的歷史,早排在經濟日報的國金札記中講到,16世紀之時,庫爾德斯坦是 被奧斯曼帝國(即土耳其)及伊朗瓜分,第一次世界大戰結束後,土耳其國父凱末爾(Mustafa Kemal)政變成功,推翻奧斯曼政府之餘,更戰勝美英的協約國軍隊,與對方重簽和約,本來是庫爾德人立國或起碼得到更多自治權的機會,但反而將手上 控制的庫爾德斯坦地區再瓜分,西面劃歸敘利亞,南部由伊拉克接管,自己手握剩餘地方。這就是我想講的,政變之後,是否便一定「Happily ever after」?

今天的香港仍然可以有各種不同的聲音是一種幸福,就如我們一百個人一齊看畢加索的畫,相信一定會各自有不同的感受和看法,那 是因為我們都來自不同的家庭背景、不同的文化、學識。政治不會只有對和錯,全是講利益的,當人們一面倒的相同思想,那是危險的,這在希特勒年代,文化大革 命曾經出現,當我們仍然可以有自己的思想,自

2014年7月1日 星期二

7-1遊行之我感-幻想總是美好的

7-1既遊行, 已經變成一年一度既節目。參與既人有唔同既目的, 有表達自己既訴求, 有純粹宣洩自己既不滿, 有黎湊熱鬧, 有黎做政治show R支持R獻金, 總之就各有目的。而今年嗌得最多既, 應該都係爭取公民提名全民普選, 拒絕共產黨政權咁啦!

的而且確, 回歸後既政府, 係有好多地方做得唔好, 特別係上屆貪曾政府留低既蘇州屎, 係咁易都數到幾樣, 雙非問題, 強迫金問題, 高樓價問題, 自由行既問題等等。令到好多人都對政府失望, 再加上傳媒既渲染, 令佢地將所有問題歸咎共產黨政權, 亦令佢地更加憧憬民主政權會帶黎新景象, 社會走向好既方向, 所有問題得而解決。

然而, 事實上民主社會係咪可以解決所有問題?
依家香港好多年輕人都憧憬台灣既生活, 當然, 去旅行玩幾日, 梗係覺得當地生活好, 但背後既問題, 你地又知幾多? 當地經濟情況係點? 知唔知當地大學畢業生, 人工幾多? 民選總統一定解決得了貪污問題, 阿扁依家重受緊靶, 而法國前總統亦都卷入貪污調查之中。其他行緊民主既地方, 好似烏克蘭,泰國等政局混亂。歐洲某d國家就經濟不景氣。外國唔少政黨,為爭選票而實施討好選民,但長遠可能損害國家既政策。

其實政治一向都係黑暗, 無論o係邊種社會都係一樣。呢個就係現實黎。

香港係一片福地, 無嚴重既天災, 但願香港人會好好珍惜, 爭取自己認為應得之餘, 亦能夠保持社會穩定。


出到廣告啦!


之前申請過post廣告, 不過俾google reject左, 最近鐘終批左啦! 大家黎開就支持下。

我就唔期望廣告收益帶黎好多被動既收入, 只希望一年夠食餐飯咁啦!

2014年6月24日 星期二

六月蘇梅之旅


最近好似好耐冇update 到自己個blog,  除左懶之外, 最大原因係岩岩放左大假, 去左蘇梅玩幾日。

今次呢個旅程, 都係hea為主, 除左一日出島浮潛, 一日去玩飛索, 日日都瞓到咁上下先起身, 望住個海嘆早餐, 之後就揸車周圍去, 食下行下, 再唔係返酒店個泳池或者個private pool 浸下水晒下太陽, 寫意到暈。

今次旅程, 特登就岩老婆生日, 請佢去玩洗費全包當佢既生日禮物。雖然洗左唔少錢, 不過都唔肉赤, 一黎老婆開心, 而最重要係今個旅程, 全程都係洗左1/3既投資回報所得, 希望以後每年既旅行, 都可以由投資回報幫我出, 等我年年都可以去嘆返下。


2014年6月11日 星期三

投機失敗

之前投機買入既股票, 尋日已經賣左, 以輸10%左右收場。今次既經歷, 更加印證到自己係唔適合投機。 呢隻股票, 原本只係個三多d, 我就個四買, 尋日突然跌毫幾紙, 因為係投機, 所以一跌到十個%, 就決定止血。點知今日即刻升返成毫紙, 即刻噴血。 不過我又冇後悔, 因為自知係投機, 所以一到止蝕位就應該執行。而且因為係投機, 坦白講, 唔係幾安心, 自己冇能力預知今日會升返10%, 所以為求安心賣係應該既。

不過今次之後, 唔會再採取呢種投機既方法, 會採用其他令自己更安心既投資方法。

2014年6月7日 星期六

斷估香港未來樓市既表現

對於香港未來樓市既表現我會分返短中長線咁斷估。
短線既一年至三年, 我諗都係橫行居多, 當中應該會有小調整。
中線既三至五年, 樓市應該會拾級而下, 至中線尾段跌勢會加劇。
長線既五至8年, 樓市會跌到低點橫行一段時間, 之後漸漸有返起色。

點解會咁估?
香港依家既經濟環境, 開始由盛極而衰, 所謂物極必反, 未來經濟唔見得會好。 我一直都認為樓市同經濟環境係掛勾, 所以樓市未來好極有限。

自沙士之後, 香港經濟由自由行帶動下, 復甦得唔錯, 經濟環境亦越黎越好, 隨住經濟好轉, 人工預期會年年增加, 慢慢樓市開始有炒作既空間, 而且政府樓市政策失衡, 再加埋北水既推動, 更炒得火熱。

不過當樓市炒到幾百萬一層細到無論既樓都叫窮人欣物既時候, 市民怨氣越積越多, 政府終於都採取左所謂既辣招, 叫減少左炒家既參與, 叫做拖得就拖。

正因為拖字訣, 慢慢累積左一批有能力又有需要既買家, 除住投機者減少, 炒上既空間自然有限, 但經濟環境短期內亦未見會急促轉壞, o係長年買樓實升既思想下, 唔少業主都唔急賣樓, 可能間中有低水既單位, 但因為累積左唔少有能力又有需要住屋既買家, 所以有需求下議價空間唔會太大。

但自由行既光環已經減弱, 未來重有可能減少自由行 既數目, 零售業當然首當其衝, 但當中所帶黎既連鎖影響先係重點, 而且香港既政治氣氛又漸趨激烈, 除左令到政策議而不決, 亦都可能影響到外來既投資。經濟續漸轉壞, 樓市亦隨經濟慢慢跌落黎。
所以中期後段及長線初期, 當之前累積既購買力消化晒, 而經濟又唔好, 新既購買力有限, 本來想長線持有既屋主, 見樓價不停跌, 結果就沽埋一份, 做成樓市跌勢加劇。

之後樓市會跌到低點, 一片死寂, 直至到經濟有返起色, 可能係有新行業發展, 可能係鋪租回落返, 零售業慢慢做返起, 可能係其他原因。

當然, 估既野, 同現實可能好大出入, 幾年後就知自己估中幾多。

2014年6月2日 星期一

難得的銀行C -轉載

自己都持有一隻內銀股, 重要重倉o固隻, 一直以黎都覺得一隻業績年年有雙位數增長, 派息又一年多過一年, 往績表現又相當穩定, 真係唔明白點解會長期低水。 D人成日講內銀既壞帳等問題, 講左N咁多年, 坦白講, 任何公司都有可能有問題, 我就唔信外國既公司完全清清白白。以下係轉載自止凡兄既一篇關於內銀股既文章, 當中講o固隻內銀股, 未必係我揸住o固隻, 不過我覺得大o固幾隻, 差距唔會大到離晒普, 文章內容我相當認同, 可能自己持有所以偏愛都唔奇, 但我都覺得值得分享下。

轉載自
http://cpleung826.blogspot.hk/2014/06/c.html?showComment=1401758756859&m=1#c3213895255142288691

有一家銀行,就叫它做銀行C吧,銀行本身已經是百業之母,拿借來的錢再借出去賺錢,是沒有存貨問題的生意。銀行C又是傳統銀行,不是玩弄財技或衍生工具的投資銀行。止凡發現銀行C擁有很難得的數字。



 最近一年賺超過2000億人民幣,銀行C一直以來都在賺錢,由2005年賺470億,多年來一直增長著,8年增加了4.5倍,即平均每年有20%的增長。今天銀行C的淨資產超過1萬億人民幣,這是否大銀行呢?匯控大約為1.1萬億人民幣,恒生大約為800億人民幣,花旗大約為1.2萬億人民幣,銀行C絕對是大銀行之列。銀行C在2005年時的淨資產大約為2800億,8年增加了3.6倍,即平均每年大約有17%的增長。

單看銀行C的盈利增長及淨資產的規模與增長,所有香港及國際級銀行都不能達到,近年人人都在看渣打及匯控的比較,又說多年來渣打的增長都比匯控好,因為渣打集中於新興市場,但今年的新興市場出事,令渣打的前景可能不及匯控。但說來說去,最多只是在說一些低雙位數字的增長,甚至是單位數字的增長而已,當出問題時,還會出現倒退。跟長時期的平均兩成增長的銀行C實在不同級數。 

銀行C的淨資產多年增長,盈利又多年增長,那麼股東回報率又怎樣呢?最近幾年這家銀行的平均股東回報率超過21%,大家可以看看匯控今年只有9%,還記得匯控換新主席及行政總裁時,曾經在2011年5月定下三年目標,希望在2014至2016年股東回報率能達12%-15%的範圍,就算能達這個目標範圍,比起銀行C的運用資本效率還差很遠。本地最優質的恒生銀行今年可以超過25%,有時又會跌到20%以下,從股東回報率來看,銀行C算是恒生銀行的質素,但規模則大很多。

成本對收入比率少於30%,即銀行C要賺1元回來,背後都不用花掉3毛的成本。還記得在2011年寫過一篇有關「內銀股毛利率」,當時放到討論區之後被人當了「論壇打手」,認為我是收錢寫稿唱好內銀的,回想都好好笑。發了這篇文章之後,更有留言話我不懂分析,在討論區班門弄斧,因為他們認為分析銀行股不會用毛利率這類概念。不過我則認為這是做生意的基礎,不論什麼生意也好,我都希望知道花多少成本去賺1元回來。有趣的是,不久之後的匯控新任主席及行政總裁上任,他們都非常重視成本率,可惜匯控都在賺1元花6毛的成本附近掙扎著,跟銀行C又是完全不同級數。

銀行C的淨息差有2.56%,這個數字比中銀及渣打都要高。大家都知道銀行是靠把借入的錢借出去賺錢,存款客的錢是要付出利息的,借錢出去就有利息收回,一來一回就可以計出淨息差是多少。控制好的話,這個息差大,總額又大,利潤自然大。但要留意的是,錢是沒有記認的貨物,大家做物業按揭都有經驗,選擇銀行時,最重要是低息,哪家銀行息口最低就到哪家借錢,很少考慮品牌等其他因素,這是十分正常的想法。所以要有技巧地把淨息差推高,即對存款客付低息,對借款客收高息,又能維持存款及借款的量,這是一點也不容易的銀行管理,淨息差就反應這一方面是否到家。

看到這裡,不錯嗎?這家銀行C安全與否呢?銀行C的規模都說過了,絕對是「大得不能倒」的級數,而它的資本充足率達14%,核心資本充足率逹10.75%,這又是什麼數字呢?大家還記得金融海潚之後出現了對銀行的壓力測試嗎?最近就有一則新聞「美國銀行業壓力測試:花旗不及格美銀高盛僥倖過關」,這個壓力測試對資本充足率的要求為何呢?是要在「極端負面條件」壓力環境下測試後資本充足率達不到5%的最低要求。我不知道金融海潚是否到達了「極端負面條件」,我只知道銀行C這個充足率比任何國際級銀行都要安全得多。

又有不少人話可能銀行C有壞帳問題,這個命題說了10年了,而這10年來,反映壞帳的數字一直在改善著,最近一年的不良貸款不足1%,2005年時是3.84%,如果說它還未上市時的話,可能就有10%、20%的不良貸款率也不足為奇,所以銀行C都是「洗白白」之後才放上市,之後還一直進步。還記得2012年有一則新聞,報導銀行C有30億貸款「凍過水」,壞帳潮恐一觸即發,這類新聞令不少日望夜望銀行C這類銀行出事的朋友飛跳起來,認為預期終於發生了。當時我打了幾個呵欠,30億?即代表當年貸款總額七萬多億的百分之0.04,即代表當年盈利1900億的百分之1.6。然而,當時大家都非常關注,股價亦跌了不少。 

我的習慣是分析基本面過後,最後才看股價相關的數字。銀行C的基本面幾方面都好,看來又是龐然大物,不可能便宜吧。市盈率及市帳率多少呢?匯控的市盈率及市帳率分別是13倍及1.1倍左右,恒生就大約9倍及2.3倍左右,渣打就大約14倍及1.2倍左右,看過以上的基本面,對銀行C都會有個感覺,其數字應該不可能比這三家銀行便宜吧,對不?事實是銀行C今天的市盈率及市帳率為5倍及1.1倍,能相信嗎?

一定有一點問題的,應該是銀行C拿到盈利之後都在玩弄財技,賺到的錢都不知道跑到什麼地方去,派息率都不可能高吧。今天匯控、渣打、恒生的的派息率為4.6厘、3.8厘、4.3厘,不錯吧?而銀行C的派息就近7厘,還每年有超過10%的增長,有時事情可以荒謬到你想像不到的程度。

如果大家對銀行的數字都有個感覺的話,自然對銀行C的水平有所定位。記得這裡有不少blog友都留言希望我對內銀股作一點分析,我就一直在拖延,又邀請blog友到巴黎兄、市場先生及飛鳥兄的blog處看看,今天覺得還是草草寫一篇我對內銀股的感覺,沒有excel的計算,就只是簡單數字拼湊成的感覺。以前不想寫,因為我真心覺得很難寫得好,很難好好地寫得出我對內銀股的感覺,不知道整篇不點出公司名字大家會不會看起來感覺強烈一點呢?不過大家心水清的話,看了兩行便知道銀行C是哪一家了。

還有一點,銀行C是國有的,中央的匯金其中一支收息的「大水喉」,還有借貸總額的兩成存款準備金放在中央銀行,這樣的投資,怕什麼?

2014年5月31日 星期六

富人既資產令到富者越富

富人越黎越有錢, 當然佢地富人既心態係好大既原因, 而另一個原因係佢地有相當既資產, 通常都會有一定數量既儲備, 可以o係經濟低迷金融海嘯既時候, 出手狂入貨, 擴大佢地既資產。

但對於資本有限既我地, 備用現金係一件相當奢侈既事。 同真正既富人比較起黎, 時間成本對我地黎講係貴好多。冇人知道幾時會係經濟瀟條既時候, 但富人既資產多到可以容許佢地冇止景去等待一個千載難逄既機會。但對於可能只有數十萬或百多萬既我地, 要將十幾廿萬做儲備現金, 冇止景咁等待, 當中既心理負擔係大好多, 試想眼看個股市樓市日日升, 你會幾後悔冇投入儲備既現金, 最尾可能影響左你既決定, o係一個唔岩既時間投入你既儲備, 得不償失。

有時唔係富人特別叻, 而係佢地既條件, 令佢地冇咁容易影響到佢地既決定, 所以作為有限資產既人, 係要諗下點減少自己犯錯既機會, 先有機會成為富人。

2014年5月24日 星期六

成功既投資, 但亦都係一個唔成功既經歷

尋日醒左瞓唔返, 睇返自己既投資紀錄, 原來我依家持有既兩隻主力股票, 係由09年同10年持有到依家, 期間亦有增持過幾次。如果以平均價計, 今年既回報率, 一隻就有6厘7, 另一隻就有成9厘4, 現價亦比買入既平均價高, 就咁睇回報都算唔錯, 可以算係一個成功既投資, 但其實呢次亦都係一個唔成功既經歷。

點解咁講, 其實都係馬後炮, o係買入呢兩隻股票既時候, 心目中都重有其他選擇, 都係認為長揸得過, 而事後孔明咁睇, 其他既選擇, 股價早早已有相當既升幅, 如果當時係做另一個決定, 買左另外既股票, o係有一定升幅既時候, 再換馬到依家手持既股票, 回報會好得多。

當然, 馬後炮係人都識講, 所以我都無後悔過當初既決定, 只係有d可惜姐。希望下次可以係一個成功既投資再加埋成功既經歷, 咁就真係perfect 啦!

2014年5月23日 星期五

投機買入

上個星期, 以投機既心態買入一隻股票, 目標係兩成既回報。曾經有7%既回報, 不過依家又得返1%多d。 講得投機, 就唔係以平時作長線投資咁選股, 但正因為唔係用平時既選股方法, 知道自己只係投機, 所以心理上既負擔比作長線投資大。平時作長線投資, 講完全唔留意股價既變動就假既, 始終股價既升跌都反映係賬面上, 升得多同跌得多都會有d開心同失落既, 但始終知道係長線投資, 短線既波動對心理既負擔真係唔算大。但今次清楚自己係投機, 都幾留意股價既波動, 變相俾多左心理負擔自己, 正正自知自己對投機會有更大既心理包袱, 所以只係投入少量既資金玩玩就算。

2014年5月13日 星期二

長線投資初期的迷思(i)

最近睇止凡兄既blog, 有blog友留言討論一個問題,就是他作股票投資起步大約一年多了,但好像成績不算理想,語意間有點心灰,止凡兄也作了回應。 詳情可見http://cpleung826.blogspot.hk/2014/05/blog-post_6.html?m=1
其實我自己都好明白長線投資初期既迷惑。
以下係我作長線投資既初期所遇到既問題, 第一就係對自己選股冇信心。
長線投資既初期, 財務知識同埋經歷上相對地缺乏, 對於自己既選股冇足夠既信心。
有時就算揀岩股票,。明明自己想持有一段咁長既時間, 但因為有段時間股價唔郁又或者挨價, 最終影響左自己既決定, o係一個唔適當既時候賣左佢, 導致應有既回報付之東流, 做成回報未達理想既原因之一。
又因為唔夠信心, 明明心中有一個投資既數目, 但最終所投入既資金只達數目預算既少量, 當然, 好彩股價跌就輸少d, 但真係買岩股, 正因為投入少, 相對回報亦少。
其實講到尾, 因為冇信心, 所以影響左自己既決定, 從而影響左投資既回報, 令到自己有種長線投資回報不佳既感覺, 對長線投資起左一定既疑惑。

2014年5月4日 星期日

健康就是財富

D人成日話, 人過左三張野, 身體會比以前差好多, 以前我都唔太理既, 不過呢一年, 身體狀況的確冇做o靚仔既時候咁好, 成日瞓唔好又見攰, 一攰又懶唔去運動, 惡性巡還身體又更加唔精神。為左改善身體狀況, o尋日終於去買左枝養命酒, 試下飲一排睇下會唔會好瞓d, 再加埋keep住運動, 希望身體會好返d。其實任你搵幾多錢都好, 身體唔好都係得物冇所用, 當然唔可以冇錢, 但係錢係搵唔晒既, 能夠控制到自己既物慾, 唔使去追求冇盡既財產, 好好保重身體, 先係皇道。

2014年4月27日 星期日

一個資深員工給我的感覺

我公司有個做左相當耐既員工, 為人都無咩點既, 都算好相處既。不過對於佢有一樣野, 就真係有o的不敢恭維啦! 平時佢既日常洗費, 樣樣野都要平, 重要係計到盡o固種, 其實我唔反對節儉, 因為節儉係累積財富既第一步, 所以後生仔女, 平時如果可以控制下物慾, 儲多個錢, 錢滾錢累積一定財富先再追求quality of life。但我呢個同事, 已經有相當年資, 人工唔算好高, 但勝在穩穩定定, 理應可以對生活有少少追求, 如果理財得好dd, 少少quality完全唔係問題。 但見佢活左咁耐, 都只係追求平, 追求拎著數, 咁既人生, 我真係覺得差咁d野。

2014年4月24日 星期四

出血月

四月終於就黎完啦! 呢個月真係洗左唔少錢, 老婆d屋企人話買錶有折, 就洗左千幾蚊買左兩隻, 又用左幾舊水買左枝白酒同氣酒, 同依家同之前既同事食左兩餐飯, 買左部紅米俾老豆做下孝順仔, 平時同老婆日常開支, 假期同佢出去飲飲食食, 行街買野, 岩岩重訂埋六月去旅行既機票酒店, 真係大出血。 呢個四月, 比平時洗多左唔少, 當然有d係應該洗既, 例如買下換季衣服, 平時既日常開支, 去旅行搵間正d既酒店獎勵下自己, 呢d我覺得洗得ok既, 但有部份係自己豪氣左, 好似食飯食貴左, 買多左平常唔會買既無謂野等等。 點解個心態會鬆懈左, 可能係因為今年既回報相當唔錯, 所以洗多左。本來之前都set個limit俾自己, 就係只可以用今年bonus既1/3, 如果照之前既洗法, 一定超標, 黎緊都係要好好節制自己, 希望標準內完成。

2014年4月19日 星期六

買樓收租既悲慘經歷- 真人真事篇

唔少人都有買樓收租作投資, 能夠搵到個好租客, 當然係好事啦! 不過, 亦都要有遇到惡運既心理準備。 以下係一個真人真事, 好在唔係發生o係我認識既人身上。

話說有業主租左俾個單身客, 一直都準時交租, 不過近幾個月已經拖租冇交到, 原本承諾過幾日交, 點知過左幾日都冇收到, 業主於是上門追, 點知去到門口已經聞到味, 之後報警消防爆左門, 發現租客已經死左幾日, 發臭晒出晒屍水, 業主見到咁既情況都面如死灰。我都鄧個業主心痛, 遇到咁既情況, 樓價最少打個7折, 市好都有機會甩身, 市唔好都要焗供揹上身, 放租又未必有人租, 有都要俾折, 自住又有心理陰影, 重要重新起個地板攪攪個單位。

所以投資既野, 有時真係未必如心中所想咁順利, 有d野真係人算不如天算, 邊有人估到六合彩唔見自己中, 衰野就中到正喎!

2014年4月13日 星期日

能夠成功捱過一次既經濟瀟條才算一個真正成功既投資者

我自2007年開始, 先接觸股票, 其間經歷過09年既金融海嘯, 當時恆生指數由三萬二點, 跌到萬幾點, 跌幅都幾嚇人,  而樓市o係當時亦都有一定既回調。呢次絕對係一個相當好既經驗。但我認為, 就算經歷過09年呢一跌, 都唔算係經歷過一次經濟瀟條既跌市。

諗返當時既經濟環境, 其實唔係想像中咁差。金融行業的確冇以前咁好景, 但唔少行業, 都係照加人工, 只不過幅度冇之前咁高, 凍薪都唔多覺有, 更唔見有減人工出現。 對我黎講, 97年同03年先算係真正既經濟不景氣。不過97既時候, 我重係學生, 坦白講, 感受唔太深, 或者其實當時都未算太不景氣。真正令我感受到經濟不景氣, 係03年我岩岩出黎做野既時候。當時叫搵到份工, 第一年已經凍薪, 之後連續兩年都減人工, 印象中連公務員第一次減人工, 都係o固個時候。市面一池死水, 當時我冇留意到股市, 但樓市一定衰到貼地。 之後有自由行等等因素, 慢慢帶動返個大圍經濟。

依家唔少人都有唔錯既回報, 我都認同佢地好叻, 但如果佢地係未經歷過之前既經濟不景氣, 佢地都未係我心目中成功既投資者。

例如依家唔少人加按層樓再投資買多間, 首先表明我既立場, 我係唔反對有關做法, 透過借貸來增加回報我係完全接受到既, 但如果o係經濟不景氣既時候, 你老人家好彩既就凍薪, 唔好彩既俾人減人工, 再衰d既工都冇埋, 本來d樓有租客幫你供都頂得住, 點知租客同你既處境差唔多, 最尾諗清楚都係返去同屋企人住, 離你而去。可能你會話邊有咁岩呀! 不過o係經濟不景氣既時間, 沒有最閪, 只有更閪。

所以能夠經歷過一腐經濟瀟條既跌市, 無被大浪覆蓋既投資方先係我心目中成功既投資者。君不見曾經俾吹捧到天上既羅兆輝下場如何?

2014年4月11日 星期五

食唔到滬港股市互聯互通呢條水

呢兩日, 唔少h股股價比a股股價有大折讓既股票, 都炒高左。 雖然到今日, 唔少炒高左既股票都回落返唔少, 不過比之前都有一定既升幅。之但係小弟既股票, 冇即時因為呢個消息受惠到, 隻內銀股價呢兩日都係咁上下, 而另一隻股本身都冇發行a股, 又點會食到條水。 雖然短期冇因為呢個消息獲益, 但相信長遠都係一個好消息黎既。

不過又一次証明, 我對於呢d消息既觸角真係等於冇咁濟, 見到有d Blogger一知道呢個消息就當機立段, 搵出大折讓既股票, 短短既時間就已經捕捉到20+%回報, 真係相當勵害。 反之自己到夜晚睇新聞先知有咁既消息, 但就算俾我同其他blogger同一時間知道呢個消息, 我都未必識去搵呢d大折讓股, 可見自己既觸角同能力都未入流, 想偶爾透過投機去增加投資既資本 短期內都唔可行架啦,暫時疊埋心水慢慢儲優質資產算啦!

2014年4月5日 星期六

四月起, 每個月都多五千蚊洗!!

正如標題所講, 今個月開始, 個個月都多五千幾蚊洗, 原因係有條片終於o係三月找晒啦! 截至2014年3月, 我總共欠銀行四條數, 還清一條, 重有三條要還, 年底前會還完多一條數, 咁就會相當輕鬆啦! 因為呢兩條數佔我既負債2/3。

總結返岩岩呢條數既經驗:
先講得著,
1) 雖然呢筆錢用黎買入心目中既股票唔係最低位, 但都算一個ok既價錢, 收左唔少息之餘, 又賺到少少價, 計返之前買既價錢, 息率算唔錯。資產亦因此狀大唔少。
2) 因為個個月要還呢五千幾銀, 變相迫自己洗少d, 其實變相係儲多左錢。
之後就係檢討
1) 最需要改善既就係呢條數既息率, 比起其他數, 唔算最平, 下次可以再做平d先再考慮。
2) 如果息率夠平, 可以考慮再借長少少時間, 咁每個月可以再輕鬆d。

黎緊每個月多左錢洗, 暫時應該都會儲起佢先, 因為現金已經得返好少, 如果股價大跌冇咩資金可以再入。

2014年3月31日 星期一

內銀股~熱刺媽

自從內銀股出左唔錯既業績, 派息增加, 除左平時有講開內銀既blogger之外, 我發覺多左報章, 評論講內銀既價值, 由以前淨係講內銀唔好既方面, 如壞帳比率等, 到依家講多左內銀既好處, 如高息率咁。 開始多左人留意到內銀既價值。 坦白講, 我就唔想咁多人留意內銀股, 越多人留意, 等於我更加難搵到機會再買入。 好在我都儲埋一定數量既內銀股, 股價升, 賬面富貴左, 都有少少開心既。不過如果股價升到有一定程度, 唔排除賣出部份換其他股。
內銀股, 熱刺媽!!!

2014年3月30日 星期日

內銀比拼 (轉載)

轉載自http://blogcity.me/blog/reply_blog_express.asp?f=5YTPBH5B812303&id=625567&catID=&keyword=&searchtype=

2014/3/31 上午 09:24:51
網誌分類: 經濟
昨日報紙專欄行文時建行(939)股價及相關新聞 業績未出,三缺一有少少遺憾,補白幾句。

建行公佈去年純利增長11.12%2,146.6億元人民幣,係預期上限,建行每股盈利升11.7%0.86元,宣布派末期息每股0.3元,較去年增11.9%,派息比率維持約35%不變,以上周五收市價計,建行股息率6.99厘。

將工、建、農、中四大銀行略一比較,盈利都有雙位增長,當中農行(1288)升14.6%最多。以資本水平計,建行核心一級資本水平達10.75%,為內銀之冠,工行(1398)則以10.57%排第二,由於資本不足會影響貸款出街,相信建行、工行貸款空間會較其他銀行大。而中行(3988)的核心一級資本係9.69%,農行核心資本一級資本只有9.25%,農行被市場認為最有急切需求發行優先股補充資本,但發優先股不用在股市上集資,只會攤薄每股盈利,較易為市場接受。

以業務前景看,內銀仍以傳統食存貸息差為主要業務,建行去年底淨息差雖然按季擴闊3點子至2.74厘,但按年微跌1點子:以淨息差表現比較,中行按年擴闊9點子表現最佳,走勢最佳,中行行長陳四清更表示,今年中行淨息差走勢會跑贏同業,主因該行有較多海外業務,利差趨勢向上,有利中行的淨息差表現。

另外以派息計,中行亦佔先啦,以現價計佢派息等如7.22厘,建行6.99厘,工行6.92厘,農行6.59厘,反映中行股價較低,收息中行最正。

恭賀本blog瀏覽紀錄突破1000大關


自從開blog以黎, 呢個blog既流量都係偏低, 所以難得突破千人大關, 梗係要紀錄一下啦! 希望遲下能夠越黎越旺場啦!

之前一直同google申請擺廣告, 一直俾人reject, 話內容不足wow, 希望快d通過, 反正都會keep住打blog, 賺返餐飯食下都唔錯。

2014年3月28日 星期五

眼紅人之前, 唔該睇睇人地既付出先啦!!

除左堅係老死既朋友, 對住d半生熟既人, 我唔會講我股息回報既野。 第一係因為依家既回報根本未去到值得對人炫耀既地步。 第二個原因, 亦係最重要既原因, 就係依家唔少香港人, 都只會眼紅人地既成果, 而冇睇到人地既付出。 如果俾d半生熟既知道我股息既回報, 佢地只會覺得自己咁辛苦做野, 都冇咁好既回報, 只會眼紅你on99就有息收。 但係佢地唔會諗下人地點解可以做到? 坦白講, 如果唔係有父蔭, 含住鎖匙出世, 要做到有一定既回報, 人地背後係付出左唔少, 用唔少時間心機去累積資產, 再用資產生資產, 當中需要相當既耐性同決心, 例如當其他人將部電話由note1換到note7既時候, 人地就將換電話既錢買入資產等生資產。 人地花時間定期檢討自己資產組合既時候, 只係掛住換電話班碌9就花時間係玩skout溝迷之少女。 當人地奉行簡單生活模式, 唔少港人就奉行有錢唔洗身痕模式。 呢d種種人地背後所做, 佢地永遠唔會去睇, 但就只會眼紅人地, 唔少香港人依家就係咁。

2014年3月26日 星期三

芒格的投資語錄(二)轉載

轉載自止凡兄既blog( http://cpleung826.blogspot.hk/2014/03/blog-post_11.html)

再來芒格的投資語錄,依舊一樣,逐條好好細閱,再加入止凡的一點意見,希望大家更能吸收。


11. 人們算得太多、想得太少。

止凡:很多投資者都很注重技術分析或計算的精準,每每利用不少計算表來幫助,將不同時候的回報都計算得非常精確,然而在現實世界,又有多少結果符合預期呢?好像有不少人都會考慮向銀行借入稅貸之類,再放到人民幣做定期存款,從中賺取息差。這樣的操作,借入4厘,人民幣利息3厘,還有升值可能,應該不會賠吧。這就是算得太多的例子,應該想多一點,只是這一刻有著數,他日人民幣一定升值嗎?息口會定點嗎?有股災及樓災時,自己的借貸水平還可以嗎?想多一點,粗略想想安全邊際,可能決定都不再一樣。


12. 無論何時,如果你覺得有東西在摧毀你的生活,那個東西就是你自己。老覺得自己是受害者的想法是最削弱自己的利器。

止凡:自己的生活是要自己去爭取的,但大部份人總給自己借口,認為自己的生活不似預期,總是因為別人。其實對人埋怨,認為自己是受害者,對改善自己生活亦沒有多大幫助,這只是埋沒了給自己改進的機會。為何在錯誤時都指著別人而不檢討自己,錯過自己好好面對錯誤的機會呢?


13. 稅法決定了,還是買個偉大公司傻等它飛起來最划算。

止凡:無論稅法怎樣去定,都不會對偉大公司有損害,因為偉大公司會跟著稅法去調整他們的商業策略,根本不需要為稅法不停的變化而操心。不停去按稅法變化而找有稅務優惠的公司,芒格用經歷告訴了大家,這是不需要的。


14. 如果你買的股票每年複利回報15%,持續30年,而你最後一次性賣掉的時候交35%的稅,那你的年回報還有13.3%。反之,對於同一支股票,如果你每年都賣一次交一次稅,那你的年回報就只有9.75%。這個3.5%的差距放大到30年是讓人大開眼界的。

止凡:這是巴菲特都經常說的問題,香港沒有股票增值稅,亦沒有股息稅,但概念還是要注意的。這個數字的重點是拿了應交的稅款保留在投資本金上,形成了「滾動」回報的一部份,芒格所提到的這個計算差別,正是來自這個地方。


15. 最重要的,是要把股票看作對於企業的一小片所有權,以企業的競爭優勢來判斷內在的價值。要尋找未來折現的現金利潤比你支付的股價高的機會。這是很基礎的,你得明白概率,只有當你贏的概率更大的時候才去下賭注。

止凡:這個投資語錄其實有兩大重點,第一是買賣股票時應該看待成買入企業的一部份,是在夾錢做生意,其實這是股票這東西的本質,只不過太多金融高手把這個概念都改變了,令大家都忘記了這個基本。第二是概率問題,概率大的時候就是你付出的價格比你得到的價值大,你的贏面就大,這也是常識,太多人懂說,但太少人會做。


16. 人們破產的常見原因是不能控制心理上的糾結。你花了這麼多心血、這麼多金錢,花的越多,就越容易這麼想:「估計快成了,再多花一點兒,就能成了……」人們就是這麼破產的----因為他們不肯停下來想想:「之前投入的就算沒了唄,我承受得起,我還可以重新振作。我不需要為這件事情沉迷不誤,這可能會毀了我的。」

止凡:把賠掉的部份計算在內,成為未來決定的一部份,這種情意結是很多人的習慣。不需要說到破產的程度,單是買入股票後股價下跌,然後就算發現股票變質亦捨不得沽出,因為沽出就變相承認及確認了虧損,但說到底,你的買入價對支股票的價值其實沒有意義,這只是情意結,理性一點思考就會明白。


17. 說到我這輩子在生意中見過的錯誤,過度追求避稅是一個常見的讓人做傻事兒的原因。我看到有人為了避稅幹很大的錯事。巴菲特和我雖然不是挖石油的,但是我們該交的稅都交,我們現在也過得挺好的。要是有人向你兜售避稅套餐,別買。

止凡:芒格在說的避稅問題可能有兩個層面,第一個是非法的,這一定是在做傻事兒,為了賺更多錢而做犯法的事,從來都不應被考慮的。另一個層面是合法的避稅,如果透過一些財技及與會計師的合作而成功合法地省下稅款,這我倒覺得沒太大問題。不過,不要拿避稅作為目標,把事情都以稅為本,犠牲賺錢的好機會,這就有點本未倒置了。


18. 我認為我們(美國)正處於或者接近我們文明的頂點……如果50或者100年後,我們(美國)只比得上亞洲某國家的的三分之一,我一點兒也不會覺得奇怪。如果要賭,這世界上將來幹得最棒的應該是亞洲。

止凡:這是十分合理的推測,美國在短短二百多年冒起得很快,現在是全球最發達的城市,要再進步一點實在沒有從前般容易。反觀其他國家邊抄邊學,進步亦能非常神速。


19. 某些程度上,股票就像是倫勃朗的畫。它們的價格基於過去成交的價格。債券要理性得多。沒有人會認為債券的價格會高到天上去。想像一下如果美國的所有退休基金都去買倫勃朗的油畫,它們都會升值並且引來一幫追隨者。

止凡:本來股票就是買入公司的一部份,是集資做生意的概念,但一旦股票掛牌,其價格多少受供求規則所影響。股價高不一定代表有價值,股價低亦不一定代表沒有價值,股價在短時間內只是在反映供求。


20. 有人認為阿根廷和日本發生的事情在咱們這裏(美國)絕對不會發生,這種想法是很瘋狂的。

止凡:阿根廷破產,日本經濟迷失二三十年,並債務纏身,今天的日本是全球最高債務比例的國家,與GDP比例超過兩倍。美國為何不會發生像阿根廷及日本的事情呢?今天的美國理財態度,誰能保証。


認真細心看,再認真加入注釋,這樣十分入腦,更有另一番體會,這樣回顧芒格的投資語錄十分不錯。另外,終於開始嘗試利用標籤這個功能,多謝「90後投資記」的Ricky建議。

Birthday Gift

Birthday Gift

今年生日, 除左收到老婆送既生旦糕同kswiss風褸,我有份做亞米巴股東既股票o係同一日公佈左份大禮賀一賀我, 股息比上年派多左一成有多, 計埋人仔升值(雖然最近跌返d), 真係幾和味。 咁今年既bonus, 應該有三個月人工有多, 可以用一個月人工既bonus當生日禮物, 去過旅行獎勵下自己都唔太過份啦!!!剩返既就做住儲備先,岩價就再投資。 距離月薪1/3既目標又近左d啦!

Happy Birthday to me!!!

Happy Birthday to me

今日係小弟牛一, 唔經唔覺, 已經三十有二, 中佬一名。生日梗係要許願, 以前總係許埋d好虛無既願望, 都係中六合彩金多寶之類。 今年都照舊許埋呢d願, 不過另外加多個實際少少既願望, 就係要o係四張野或之前, 將現有資產返多一倍半, 將每月既被動收入增加至最少有月薪既1/3, 最理想係做到月薪既一半, 所以直至做到之前, 四十歲之前我每年既願望都係呢個願望加埋中金多寶。

2014年3月23日 星期日

老友一聚有感

最近, 同個老死食飯, 平時佢對食都冇咩特別要求, 所以都係志在見下面吹下水, 不過當日佢少有地話要食好d, 於是搵左間日式小店慢食。 原來老死加人工同出左三個月花紅, 所以想豪一豪佢。 老死從事會計行業, 雖然唔係四大, 但平時既工作量同壓力, 都比我多唔少, peak season冇償加班就更加走唔甩, 當然工作前景會比我好既。 但係原來咁努力工作, 所得既花紅, 都係同我自制既花紅差唔多,  令我更加明白到好好管理自己既資產, 可以帶黎就算唔工作都同努力工作有相近回報既重要性。

2014年3月17日 星期一

被寵壞的內銀 (轉載) + 個人想法


大半年前曾經寫過〈買內銀股的悲哀〉,今日再寫,同樣是懷着恨鐵不成鋼的心態。更甚的是,眼見中國銀行業不思進取的精神,昔日過慣無風無浪的日子,但在網絡熱潮的衝擊下,自己拒絕改變,卻阻擋別人沾手。內銀股就算目前平到離譜,買了一樣嘥氣。

內銀股目前估值跌到2008年海嘯及2011年的新低水平。平嘢可能唔係好嘢,但平嘢加埋高息,一般衰極有限,但內銀經驗告訴大家,平嘢加「息」誘,視覺效果一流,股價卻是九流,一季差唔多,一半已經輸了上市以來派息總額。

四大內銀今年累跌13%至18%,招行(3968)及上市不足三個月的光大銀行(6818)股價年內瀉24%及27%,A股甚至較H股折讓5%至10%。彭博綜合券商預測,12間內銀今年預測市盈率(PE)只有3倍至5倍,市賬率(PB)0.6倍至0.8倍,股息率最高8厘,最少也有4厘。

4倍低PE、0.8倍低PB、8厘高息率,從估值角度衡量,買內銀實在是冇得輸,但今年股價樣衰如此,卻反映出鐵一般的現實,內銀隱藏多個炸彈,包括數以萬億計的影子銀行壞資產、類似雷曼式的理財產品及本業受到網絡金融的挑戰。截至周四止,12間內銀表現最好的,是肯變的中信銀行(998),原因埋堆夥拍騰訊及阿里,推出虛擬信用卡,企圖殺出重圍。

一隻股票不會長時間地偏低、一個板塊亦不會不合理地被低估,一日內銀仍未斷奶要阿爺救,買來收息隨時等收皮。

股榮

部份節錄:

來源:http://s.nextmedia.com/apple/a.php?i=20140316&sec_id=15307&s=0&a=18657809

*****

後記:

味皇之前有一篇文章也是叫大家不要買內銀,

http://realblog.zkiz.com/lgaim/92183

每個投資者都有自己的看法,

是對是錯瘋子也沒有能力判斷,

經過上次投資中國人壽(2628)的經驗,

瘋子唯一可以做的是內銀持股佔整個組合不超過 20%,

自己是用持股比率控制風險,

理念大致如以下分配:

內險 20% + 內銀 20% + 公用股 20% + ETF 20% + REITs 10% + 其他 10%

瘋子的投資經驗大約只有6年,自己的方法不敢說最好,

這是瘋子個人的投資想法,投資時請大家獨立思考。

*******************************************
個人睇法:

其實股榮所講既不無道理, 例如銀行壞資產、類似雷曼式的理財產品及本業受到網絡金融的挑戰, 而且佢亦都講出左銀既要點, 就係未斷奶要阿爺餵。 不過, 在我看來, 呢d都唔算係太壞既消息。

銀行壞帳方面, 幾年前已經講到依家, 係咪真係差得咁交關? 理財產品方面, 唔好話中國既銀行, 歐美銀行都係咁賣緊, 不過可能歐債危機後低調左既。 網絡金融方面, 可能較低信用既借貸都流向呢方面, 變相剩返o係內銀既都係咁好信用。而最重要o固點, 就係內銀未戒奶, 有咩頭暈身慶, 都有阿爺照住。如果真係咁唔好彩, 內銀好似歐債咁爆煲, 唔好諗住冇買內銀就可以獨善其身, o固時歐債危機, 都唔只金融股跌, 其他股票都跟住跌。

不過因為我持有一定既內銀股, 可能有所偏愛都唔定, 希望最終真係可以收成正果。

轉載 http://ffmadman.blogspot.hk/2014/03/blog-post_15.html?m=1

2014年3月13日 星期四

最近部署

最近個市好似跌極都未完咁, 唔少股票都跌到落心水既價錢, 不過因為之前既期權失誤, 令我入多左貨, 剩返少量資金, 其實依家心目中想買既股票, 同我之前入多左貨既時間比較, 都未有跌超過10%, 所以都係忍忍手, 俾d耐性等再低位先用最後既資金。

另外, 之前問銀行借既其中一筆資金已經供完, 未來每月會多二千幾蚊既現金流, 會盡量儲起佢, 心水股票到價就可以再入貨。

最後, 都係放棄問朋友借錢等機會投資既計劃, 本來想以銀行既息率問朋友借, 諗住益銀行, 不如俾朋友賺好過啦! 而且呢個朋友平時d錢都係就咁擺o係銀行, 所以都好樂意。 再者, 現階段雖然仍供緊另一筆資金, 再借會擴大負債, 但係能力上絕對負擔得到, 唔會有太大壓力。 不過諗清楚之後, 都係決定唔咁做, 因為經過上次期權失誤一役, 深感自己操控資金方面仍有相當既不足, 都係再累積多d經驗, 先擴大槓桿既比率。

2014年3月10日 星期一

公報第一期花紅

第一期既花紅, 終於o係o尋晚公報左, 明明話7號公報, 等到我頸都長埋。 初步業績同上年差唔多, 派息同上年一樣, 坦白講有少少失望, 用今日既匯率計返, 都有1.23個月人工, 當出個雙糧。月尾應該會公報埋第二期既花紅, 到時就知今年出唔出到三個月人工啦啦啦!

2014年3月8日 星期六

有關股息的誤區(轉載)

一直都唔知點同人解釋除淨既問題, 不過味兄篇舊文就解釋左一切, 轉載自味兄既blog。

當有人買了股票話想收息時,很快會有人走出來說:"聖光呀!你看見這個跌幅嗎?","我收前也收過息,但不合我口味,痛苦太多收獲太少","天呀!這個息率是假的!我早該料到的",係香討度班NPC平時講唔少
一般他們最主要的論點是股價除淨,股息由股價度扣返,所謂物輕情義重,千里派條毛,假設派息為5,股價100,孽息率就是5厘,當除淨後股價跌至95,結果蝕手續費
但這裡有一個誤區,就是沒有考慮時間值,根據他們的說法股價跌至95,但下年派息依然是5,那麼下年的孽息率就升至5.26%,後年股價跌至90,孽息率就升至5.56%,於是N年後股價跌大半,孽息率會攀升至120%以上,以為是戶愚呂嗎?如果這理論套在老母身上,就是說生完仔之後老母會輕左,所以每年生一個就會骨包皮的意思
派息扣除的是"上年賺的",除淨扣除的算是一年下來股東的寄賬,下年賺的會在下年先扣除,以盈利5計算,在此之前股票的價值會以每日5/365的數量升值,到下年除淨前一刻,會重新回到100的股價,到時依然是派5厘

2014年3月7日 星期五

財務自由也不是輕鬆容易(轉載)

財務自由也不是輕鬆容易

從另一角度理解,如果我們把「富有」看為一種自給自足的生活方式,也就是當我們的淨資產所產生的各項收入足以支付我們的生活費用,而我們也不再需要依賴工作收入生活,那我們不就是到了退休、「財務自由」的時候,能做個財務優游人了嗎?這樣的定義,每個人的目標也各不相同。

對於「財務自由」這個目標,與人們對財富的看法有一點差異。做到「財務自由」,並不等於擁有巨大財富。例如一個每月拿8,000元政府長俸的退休公務員,住公屋,每月生活開支7,000元左右,手上可能有20多萬儲蓄。在大家眼中,他不算富有,但他做到了「財務自由」。所以「財務自由」人人有機會做到,但成為巨富卻不是每人能及。

當然,要做到「財務自由」也不是輕鬆容易。人們常誤解高收入人士就容易達到目標:其實我們還需要考慮另一重要因素──消費開支。例如一個年薪百萬,但其中90萬用於消費的人;與一位年薪50萬,年儲蓄最少25萬的人士,誰可更快累積財富?高儲蓄人士定能更快達到目標,自然不言而喻。節儉的生活正是財富累積的基石。這個理念好像與現今整個社會所推崇的高消費模式有點相違背,但這正是許多財務自由人士的經驗之談。

有了明確的理財目標後,從哪些方面入手進行一個全面的財務策劃?如何根據個人目標,在平衡風險與回報之間,做出投資安排,以令資產增值?如何能達到「財務自由」的目標,而此目標與我們投資安排有何關係?

無可否認,退休人士的投資風險承受能力不高;因此像這位朋友一樣,把90%的資產放在現金或現金類別資產如定期存款等,而把剩下的10%資金投放到一些恒指期貨、港股短線炒作的投機活動中,預期賺取那所需的生活費。但大家有沒有想過用十萬,還是用一百萬作投資賺取五萬回報,哪一種更容易達到目標?一種是50%,另一種只要求5%回報。不要忘了,回報和風險是好兄弟,要求高回報自然要承受高風險,但高風險的投資可不一定帶來高回報。當然,我們這裏所說的5%回報,是指一個中長線的每年平均回報率。

所以說,大家都知道「刀仔鋸大樹」成功的機率不太高。就算一次成功,以後能確保第二、第三次,甚至每次都成功嗎?而我們所追求的,卻是各人的長線策略性目標年度回報。因此,為何不考慮像組織足球隊一樣,將自己的所有資產組合起來,再分配到不同的位置,為同一目的發揮不同作用:前鋒有股票類資產,為我們賺取利潤;中場有另類資產,起到進可攻、退可守的作用;而後衛則有現金和定息債券類別,發揮蓄水池的功能。當「前鋒」套現所得的利潤,可儲於蓄水池;但當「前鋒」失利時,我們有「彈藥」出擊,購買優質、價廉的資產。整個「隊伍」就能真正做到在市埸高位時套取利潤,在低位時再買入資產,循環不息的進行組合調配,達到長線的目標。

這正是資產配置,建立投資組合的魅力!

要取得豐碩的投資成果,成功的資產配置是其中一項重要因素。謹慎、有效地運用資金,投資於不同的資產類別,既可分散投資,又可減少組合波動,減低資產下降的幅度。

,「財務自由」其實是一個漫長的過程︰當我們年輕的時候,剛從學校出來,最重要的是想辦法增強自己的技能去創造收入。有了收入,扣除開支,剩下儲蓄,制定長遠計劃,定期投資,慢慢累積財富。而當我們人到中年時,應是進入財富的快速增長期。第一,我們的收入隨着經驗、個人工作能力的增強而增加。第二,隨着小朋友漸長,一些教育開支或供樓支出等逐步減少,從而增加儲蓄。

第三,當我們已累積一定旳資產時,一些平衡(balanced)的投資策略已可帶來一定的回報。例如,當資產是一百萬時, 我們每年回報率8%,已能賺取八萬一年;但資本只有十萬時,要賺取同額時,回報率要達到80%才能做到,容易嗎?經過財富的快速增長期後,也是人生進入退休階段的時候,大家可能面對資產分配的問題。這裡所說的「分配」,不僅是百年之後資產如何安排,而且也是怎樣安排現有資產為我們帶來收入,以應付日常的退休開支。

轉載自瘋子兄既blog
http://ffmadman.blogspot.hk/2014/03/blog-post_7506.html?showComment=1394251131450&m=1#c3934225372297715469

芒格的投資語錄(一)(轉載)


在其他blog友處看到芒格的投資語錄,止凡立即把它分享到facebook page。內容十分詳盡,一口氣很快地看完,感覺當中不少乃絕世警句,一定要逐一加以評論去認真地在blog中分享一次。

如果大家不清楚芒格是誰的話,相信大家都認識世界首富級人馬價值投資者巴菲特,芒格就是巴菲特多年來的投資夥伴,每次巴菲特出席巴郡的股東會都會有芒格陪同,在投資事途上,可以話芒格對巴菲特影響非常深遠。 

由於這些芒格的投資語錄總共有90個之多,每個都加以評論的話,一篇文章由頭到尾可能太長了,所以會分開多篇來寫,希望大家有心機看。


1. 大部分人都太浮躁、擔心得太多。成功需要非常平靜耐心,但是機會來臨的時候也要足夠進取。

止凡:這就好像打獵或釣魚一樣,耐性及EQ都很重要,平時要準備充足,好好靜心等待機會,到機會來到之前不要胡來。


2. 根據股票的波動性來判斷風險是很傻的。我們認為只有兩種風險:一,血本無歸;二,回報不足。有些很好的生意也是波動性很大的,比如See's糖果通常一年有兩個季度都是虧錢的。反倒是有些爛透了的公司生意業績很穩定。

止凡:在這裡也說過很多遍,這是太多人受基金經紀及財演影響,甚至CFA的教材亦這樣定義,即波動性高代表風險高。但其實這一直是誤解,對於投資風險很簡單,風險來自「無知」。


3. 所謂的「息稅折攤前利潤」就是狗屎。

止凡:「息稅折攤前利潤」即未計及派息、稅款、折舊、攤銷前的盈利,這些項目都是必須的,不計及這些項目的盈利數字,看來都無謂。記得三兩年前香港Disneyland的「息稅折攤前利潤」為正數,報章大字標題報導,而真正盈利還是負數,這代表什麼呢?選個好看的數字來報導嗎?意義不大吧。


4. 巴菲特有時會提到「折現現金流」,但是我從來沒見過他算這個。(巴菲特答曰「沒錯,如果還要算才能得出的價值那就太不足恃了」)

止凡:對極了!我投資了多年,由不懂看年報,到後來寫excel表計算年報內數字,再到現在很少拿起計算機去計數字,就是這個概念了,難道要有一個磅秤才能分辨胖子與瘦子嗎?


5. 如果你買了一個價值低估的股票,你就要等到價格達到你算出來的內在價值時賣掉,這是很難算的。但是如果你買了一個偉大的公司,你就坐那兒待著就行了。

止凡:這是巴菲特在價值投資法上的進化版,巴菲特在認識芒格之前就是運用他師傅Benjamin Graham的投資法,即買入價值低估的股票,那怕是爛透的公司。但當認識芒格之後,明顯巴菲特的投資方法有了改變,會在合理價格買入偉大公司,也不想在低迷價格買入爛透的公司,這樣的改變,令巴菲特的投資回報比他師傅還要高很多。


6. 我們買過一個紡織廠(伯克希爾哈撒韋)和一個加州的存貸行(Wesco),這倆後來都帶來了災難。但是我們買的時候,價格都比清算價值打折還低。

止凡:這都是一個好好的教訓,投資爛透的公司,就算其價格比清算價值低很多,這樣的投資還不一定成功的,這是只看P/E及P/B就下投資決定的人需要小心的事情。 


7. 互聯網對於社會是極為美好的,但是對於資本家來說純屬禍害。互聯網能提高效率,但是有很多東西都是提高效率卻降低利潤的。互聯網會讓美國的企業少賺錢而不是多賺錢。

止凡:投資者要分清楚新發明很多時會對消費者有利,不代表對企業有利的。巴菲特就解釋過了,當他得知紡織業發展出更高效率的機器之後,能更快更低成本地生產時,他的第一個反應是認為紡織業將會有大災難,因為他的廠會花錢買入新機器,陸續其他廠也會這樣做,到頭來同業們又會擁有相約的技術,大家只能再進一步地把毛利降低來競爭。誰得益了?只有賣機器的傢伙及一眾消費者。


8. 市面上對每個投資專家的評價都是高於平均的,不管有多少證據證明其實根本不是那回事兒。

止凡:這個不需要多評論,常常來這裡看文章的blog友,總會有點點不認同當今的投資專家及財演之類的人馬吧。


9. 同第5條。如果你買了一個偉大的公司,你就坐那兒待著就行了。

止凡:這也是今天的我在做的事情,經歷過03年沙士及08年金融海潚,深深覺得這句很不錯。


10. 巴菲特每個禮拜有70個小時花在思考投資上。

止凡:類似的描述也出現在李嘉誠先生的訪問中,他們還要是集中思考未來的事情。今時今日太多資訊,人們都習慣花很多時間在「收料」,然後投資及生活其他決定都跟資訊走,反而忽略了最基本的思考上,揭視一下巴菲特的這個習慣,是對投資者最好的提醒。


今天就寫這麼多吧,陸續有來,歡迎你也留言評論一番,讓我們用這些文章,慢慢地、深刻地把芒格的90個投資語錄好好分析及記下吧。

以上文章轉載自止凡兄既blog, 謝謝分享。
http://cpleung826.blogspot.hk/2014/03/blog-post.html?showComment=1394210766148&m=1#c6168474720605324286

2014年3月2日 星期日

Happy March

一直以黎十二個月入面, 最鍾意都係三月, 因為係小弟既生日月。 依家多左樣理由, 就係知道出幾多bonus。 今年既目標係出到三個月既人工, 希望做得到啦! 我間公司咁好? 算ok la, 叫唔犯錯都唔會炒魷魚既, 比上不足, 比下有餘咁樣law, 叫做夠糊口。 不過雙糧花紅就永遠唔駛諗。 咁又點解會有bonus出, 咪就係自制花紅! 求人不如求己, 繼續努力出花紅。

2014年2月28日 星期五

長線投資的理想與現實

世界越黎越難撈, 越黎越多人想靠投資達致財務自由唔洗做, 我自己亦都係長線投資,複利效應既信徒之一。 不過唔少人都相信長線投資既理想, 而忽視長線投資既現實。
長線投資的理想:
買入一樣資產, 每年有十幾二十%既回報, 再將得益投入資產, 透過長線加埋複利效應, 若干年後,  資產番幾番, 每年現金流多過打工終於唔使做。
長線投資既現實:
不過, 現實係殘酷既, 就算股神既巴郡, 年回報都係廿%多d, 試問凡人既我地又可唔可以做到神做既野? 做到神既一半都已經係接受近神既人啦!
睇完理想同現實, 原來要keep住到每年雙位數既增長, 已經係接近神既男人, 有冇種令人氣餒既感覺? 係咪終於明白到現實既殘酷?
之但係, 正是因為知道長線投資既現實, 先有機會踏向長線投資的理想大道。 因為知道長線投資唔係易事, 先會謹慎作每一個決定, 而且會不時檢討自己既投資, 久而久之, 就算做唔到神, 做接近神既男人應該都冇問題。

2014年2月23日 星期日

回報率及回報額既分別

最近, 我老婆唔知因咩事講開我淨係識自己買股票, 唔肯教佢, 話户口有兩萬幾蚊, 可以買咩股? 首先, 我問左佢一個問題, 兩萬幾蚊既本金, 妳想一年有幾錢回報? 佢答我想最少有四至五千。 跟住我同佢講, 一年四五千蚊, 好似唔多, 但係以妳既本金計, 其實回報要20% or above, 真係咁容易? 之後同佢講多幾句, 就不了了之。 我諗佢既諗法同埋情況, 同唔少香港人差唔多, 佢地認為一年幾千蚊回報唔算多, 因為佢地著眼既係回報額, 但投資要著眼既, 我覺得應該係回報率至岩, 而且呢個回報率既持續性。 投資一年賺幾千,幾萬,幾十幾百幾千萬上, 一年賺廿%以上, 大有人在, 但連續五年有廿%, 少之有少, 連續十年以上做到呢個成績, 鳳毛麟角吧! 大部份人本金有限, 又著眼回報額, 結果一開始可能一年先得一兩千或者幾百, 遠低於其預期, 結果就失去長線投資既興趣, 直頭放棄投資, 再唔係就轉而炒賣, 追求短期回報。 但如果佢明白到回報率既重要, 知道年年能夠做到穩定既回報率, 長遠帶黎既回報額絕對會相當可觀。

2014年2月18日 星期二

借錢投資

一直以黎都有問銀行借錢買股票, 主要都係買入高息內銀股。對於借錢投資, 我係抱開放既態度, 而自己借錢做投資既回報, 算係中規中矩, 賺到息之餘再賺都少少價咁。 不過以過來人身份, 借錢投資有幾點要值得留意下。
1) 銀行既職員通常會同你講月平0.x, 10000蚊只係十幾廿蚊息,一年都係百幾蚊, 好抵用, 但係如果計返實際年利率, 0.0幾其實已經差好遠。
2) 雖然自己好清楚年利率既問題, 但事實上我第一次做借貸既時候, 係借貴左。 其實當時我都知道息率唔算平, 但銀行職員講左個總利息支出俾我聽, 我見買股既股息夠cover有突,所以就借。 而現實係股息率同我借錢既息率根本差唔多, 本來以收息賺息差長線持有為主,係唔應該借, 但因一時疏忽, 就借左, 變相影響左回報。
3) 有錢就身痕, 突然間多左錢, 好多人因此就洗大左。 就算唔係洗左去, 用返o係投資上, 都可能多左錢影響決定, 我自己就試過, 明明如果冇果筆錢既時候,就會再等先買入, 但因為多左錢就早左入批貨, 怪只能怪自己把持唔住。(男人通病)
借錢投資的確唔係易事, 但我銀行借錢呢幾年, 卻係我資產增加得最多既幾年, 每個月既還款, 迫使我唔好亂洗錢, 變相儲多左錢, 而除左有時d股票買貴左少少, 總算忠於自己投資既方向,股息收入帶黎現金流兼賺到下價。 我覺得借錢投資, 其實就有d似做按揭買樓,當然借錢既息率會貴d,年期會短好多, 風險較高, 所以要更加計清楚息率以及自己既承受能力, 如果自己承受到, 又相信自己有紀律, 我亦覺得有何不何!

2014年2月10日 星期一

馬年第一跌

過完年後, 股市算係跌左唔少, 不過我冇入到貨, 原因係一月做左唔少中國銀行sp, 月尾到價入左唔少, 飽晒! 已經冇咩閒錢再入。
今次中銀既買入價3.39(已扣權金),以上年既股息計, 股息率都有5厘 7, 預計人仔升值, 再加埋業績既增長, 股息相信最少有5%增長, 咁計落應該有6厘, 算符合自己既要求。
雖然本身都諗住到價會入, 但最終買入量係比預期多唔少, 所以致跌市都入唔到貨。點解會有咁既情況, 因為見一月中近月尾中銀股價跌,權金升唔少, 覺得就算到價入都可以接受, 而且認為到價機會唔大, 結果沽多左sp, 導致之後再跌要忍心唔買得既情況。
希望能夠吸收今次既經驗, 下次做決定時再諗清楚d, 唔好再因一時衝動影響到之後既投資。

2014年1月31日 星期五

個人投資小回顧(3):贏錢篇之一

除左輸錢,咁我都有嬴錢既經歷既,當中有兩隻股票,一隻為我帶黎最大回報率既經歷,一隻為我帶黎最大回報額既經歷。
先講回報率最大既股票,就483 包浩斯,我2008,09年1.4-1.5買入,持有2011年賣左,計埋股息,有倍多既回報,可能對某d高手黎講,咁既回報率唔難達到,但對於初學投資既我,已經係好大既成就。到底當初點解會買,主因係睇星島投資皇既上市公司簡介,覺得間公司都唔錯,之後睇左幾年既數字,年年都有增長,派息又唔錯,當時返工附近既大商場,浩斯係唯一間用同一個名而又生存到既鋪頭(it唔算,雖然旗下同時間都有幾間鋪o係o固個商場,但唔係用同一個名),相信賣得都唔錯,業績差極有限。第二主席兩公婆(依家離左婚啦)持有一定股份,除非業績好差,相信派息都唔會太差。第三就係自己都間中會幫襯下,每年清貨時都有勁多人排隊,,所以決定買入。 其實買入之後,股價都繼續跌,不過見佢之後出既業績都冇咩點走樣,派息又維持到咁上下,重要夠膽量搵天真嬌做代言人,做時裝要有膽創新先有運行(當然依家事後睇返轉頭可以咁講啦! ),基於自己既偏愛,就繼續持有,直至11年,見佢既業績好似力有不繼,而且租金好似越黎越高冇止境咁,估計都係咁上下,就賣晒佢。
第二隻就等下次再講啦!

2014年1月19日 星期日

個人投資小回顧(2) : 輸錢篇

曾經阿師兄首蒼海遺珠都heat過下, o係投資頭幾年,我都以為"如滄海深處埋藏著遺珠實你好處個個也不知唯獨我先可以明白上帝構思於沙礫裡找到璀璨珍珠", 結果大多輸錢收場。現總結一下頭幾年輸錢既股票:
1) 1189 永安
2) 8090 美聯工商
3) 1155 星辰通訊
4) 475 億鑽珠寶
5) 658 中國高速傳動
6) 2368 鷹美
其實依家問返自己,點解當時會買入,坦白講,自己都說服唔到自己,不過都算係一個好經歷,令到自己認識投資多dd。

2014年1月14日 星期二

個人投資小回顧(1)

投資,其實可以好多方面,樓市,股票,車位,衍生工具等等, 個人就只係買股票。
我於2007年開始買股票, 投資方面,好似有多年年資咁,但我覺得都係呢兩三年先叫係明白多少少投資呢回事。
o係2007年,出黎做左幾年野,叫儲左少少錢,想資產增值,睇睇下財經版,胡哩胡塗買左人生第一隻股票,就係1398工行,印象當時買入價係4蚊左右, 唔使好耐就升到4.4/4.5左右賣左, 賺左萬幾蚊。
之後上網睇下人地講投資既blog, 對價值投資似懂非懂,開始自己發掘一d自以為係倉海遺珠既股票,但事實當時對於點解買入一隻股票自己都唔清晰。
之後o固一兩年,買左幾隻股票,結果唔使講都知梗係輸多過贏啦! 雖然係咁,當中亦有一兩隻股票我堅持持有,而其中一隻係bauhaus, 而呢隻股票亦係我買股票以來回報率最大既股票。

2014年1月11日 星期六

決定為呢個blog定立目標

既然開得個blog,如果成日唔update,其實都冇咩意思,所以都係set返個目標俾自己,等自己咪荒廢左呢度,不過自己知自己事,目標太高,應該做唔到,暫定一個星期最少一篇文章先啦!

2014年1月6日 星期一

本blog開章大吉

一直以黎,都有睇其他人寫講關於投資既blog,不知不覺已經成為習慣,從中學到唔少。於是興起一個念頭,不如自己又寫下blog作個紀錄,等將來睇返可以檢討下。最後,感謝各位blog友既分享!