檢討2015

上次總結左15年既回報，趁今年重有少少時間，檢討一下今年既投資。

今年賣股賺左廿萬左右，表面都算唔錯，但亦都有改善既空間。自己曾經經歷金融海嘯，但當時持股有限，所以心理壓力較少。但今年大跌市期間，唔少資金已經投入股市，見到股市係咁跌，整體由有一定利潤，到得返少部份利潤，於是把心一橫將部份股票套現，希望再跌有多d錢入平貨，結果賣左之後，都重有跌多少少，但跌幅有限無入到貨，如果當時無賣，最多曾經升過50%，到依家都有30%左右。當然無人知後市如何，但其實自己既買入價頗低，就算跌得咁勁都重有微利，其實繼續持有都唔係問題，但結果自己都受大市影響。

股息方面，算做到上年預期，維持落去就ok。

期權方面，其實可以再做多d，好似之前兩次行駛價離現價有一段相當既距離，就算到價亦入得過，不妨可以收多d權金。

借貸方面，基本上新借既資金都做到三厘樓下，亦算係合符預期，不過可以試下r下有無coupons送。

整體黎講，需要檢討自己於大跌時既心理調整，未來應該重有咁既機會，希望下次能夠做得好d，把握得更好，提升長遠既回報。

閙得熱烘烘的股息迷思

臨過新曆年前，blog界突然掀起關於股息既討論，能夠睇到咁多高質既文章，真係相當唔錯。

到底誰是誰非，唔同既人自會有其睇法，對我黎講，雙方我都有認同既地方，亦有唔同意既部份，例如我唔認同股息只係單純左袋落右袋，亦唔認為有股息收入就可忽略股價既變動，但我都相當同意投資既回報係股價變動+股息收入。

其實，呢樣亦係投資有趣既地方，試想下單係股息已經可以有唔同既睇法，更何況投資咁五花八門。好慶幸依家互聯網咁方便，亦有咁多bloggers願意分享自己既睇法，可以俾我睇到更多唔同既想法，從中學到唔少。

15年小總結

重有幾日15年就過去，都係時候總結一下今年既投資。

雖然年中港股經歷一個頗嚇人既跌市，不過黎到年終，仍持有既股票都有一定既升幅，而沽左既都帶黎唔少既盈利，計埋股息收益，今年回報都算ok。

今年透過賣股，帶黎二十萬二千左右既進帳，當中主要係套現左部份龍翔既股票，已經賺左十七萬多少少。另外賣走精熙賺左兩萬，賣走川河贏少少五千，大跌市時即日買賣金寶通執一萬。不過，都有損手既時候，soho令我蝕左六千幾蚊，好彩夠決心，唔對路即刻止蝕，入肉程度有限。

股息方面，龍翔收九萬一，偉記收萬五，精熙收五千六，川河收一萬一千，共收十二萬四左右，除開每月都有一萬。

期權方面，只於九月十月沽中銀既認沽期權，收到約千六蚊權金。

借貸方面，15年做左多筆借貸。一月借左九萬八，四月借左兩萬六，八月又借五萬七，九月加借六萬，十二月再借五萬，加加埋埋差唔多借左三十個，全部實際年利率都係三厘樓下。計埋之前未還晒既，黎緊共欠銀行六十六萬六千五百左右，呢個數已加利息。

投資現金流方面，只計股息收益扣減每月還款，由年初既負七千九百幾，升到年末既九千七百幾。

年終現金水平，由於套現部份股票，有一球左右。

雖然重有幾日15年先完，不過相信變化唔大，如果有變先再更新呢篇野。

到底什麼是投資?

到底咩係投資? 我相信唔同人有唔同既答案，有人會話係價值投資，有人會話買樓收租，有人會話買債卷，林林總總，無劃一既答案。但對我黎講，只要你做既買或賣，能夠賺到錢，而呢個情況，唔係剎那既光輝，可以持續到落去既，就已經係投資黎。

記得曾經睇過套西片21，中文好似叫決勝廿一點，劇情唔需要理會，不過當中講到主角被其大學教授招攬，加入左一個只有少數既精英集團，透過心算，記憶力，一系列既程式以及團體合作，專攻賭場既21點。o係普通人眼中，去賭場玩21點只係賭博，但如果真係可以做到好似戲入面咁，透過一系列分析，去提高每次賭21點既得勝率，從而達致長期回報，對我黎講，其實都係投資既一種。

對於投資，我地應該抱住開放d既思維，唔同人有唔同既領會，就算同一個人，o係唔同階段每人既領會都會有所唔同，唔夠開放只會焗限左自己，或者會錯失投資既機會。

價值投資既迷思

最近搵到流星兄既blog，入面既內容相當合我胃口，當中有一系列關於股息既迷思既文章，絕對值得一看。雖然流星兄對股息既睇法同我係有所出入，佢認為股息只係左袋入右袋，派股息呢件事對投資者係唔會帶黎額外既回報，表面上的確係咁，但我就認為實派股息實際上對投資係有更深入既回報。不過呢個唔係想討論既野，而係流星兄o係呢系列既文章提到一個核心，就係投資股票既回報從來都係股價變動+股息收入，缺一不是全貌，呢一點，或者以前既我未必認同，但隨住投資資歷既增加，自己亦都開始有咁既諗法，所以當睇到呢一系列既文章，就有種他鄉遇故知既感覺。

對於我地呢d以財務自由為目標既投資者，更加應該要睇呢幾篇文章，小心跌入偽價值投資既陷阱。由於唔少人以現金流為首要目標，往往買入一隻自以為有價值既股票o係度收息，之後就算股價係咁跌，都重不停同自己講係價值投資，唔需理會股價短暫波動，長線先反映到覆利既威力。當然，無人知自己既買入價係咪最低位，亦無人可以確保買左唔會再跌，但如果股價跌到太離譜，就唔可以再以之前既藉口自欺欺人，必須承認自己出錯，檢討出錯既原因，睇下到底係入市時機唔岩定睇錯股什至係其他原因，從而避免下次出錯或者越踩越深。

可能有人會話就算股價跌好多，只要有價值，長線必定會反映出黎，咁講的確無錯，不過大前提係要你無買錯股，但到底要幾時先反映到出黎，就等於幾時係低位一樣無人知。但有一樣可以肯定既，就係賬面既嚴重虧損，以及失去既其他投資機會。

再借五萬

上星期五銀行又打黎，話依家重有五萬蚊既額可以借，同之前借開既條件一樣，月平息0.12%，實際年利率2.96%，分四十八期，每月還款唔洗千二蚊，總利息支出唔使三千蚊。

其實之前八月九月既時候再借多左兩筆資金，本來都諗住唔再借住，因為每月既還款額真係唔細，佔人工近三分二，不過今次佢再打黎，聽完之後又心郁郁，最後都決定再借。

今次決定再借，都有幾個原因既。第一個係雖然話每月還款額唔細，不過下年二月應該有筆貸款供完，每月可以free返四千幾蚊出黎，所以只係黎緊兩個月疊埋呢筆新數落去辛苦d，之後反而每個月供少二千幾蚊，應該都頂得住。第二就係股市黎緊似乎有平野執，o係利息支出有限既情況下提升現金水平，話唔定執到平野提升到長遠回報。最後就係睇黎香港既經濟都要一段時間先到低位，短時間內樓價都唔會達至抵買既水平，自己衝量過中短期都唔會買樓做按揭。考慮過呢幾點，未來美國又話加息，之後重有無得咁平都好難講，所以都係決家扑鎚，錢就尋日到手，只係等時機出擊。

11月開支

十一月既開支總共係二萬六千五百蚊左右，未扣還款大約剩返三千幾蚊。同十月比，洗多左成六千幾蚊，主要係因為o係Bauhaus買左五千蚊野，又做左兩份人情，近三千蚊，如果唔係都唔會剩返咁少。黎緊十二月又聖誕節，睇黎都會有額外既洗費，不過應該都唔會好似今個月咁洗咁多既。       

香港 VS 中國

早兩日最多香港人講既，相信都係港足賽和國家隊呢場賽事。從戰果上看，的確好似唔錯，各得一分，和氣收場。但事實上從出線方面睇，呢個係最壞既結果，依家兩隊都爭緊小組次名既出線資格，但由於次名既資格重要同其他組別既兢爭，依家賽和，其實對兩對黎講都係痛失兩分。老實講，無論港隊定國家隊，我都希望有隊可以出戰世界盃，當然，我梗係希望香港隊贏多d既，但就算係國家勝出，亦都可以接受。不過中國隊真係扶唔起既阿斗，唔係睇低香港足球，依家香港足球既水平同黃金時期完全無得比，但國家隊連香港隊呢關都過唔到，更何論去挑戰列強，如果以國家隊早幾日既爛泥扶唔上壁既表現，香港隊贏埋既話，就真係最理想既結局。

坦白講，自己都有睇波，不過都係睇精華多，重要係外國聯賽，本地足球都有望下，不過唔算太留意，但總算講得出某幾位較出色如林嘉緯等本地球員，而香港社會一向對本地足球既冷待比本人有過之而無不及，到底無啦啦點解會有咁多人熱切關注呢？首先最近港隊既表現真係有d起色，表現好左，真係睇波既自然會欣賞。不過最主要既原因，係因為有心人將政治原素加左入去球賽上面。一開始不停咁炒作中國足協既"多層次"海報，再借機喧染中港矛盾，從而挑動對現實不滿港人既仇共情緒。事實上，唔少香港人，不論係壯年一代，以至年青一輩，都對祖國堀起無甚好感。對於壯年一代，佢地經歷過香港既黃金時代，曾幾何時，佢地返大陸係VIP，大陸人係阿燦，但依家風光不再，風水輪流轉，大陸土豪落黎做貴賓，港人變做港燦，呢種落差令到佢地更難接受現實。而年輕一輩則因為前路汒汒，大陸人黎買貴晒d野，新移民又黎R福利，自己向上流無望，更加敵視內地人。

由此可見，中港矛盾有幾激烈，我自己亦都抗拒過份赤化，但現實香港亦需倚靠中國，到底如何取得當中既平衡，將會大大影響香港既發展。

球隊能夠迫和實力較強既對手，故然藉得喝采，但有唔少既喝采聲係黎至就算香港唔出線都要阻止國家隊出線，呢種只係針對中國既氣氛，如果越演越烈既時候，只會令中港既洪溝越拉越闊，對香港絕非好事。

再賣龍翔

今日再以1.49賣左十萬股龍翔，套現近十五萬。股息加升值回報約六成半。其實上個月尾以1.2賣龍翔既時候，已經有每升10%就賣十萬股既打算，點知之後佢無啦啦係咁升，一升升到去近1.5呢個位置，所以只係o係上星期1.52既時候再賣十萬股，之後就無賣到。但如果按計劃，其實股價去到呢個位，理應已經減持廿萬股，但因為見升得急，想等再升先賣，無按計劃減持。今日終於下定決心，再賣走十期股，其實自己都明白未來無人可以預知，但人總係貪心，所以之前急升之後無按計劃賣走，希望再食到多d升浪，不過今日諗清楚，既然未來無人知，股價亦可能會跌返落黎，如果按原來計劃每升10%減持，應該o係1.32同1.46賣左，而家之前以1.52減持，如果今日再以1.49減持，其實已經超額完成完成，基於呢個諗法，終下定決心再賣。由於之前洗左少少，今次套現後現金水皮應該一球左右。

無啦啦出唔到廣告

早兩三日開始睇返自己個blog，發現出唔到廣告，本來以為係個網頁出問題，所以都無咩點理到。點知呢個情況一直持續，check返自己個gmail先知我個戶口已經停權30日，呢段期間無法放送廣告，原因係o係我既網站放送既Adsense廣告出現無效活動，30日後再審核，但到底咩無效活動，又唔透露得，結果都唔知點解。如果到時無效活動仍然持續，可能永久停權我個賬戶。如果有朝一日唔見我再update，可能係我個戶口俾人block左都唔定。


     這段期間無法放送廣告。

出血日@Bauhaus

曾幾何時，Bauhaus係我既愛股之一，為我帶黎唔錯既回報。最近Bauhaus出盈警，貴為前股東既我，睇到愛股落難，梗係唔可以就手傍觀，即刻去幫襯下，助佢渡過難關。

傻的嗎？事實當然唔係咁啦！只不過係老婆件皮褸著左一段時間，想換o固件，見Bauhaus 既廣告入面d models著住皮褸好好睇咁，原本都諗住去睇下，點知咁岩又有人俾左張coupon佢，就梗加非去不可。結果我老婆左試右試，又睇呢款又睇o固款，睇中左兩件皮褸，加埋4千4蚊左右。而我就揀唔岩皮褸，不過都睇中左兩件Polo shirts，加埋5百2，兩個人總共洗左5千蚊多d。

講真，二千蚊左右件皮褸真係唔算貴，不過原來諗住送一件俾佢，無啦啦變左兩件，有少少失算啦。今個月黎緊重有兩單人情要做，睇怕開支會超過正常唔少，唯有平時慳少少啦！

再套現農場

今日農場唔知咩原因，升成十幾%，作為一個農夫，見到d農作物有收成，決定割咁d禾青，1.52沽返十萬股，又套現返十五萬左右出黎，計埋股息回報太約7成為半左右。現金水平約九十個，適當時候會入返d當換馬。

投資上既轉變

唔經唔覺，由2007年第一次盲中中咁開始買股票，到依家已經有8年。話就話買左咁多年股票，但真正感受到自己係投資，都係近年既事。o係呢段時間入面，個人既心態都有相當既轉變。

其實頭頭買股，都係睇下報紙既股評跟住買，心態上希望一買入就係咁升。賴過幾次野之後，知道咁樣係唔得，又睇左其他人既blog，開始學人價值投資。當時既心態係只要業績穩定，又提供穩定既現金流，都唔會理會股價既變動，長線持有唔賣。但最近自己既心態又有所轉變，就係價值投資既同時，都會留意股價，適當既時候就套現部份股票，候低以提高回報或者進行換馬既舉動。

可能唔少人會話咁樣睇住股價去操作，其實唔係咩價值投資，不過咁，投資無絕對，每個人都有佢自己既方法，隨住時間過去經驗既累積，唔同階段都可能有唔同既方法，現階段我認為呢個方向最適合自己，或者遲下再經歷多d，再會有所改變都唔奇。

10月份開支

十月份支出控制得唔錯，大約洗左兩萬蚊左右，估人工既2/3，自從做返記賬呢個動作，某程度真係減省左無謂既洗費。                                        

最近既交易

呢個十月，恆指升返唔少，某d心水股同低位比都有唔少升幅。之前借落既資金依舊待機，最近唯一既交易係個多禮拜前1.2賣左十萬股龍翔，單計呢十萬股，升值加埋之前收既股息回報大約四成。今次賣出，本意係想換馬，但賣左之後，心水既股票又升左，結果無買入返，手頭上現金水平升到七十個多d。

習大大之行

依家中港矛盾o係香港既社會越演越烈，多得d政棍同某d傳媒既既渲染，唔少人直頭反共反上腦，當中大多為年輕一輩。

最近國家主席習大大到訪英國，獲高規格接待，由此可見英方幾咁重視同中國既關係，雙方亦都簽署多項既合作。作為普通既蟻民，當然唔清楚合作既細節，但睇新聞都會留意到雙邊交流只會日益頻繁。不過對於反共反上腦既人，佢地根本唔在意中英既友好交流，什至唔希望見到中英有咩進展，所以今次習大大之行，起初唔見佢地有咩提及，而之後有張會面既圖片有個廁所既標記，佢地先叫有d起色，後尾有張習大大夫人既粉底照，佢地終於如獲至寶，大造文章，周圍些呀，但原來克里訪英時亦都o係同樣位置會面過，而國際影星安祖蓮娜等都曾經化妝失手。對於佢地只係著眼於咁無謂既事件，什至將其放大，真係無聊至極。

我都明白大陸人影響到香港唔少，個人亦都認為過多自由行對香港有壞既影響，但對於國家我仍未反感至此。的確中國仍有唔少需要改進既地方，應當批評既亦應批評，但並非事事為反而批判。相比其他已發展多年既國家，中國已經算發展得快，亦不致於不堪。由今次習大大之行，可以預計到同中國合作只會為大勢，若然看唔通此大勢又或者故意視而不見，事事反方向而行，對香港未來發展或許會有好大既影響。

與年輕同事交談有感 (ii)

上一篇講到個年輕同事買左層六球既樓，似乎所有blog友都認為呢個唔係一個好既決定，其實以一眾blog友既財務知識，又點會唔知依家唔係買樓既合適時機。

對投資/投機者而言，樓市同股市相同，長揸者睇既係租金既回報，短少者睇樓價既升幅，同買股收息或者買股賺價理念係一樣，而佢地亦都應該清楚投資涉及風險，最終回報如何就睇個人既眼光。

但對更多人黎講，住係生活所需，而樓就係當中既必需品，有d人可能依家已經有住既需要，有d可能未駛住，不過認為未來總有呢個既需要。當呢班人睇住樓價係咁升，自己既人工升幅遠遠落後，尾燈都唔見到，除左09年金融海嘯樓價跌過d之外，呢幾年年年話加息，樓價會回調，鬍鬚曾成日叫小心，租樓等樓價跌就繼續租，樓價依舊由離地升到半空，駛問佢地又點會唔心急，所以有種心態依家再唔買遲下樓價分分鐘升到上太空，於是乎就有早兩三年父母俾首期，到依家一家大細一齊供既情況出現。自己早兩年結婚，老婆屋企以較平既價錢租個單位俾我地，否則都可能要為住既地方煩惱，所以好明白當中既苦況，亦都唔怪得點解有咁多人亦入市做樓奴。對於佢地情況，自己都好概嘆，亦好感恩自己既幸運。

與年輕同事交談有感

o尋日開工，拍住個年輕同事，閒聊間知道佢早排買左樓，於是話題就去左佢買樓o點度。

呢個同事平時待人處事都唔錯，算幾醒目，雖然我認為依家唔係買樓既時機，不過見到佢有能力，都係欣賞既，但問落之後，就鄧佢有d牙煙。原來佢買左環海東岸既樓花，單位三百幾尺，一房一廳，高層望維港境色，三年後落成，六百萬多d，實用尺價成萬九蚊尺。首期加雜費俾五十幾個，過兩個月開始月供兩萬。由於呢個同事搵緊唔到兩萬四蚊，本來以為屋企幫補唔少做首期，之後月供輕鬆d，不過睇情況又唔係，咪問佢點解依家去買樓同買到咁貴? 佢話因為見到呢個盤可以樓價5%就做到首期，十幾廿萬就上到車，於是去睇下。去到的確廿萬左右上到車，不過只限細過二百尺既開放式單位，而因為佢個籌好後，都無乜得揀，之後就俾人說佢睇二百幾尺既單位，再說話加多少少就可以買到大d三百幾尺既，到佢睇到個中高層望市區境既，又再同佢講比多一兩萬首期，月供多二千，就可以買到個高幾層望維港境，最終佢就係買左呢個單位。

跟住我問佢係咪同屋企人一齊供? 邊個名? 買樓之前有無諗過自住定放租? 佢話名就係佢，供就同細妹一齊供，不過加左屋企人做擔保。本來以佢既月薪要屋企人做擔保都好正常，但傾落原來銀行所做既壓力測試比預期高好多，要成六萬九蚊，結果要加三個屋企人做擔保先夠數。而放租定自住，佢就話睇下收樓既時候升左幾多，升得多就可能賣，如果唔係就放租。再問佢點解會買呢度，佢話因為近沙中線，第時開通應該會升值，而且校網好，唔賣放租應該都無問題。

聽到呢度，我真係鄧佢有d擔心，似乎最大既問題唔係佢呢個時候去買樓，而係買樓之前無諗清楚，唔肯定自己想點。所以先會俾5%首期吸引到，之後因為無清晰打算到底為放租定升值，所以俾d經紀說下說下越買越貴，如果一早心有打算，一早預放租既，就唔會買依家o固單位，因為一房一廳三百幾尺，校網係好但單位太細，吸引家庭客有少少難度，而且為左望海單位每個月供多二千銀，海境自己又睇唔到，同望市區單位比係咪租到多二千銀? 如果為升值，沙中線唔係今日先話起，樓價其實已經包埋沙中線既預期，到時因呢點係咪重有得? 其實如果佢一早有考慮清楚，就算最尾真係決定買樓，都唔會失晒預算買個咁貴既單位，要知我地o固行，就算叻仔升到職又升得快，人生都應該都搵唔過二千萬，六百幾萬等於用左1/3，最重要係縛死左未知既投資機會。當然未來既事無人知，幾年後自會發現今日既決定係岩定錯。

弱肉強食既世界

呢個世界，從來都係弱肉強食，以前係，依家都係。o係原始時代，弱肉強食係武力既掠奪，但隨住時代轉變，現今既弱肉強食，已經轉變為經濟既掠奪。

依家唔少人高呼社會唔公平，又乜乜霸權，其實o係香港已經算係咁，就算幾弱都好，都有社會保障，起碼餓唔死。不過呢班人似乎忘記左弱肉強食係自然既定律，佢地可能認為呢個只係個人被掠奪既事情，其實社會入面，唔同組織公司既競爭，以至國家與國家既角力，都係弱肉強食既其中一部份。所以，要逃避呢個現實係無可能。

既然逃避唔到，就要減低被掠奪既機會。最好既做法，當然係夠實力制定有利自己既遊戲規則，就好似美國咁不停以自己大國既身分去掠奪其他國家既資源，又或者好似地產商咁玩大富翁遊戲。不過，o係呢個世界或者社會入面，我地就好似鬥獸琪入面咁，既非象，亦非獅，只係小小老鼠一隻，但就算係老鼠，都可以做隻醒目d既，盡量減低被掠奪既機會，久而久之，自己都會搵到食變得大隻少少。

登記器官捐贈

等肺美蘭走了 家人哭喚「很愛你」

https://hk.mobi.yahoo.com/home/%E7%AD%89%E8%82%BA%E7%BE%8E%E8%98%AD%E8%B5%B0%E4%BA%86-%E5%AE%B6%E4%BA%BA%E5%93%AD%E5%96%9A-%E5%BE%88%E6%84%9B%E4%BD%A0-215523550.html

o尋日睇新聞見到美蘭等唔到換肺走了，呢個消息真係令人難過。相比起突然意外離世，美蘭預知是日無多，只能空等奇蹟，呢個情況對佢同其家人都係相當煎熬及痛苦。最終奇蹟沒有發生，其實每日都有人死，到底係咪真係無適合既肺部，或者自己已經係答案。o係美蘭去世之前，自己都無登記器官捐贈，直至o尋日先上網登記，可能有無數人都同我一樣，所以器官捐贈數目先咁低，其實人死後最終都化灰，與其由其腐化，倒不如將有用既器官捐贈俾有需要既人。

香港人活於呢個幸福年代，但原來o係呢片福地入面，仍然有人為生存而望天打掛。當你地盲目跟隨政棍高呼生於亂世，有種責任，會否諗下其實自己係身在福中不知福? 不如花少少時間登記器官捐贈，或者到你行左街回顧自己人生既時候，最有意義既就係做左呢個登記，幫到有需要既人。

9月份支出

9月份開支洗左約兩萬三蚊，比8月份多左三千蚊左右，主要係交左一千蚊電費、用左千鬆d買左個新既電熱水壺、買左個幾舊水既煮食煲，如果扣除左呢幾樣開支，實際只係比上個月洗多左幾舊，支出方面都重可以接受。未扣每月供款，9月有近7千蚊剩，希望10月能夠剩返多少少就好啦！                                                                      

沽中銀十月認沽期權

期權代號	XBC2.70V5
	合約名稱	認沽期權
	持倉數量	-40
	現價	0.000
	按金	5,727.00
	平均價	0.025
	賬面利潤	1,000.00
	買入數量	0
	沽出數量	0

早兩日再沽中銀認沽期權，行駛價為2.7，共收權金一千元。如果真係跌到呢個價，自己亦都樂意接貨，以今年股息打個8折，都重有6厘息，叫有一定防守性。

再reload少少彈藥

今日上一通個account望望，睇到偉記既中期息已經到手，扣埋雜費收到6587蚊，另外，上個月沽中國銀行認沽期權既權金750蚊都順利袋袋平安亦唔需行駛入貨，總共reload大約7300蚊。

Reload 26865

尋日收到龍翔派既中期息，又reload左少少彈藥，收到26865蚊。呢兩萬幾蚊，唔會主動出擊，只會用黎做補級資源，補貼返日常既現金流出。黎緊十月應該重有六千幾蚊收，今年應該就會收齊，以咁既預期，應該重差少少先達成今年既目標下限，真係有少少失算。

讀物推介 —— 砌出香港

上個星期日去行新都城，見到中華書局攪左個書攤，於是過去睇下書。期間有邀請到唔同既作者或者書本參與制作者於唔同時段上台分享下，而我睇書期間，就係一位有份參與一本叫"砌出香港"出板既Lego達人上台分享，雖然屋企無位擺所以無買Lego，但個人亦都有相當既興趣，於是聽左一陣，可惜既係現場氣氛真係麻麻地，台下擺左廿張椅坐左一半都唔知有無，d人又好似心不在焉咁，儘管台上講者努力分享，台下反應只係一般，什至自己聽聽下，都因為另一半想走而聽唔到落去，我諗做呢d商場分享其實都幾沒趣。雖然話就咁講，但亦因為聽到呢個分享，我先留意到呢本書，結果臨走前我都買返本返屋企慢慢睇，相信呢次分享都吸引到知心人。而之後我先知止凡兄於上星期六有份上台分享，可惜唔知，否則早一日去捧下場。喜歡Lego既朋友，不妨買本睇下，相信你地都會鍾意，俾幾張圖引下人先。

進步左丁點???

呢幾日股票市場好似再無之前咁跌法，有種喘定既感覺，唔少股票比低位都升返d，而且美國又唔加息，似乎短期內要大跌都有少少難度。

依家手頭上重有約六十萬現金，不過係分階段借貸返黎，最近跌市，因為未到心水價，所以都無入市。講真，心頭上有一定既現金，睇到個市又升返咁上下，低位無入到市都有d心"up"既。不過心"up"但唔心急，如果俾著以前，話唔定見到個市喘定之後，就忍唔住改變自己既部署，跟手就入市，但今次總算按捺得住，堅持唔到價唔買。

雖然唔知咁堅持係岩定錯，可能就咁miss左個低位都唔定，不過能夠唔俾大市左右到自己既決定，岩定錯都好，總點都叫係自己做既，從中一定有值得回顧既地方，下次再做好d，總比胡哩胡途俾大市左右為好。比較起以前，或者真係進步了丁點都唔奇!!!

飛來橫禍

做人有時幾小心都好，有d唔好彩既野都係會發生。話說平時開工，都要揸下公司車，平時我手車都麻麻地，所以都小心至上。o尋日開工既時候都要揸，o係公司既車位出車既時候，俾另一架公司車倒車撞到，事前已經睇清睇楚人地架車唔郁我先郁，點知佢o係我郁緊其間又突然開車，重要無睇後cam，就咁隊埋黎。好在車速慢，人無受傷。不過咁樣俾佢攪一攪，公司即時暫停我既駕駛職務，本來諗住將來o係公司入面專責揸車亦都可能有阻滯，真係小心都避唔到。希望公司了解過之後，知道係對家既錯，盡快俾我揸返車就好啦！

現價買中銀股既睇法

呢排聽到唔少人都話買內銀股抵買，但我就一股都無買到。事先聲明，我係內銀股既擁躉，由2009年第一次買中銀，買到2014年1月，高峰期有廿三萬股左右，最低價2.27買過，最高3.95，不過3個幾買得最多，平均價3.28，不過約3.5沽清換左其他股票。

呢排中銀由高位跌左唔少，現價比我沽清價多一毫子左右，之前重有低d添，自己之前就沽左中銀既認沽期權，行駛價為3.1，不過9月未完，最終會否行駛仍是未知之數。個人認為，中銀現價3.5仍算平，不過既然係平，點解又唔買? 最大原因係個人既資金已經全數買入股票，依家手頭上既，全部都係借貸返黎，所以對我黎講，平係唔足夠，要超值先會出擊。

現價既中銀，仍未到我眼中既超值，原因係中銀過左最佳反映價值既時間。中銀最佳反映價值既時間，應該係10年至14年既時候，當時盈利年年雙位數增長，股息計埋人仔升值年年都有10%+既升幅，點睇都相當不俗，不過市場總係有唔同負面理由，令到股價長期反映唔到實際價值，直至港股大時代先有唔錯升福反映返部份價值出黎，但之後又跌返唔少。現價雖然有6厘幾，但未扣股息稅，而且今年人仔貶值，對上o固年增長第一次低過雙位數又第一次減派息，種種情況令到市場有更多藉口低估中銀，到時或者會有超值既情況出現。

到底最終有無呢個機會，真係無人知，話明股市梗係估估下，有既咪買，無既咪繼續等lor。

人生無常

早兩日o係同事whatsapp群組入面，收到一個之前曾經共事過同事既死訊，雖然同呢位同事唔多熟，但都頗感慨。呢個同事平時為人不錯，大個我幾年，四十未到，正值壯年，大大隻無咩病痛，突然間就咁去左，真係令人覺得人生無常。對於我地追求財務自由既人，可能有部份為求盡快到步，所以過住苦行憎生活，但今日唔知聽日事，如果到達財務自由之前已經行左街，所有努力又有何用? 所以，平衡係好緊要，財務進程要緊之餘，適當既行樂亦都唔少得，起碼就算聽日要走人，都叫嘆過下啦！但亦因為人生無常，話唔定重有漫漫長路要行，財務自由就能夠為之後既人生能夠活得輕鬆一d，所以兩者應平衡。

最後，希望呢位同事能夠安息，一路好走。

加借六萬蚊

上年o係中銀做左個分期，總數廿萬零三千，分三十六期還，月平息+手續費化作年利率為3.33%。唔經唔覺，已經還左十一期。上個月，銀行打黎話可以將還左既錢加借返出黎，有六萬蚊多dd，月平息+手續費化作年利率為2.57%，就咁睇又唔錯wow。不過咁，由於今次只係加借返還左既錢，手續費平過之前，但其實月平息係貴過上次少少，所以拉返衡利率先平左。

除左咁，亦有一個加借陷阱要留意。中銀呢筆貸款係計埋手續費既，而手續費係貸款一開始已經扣左，計晒整個還款期利率先係3.3%，但加借既話，因為係提早完成，所以整期既利率就唔止3.3%。

既然係咁，點解重加借? 首先係整體利率的確係平左，雖然提早完結之前筆貸款令到息率提高左，但黎緊幾年平返d叫做損害有限。第二係可以鎖定一筆較長時期既貸款，未來或者踏入加息期，之後做貸款未必重係咁容易，而且，今次加借之後，年期攤長左，但每月供款就由五千七鬆d，少二千二蚊，去到三千五蚊多d，每個月反而鬆動左。第三係股市跌左唔少，似乎大勢向下行機會較大，未來或者有唔錯既入市時機，所以想多持現金。第四就係評估過覺得承擔到呢個風險。

最後，除左股票市場，香港既經濟都風高浪急，任何決定都要自己承擔，千祈咪被人影響到自己既決定。

8月份開支

自從之前覺得自己洗多左無謂錢之後，終於的起心肝o係7月尾download返之前去旅行用過既記賬apps，記錄返日常既開支，8月係第一次記錄整個月既開支。                                                     

整個8月，總支出約兩萬蚊，當中最大開支係租金+家用，共一萬大元。相比起唔少人，租金方 面既支出算少好多，因為係老婆屋企人既物業，所以比市價平一大截。如果唔係租金+家用應該要俾多1/3，萬五蚊先夠。                                    

其次就係飯錢，用左近五千蚊。雖然兩口子因為返工時間唔係成日一齊食飯，不過只要一齊出去食，大部份都係我埋單，平時返工自己食就無所謂平食又一餐，但兩個人出去食既話兩三舊就最基本，所以餐費唔覺唔覺都成五千銀。               

計埋其他，上個月洗左兩萬蚊左右，佔人工既2/3，叫重有一萬蚊剩，不過因為還緊錢，所以係負數，不過都無所謂，反正有股息幫補下，挨到咁上下就會鬆動唔少啦！                                  

打blog既bonus

付款收據

內容描述
付款金額	HK$1,035.03

早兩日收到Google過黎既廣告收益，打左成年半blog，終於儲到1000蚊樓上，平均每個月得幾兜野，不過一直都無幻想過打blog可以收到幾多廣告費，當bonus其實都Ok既。呢一千蚊鬆d將會食餐好既，支持一下小店，推動下本土經濟。

在此感謝曾到訪本blog既訪客，以後都要多多支持小弟，有岩既廣告不妨click入去望望，希望下次既一千蚊廣告費唔使用咁耐既時間先儲得到啦！

沽出中銀9月認沽期權

期權代號	XBC3.10U5
	合約名稱	中銀九月3.10認沽
	買/賣	沽出
	價格	0.025
	數量	30
	成交量	30
	成交價	0.025

今日做左次期權買賣，沽出中銀九月3.1既認沽期權，價格0.025，似乎少左d，權金先得幾舊，不過今次權金都只係少少既安慰獎，最重要既係確保我唔會o係跌到3.1既時候猶豫唔入市。如果中銀真係跌到3.1，我又唔介意接貨呀！

可用資產

最近大圍既氣氛真係麻麻地，道指上星期五跌成五百幾點，都幾得人驚。不過，或者係入市既機會都唔定。

手頭上依家可動用既資產，大約有五十四萬現金，同埋四十三萬左右既保本強積金。可能你會話強積金都好計落可動用資金度，不過保本基金價格變動唔大，如果趁股票基金下跌既時候轉換，其實可以當成間接係將現金買入股票。

黎緊既策略就係先用現金入市，目標分五注入市，不過無既定入市指標，隨心而行。而保本基金則會待現金用到一半或以上就考慮轉換至股票基金。現金先行，原因係想買既股多數都會派息，就算買入時機唔岩都會帶黎被動收入，到時可以再買，雖然都係得雞碎咁多，但總算有dd安慰獎，而且如果再跌，無錢直接入市，強積金既轉換都叫間接入到市，當然效果無咁好。

重記得09年金融海嘯時，恆指由三萬二點係咁跌，結果我去到兩萬二/三已經無晒彈藥，今次叫重有強積金做後備子彈，希望會做得再好d啦！

立即賴野亦得，得左

話說尋日拍板再借，今日有錢到手，本來已經套現左部份資金，物色左某d股票，今日於是set低2%左右，諗住入到就入。

本來上半日都入唔到，點知下晝一睇，竟然跌緊7%有多，原來今日出業績，自己竟然無為意。其實之前都預期過佢既業績麻麻地，因為公司正轉型中，都知今年會賺少左錢，不過今次半年業績竟然倒退95%，重要停派中期息，於是即刻翻查業績，其實轉型既業務都算唔錯，大方向都ok，長遠可期，但現階段仍未成氣候，而且本業貢獻大減，遠超自己預期，所以業績咁肉酸，更重要係派開既中期息竟然停派，業績入面寫鑑於業務既轉變，將會改為年度業績先派發，到底派息方向有無改變，都不得而知。基於有點失算，決定忍痛止蝕，一日入面蝕左成五千八蚊，約6.6%。賣左之後，曾經反彈過，但收市又跌返落黎，最尾比我賣出價再跌多3.86%。

今次咁決斷賣出，之後會唔會反彈，都係未知之數，不過就算反彈，都無辦法，因為做成咁次既錯誤，都係自己做成，錯在自己太過心急。或者因為套現左部份股票同岩岩做左貸款，手頭上多左錢，心態上鬆懈左，睇到有心水既股票，初步睇過基本野之後，有左先入為主既概念，結果跟進不足，否則本業貢獻大減就算未必算到，但亦唔會相差咁遠，而且今日出業績，自己竟然留意唔到，今次呢個教訓，貴係貴左d，不過重算有得著，希望下次可以做得好d。

呢隻股票，短期唔會再入，不過會繼續跟進，或者等轉型到咁上下會再考慮。

又借5萬7

之前7月尾，岩岩加左人工，銀行又打黎撩借錢，借5萬，分48期還，年息2.96%，不過早排套左部份現金，而且某d股又升返唔少，所以息率合理但係都係都無借到。

尋日銀行又打黎，息率一樣，不過額度增加左7000蚊，諗一諗之後重話送150蚊超市coupon，重要岩岩過左信用卡截數日，錢聽日到手，但十月中先還第一期，變相免息用多大半個月，每個月還1256，利息支出3288，而最重要既，係呢排唔少股票又跌返唔少，計過就算真係用唔著，亦都承擔得到，結果又借多少少。借埋今次，應該要等下年第一季還清其中一筆貸款，每個月free到4千幾數先會鬆動d啦！

天津大爆炸

最近最令人關注既新聞，一定係天津大爆炸。o係新聞睇到大爆炸既片段，實在令人太過震驚，原以為電影入面先睇到既場面，竟然活活地發生於現實之中。每次睇到關於現場既慘況，真係令人太過心酸，難過不而。

除左難過，亦令我對某d傳媒感到遺憾。要追究事件既責任，固然要做，絕不可草草了事，但現階段應該先集中救援，不過，本港有某d傳媒早早將焦點放o係責任既問題上，只將事情既負面無限放大，我實在有點不屑。咁既報導方式，對事情一點好處都沒有，更令我有落井下石之感。當然，唔係叫佢地唔好報導責任既問題，但o係事情發生既最初，係咪應該集中報導救援事宜，為事件帶黎多點激勵，為人們帶來丁點安慰也好。之後再深究責任誰屬，以傳媒身份監察事件既調查進度，為遇害者抱不平，咁既做法似乎更恰當。

不過，最令人感到憤怒既，係部份香港網民既冷血留言。o係某d黃絲區入面，見到有d反共反上腦既留言，實在相當無人性。明白到中港矛盾日深，但係咪等於抹煞左作為人既基本惻隱之心，台灣粉塵爆炸你會覺得痛心，但為何天津爆炸，會留d咁涼薄既說話? 我相信只有小部份人係咁，但現今互聯網咁發達，呢d留言好快就會傳遍唔同地區，小部份人既言論將會嚴重影響左大陸人對香港人既印象，只會加劇兩地矛盾。而且，呢種思想o係新一代既年輕港人有擴散既跡象，試想若然悲劇發生於自己認識既人身上，亦不希望其他人落井下石。

講過自己既感覺後，自己亦都做左樣好現實既事，就係翻查返龍翔資料。由於龍翔從事液體化學品碼頭儲存同處理業務，印象中天津都有，爆炸雖然唔關龍翔事，但唔知會唔會影響到龍翔既運作，於是上龍翔個網睇返天津既位置，離事發地點幾有廿公里，相信影響有限，而今次事件之後，相信當局會更加嚴格管理化學品既處理，短線龍翔可能要更多支出去提升安全設備，但長線亦令行業門檻提高，更能保障能夠提供高安全度既公司，或許對龍翔長線發展有利。

最後，希望遇難者安息，其家屬能盡快走出事件陰霾，當局能積極跟進事件，以防再有悲劇發生。

沽清川河

今日沽清手頭上既川河，套左廿個鬆d出黎，持有5個幾月，計埋收左一次息，微利8%左右。今次賣出，主要原因係早幾日出盈警，預料半年少賺四成，於是把心一橫，趁仍有微利沽出。本來想用部份資金買返另一隻股票，不過差少少入唔到，不過個市似乎唔多精神，或者之後重有機會以更低位入市。

外國的郵筒特別萌

早排台灣打風，威力勁到街邊既郵筒都吹到歪晒，唔少人大讚郵筒勁萌，吸引左唔少人特登去映相，就連香港都瘋傳。依家重決定保留返郵筒歪左既樣，彈性既處理手法實在令人欣賞。

首先，不得不讚一下台灣人既幽默感，一個吹歪既郵筒都可以帶黎咁多既歡樂，但同時令我覺得香港人既可悲。

香港社會充斥住批判文化，大部份香港人淨係識事事批評，如果同一件事發生o係香港，d人先會批評郵筒用料渣，跟住就會話再大風d吹走個郵筒撞到人或點d信整唔見晒會點算，跟手就扯埋去政治既層面，話國貨點唔好，跟住唔知點解講返到鉛水問題，政棍乘機出黎抽下水，港獨又出黎反共。之後如果郵政處維修得慢少少，d人又會批評政府唔理市民既安全，loop返去跌落黎整親人既問題，跟住又輪迴到之前所講既其他部份o固度，o係咁既環境入面，試問重點敢彈性處理。按本子辦事，就算被無理批判亦都叫有所依，但彈性處理而被無理批判，如惹來引致群眾評激，或許會被拿來祭旗，影響仕途，既然如此，還是默守成規，按本子辦事。

o係咁既氣氛入面，政府只會守舊辦事，唔會再有任何新思維，無創新香港亦只能原地踏步。而最可悲既，就係呢個惡果係香港人自己一手一腳做成，外國既郵筒特別萌。

強積金新部署

上年佔中期間，將手頭上既一半強積金由中港股票基金轉左落保守基金入面，另外將所有新供款都供落股票基金入面。

雖然最近大市跌返唔少，不過都中港股票基金未回落到我轉做保守基金時既價，所以依家保守基金入面既供款照舊待機，等再低位先轉返去中港股票基金。但自問邊有咁叻知道幾時係低位，既然個市都跌返唔少，所以決定將每月既新供款轉返落中港股票基金度，幫自己儲返d貨。

雖然呢個決定未必正確，不過我都係認為有好好管理自己既強積金，點都比完全唔理會既好。

加人工

等左咁耐，終於有人工加啦！今年加左差唔多千四蚊人工，大幾4點幾%，叫做幫補下咁啦！

岩岩加完人工，銀行又打黎撩借錢，話可以用返上次2.96年息借多五萬，分48期還，每個月只係一千蚊鬆d。加左千錢蚊，如果再借都重有少少剩，唔使額外節省已經夠供款，真係令人有d心動。

手頭上現金水平，曾經提高至43萬左右，不過之後用左13萬左右增持過股票，依家重有近30萬，現金都維持一定水平，所以無即時答覆，諗多個weekend先再作決定。

還原基本步

財務自由既重點，就係被動收入可以cover到日常支出，到時就算唔依賴工作收入都可以維持到現有既水平。

不過，最近睇返自己個戶口，個人既消費似乎隨住被動收入增加而越趨手鬆，如果真係養成一個壞習慣，將會拖慢財務進程。所以，最近決心做返樣最簡單既事，還原基本步，做返日常支出記賬，睇睇有咩無謂既消費。

之前去旅行用過個apps記賬，感覺都唔錯，於是上個禮拜用黎記低日常支出。一用呢個記賬apps，先發覺平時用八達通'do'一'do'既洗費都唔少，希望開始返記賬之後，可以減省到無謂
既支出，由於7月已近尾聲，等8月會更加清楚一個月既洗費大約要幾多。

壞習慣

o尋日得閒check下自己個account，發覺今個月都使左唔少錢，單係額外娛樂就已經洗多左3千幾4千蚊，另外因為公司黎緊會考牌，自己好耐無揸棍波車，又洗左成千銀去租車操返日，淨係咁都已經比平時用多左唔少，當然有d錢係應該洗既，例如操車既錢咁，但額外娛樂係因為之前派左股息錢多左先咁鬆手，當然我唔係過要做守財奴，投資有回報梗係要去享受下先有動力架ma，不過之前去過旅行，又買左部電話俾老婆同阿哥，再租車操，其實額外娛樂應該洗少d，不過人就係咁架啦，有錢就身痕，所以自己都要好好節制下，以免養成一個壞習慣，到時拖慢自己既財務進程就真係後悔都黎唔切。

追夢。。。加油吧！歐陽耀沖

歐冲追夢唔講金　月薪5千袋住先

http://hk.on.cc/hk/bkn/cnt/sport/20150702/bkn-20150702041158468-0702_00882_001.html

之前已經想打呢篇blog，不過咁岩撞著大跌市，太多野寫所以咁遲先打返。

我相信每個人都有佢既夢想，不過隨住人越大，接受社會既洗禮，大部份人都會向現實妥協，放棄自己既夢想。
有一部份部份會o係自己既comfort zone入面，改變自己原來既夢想，去追尋一個較實際既理想。
只有極少部份人，能夠跳出自己comfort zone呢個框架，去追逐自己既夢。

自己就係o固一部份留o係comfort zone入面既人，要放棄現有安穩既生活，去追尋自己既夢想，坦白講，我真係做唔到，我只係能夠做到o係comfort zone入面達至財務自由已經係我現今既理想，要跳出comfort zone，需要極大既勇氣，可惜我沒有。好佩服同羨慕能夠跳出comfort zone既人，能夠有咁既勇氣去挑戰未知既領域，成功與否，無人知，不過一旦成功，絕非我地呢d躲於comfort zone入面既人可以比擬。

如果有留意下本地足球，都應該知道歐陽耀沖算係本地年輕球員中較成功既一位，相信待遇薪酬都唔會太差，繼續留o係本地球壇應該都可以做到山寨王，不過佢竟然甘於放棄現有既成就，情願拎比依家差得多既待遇都要去葡萄牙發展，呢份勇氣真係相當令人佩服，要知道去到當地所有野都係由零開始，條路有幾難行諗到都辛苦。

雖然自己無勇氣咁做，但見到有年輕港人能夠有咁既勇氣亦都希望佢可以成功，能夠佢能夠成功係葡國發光發亮，再俾球探發掘更上一層樓。加油吧！歐陽耀沖

最近既反覆市對自己既得著

呢幾日咁反覆既股市，最大得著係令到我可以連續幾日出文呃瀏覽量，除此之外，亦令到我再一次感受到自己係大跌市所做既決定既不足，希望下次可以做好d。

經歷左今次既暴跌同之後既急速反彈，相信無長線投資概念既人更加唔會接受呢種思維。無呢種理念既人，佢地只會睇到長線投資既壞方面，同短炒既好處，佢地只會睇到股價可以短時間內大跌幾成，長揸到轉黎既回報咪又一野跌晒去或者要跌突，又只會睇到撈底一反彈所得既幾成回報，長揸唔知要幾耐先有咁和味既回報，當然佢地睇到既野係事實黎，我自己手持既股票，三隻入面有兩隻o係跌二千點o固日都跌到去比我既買入價重要低少少，另一隻重倉股仍有近10%升幅，整體賬面先叫重有微利。

不過咁，其實佢地忽略左某d野，就係低估左高賣低入既難度，同埋長線投資為心理上帶黎既安定性。 以自己為例，早幾日大跌，自己都有o係低位賣左少部份股票，諗住提升現金水平再跌之後入市提高長線回報，亦因為心態上係長線持有，大跌市當時，只係套現部份股票，之後亦有用部份套現既資金買返d心水股，而無心慌意亂賣走晒所有股票，所以仍有唔少股票受惠到呢兩日既反彈，依家睇返轉頭，全因長線投資既心態，就算之後大市飛升，我都只係少左d股票出個小錯，如再次大跌，手頭上亦有餘錢再買。而要做到高位賣低位買，事後睇當然容易，但做既時候係咪咁簡單? 試問6月既時候有幾多人重話恆指會去到兩萬八點? 而大跌當日夠膽入貨又有幾多人? 就算入又有買幾多資產落去?

能夠體驗到今次既跌市，真係一個相當唔錯既經歷，自問今次套現時機的確受大市氣氛影響而唔係咁好，但求經歷過今之之後，下次可以做得好d。

再套現少少

經過幾日既急跌，港股終於有個強力既反彈，恆指曾經升過千點，收市都有八百幾點，除左指數升，唔少呢幾日都兩三成咁跌既股票都兩三成咁升返，好彩既四五成或以上都有。相信唔少股民都開心返dd，而尋日低位撈到股票既更加興奮莫名。

對自己黎講，今日升唔升都無乜所謂，反正自己已經有計劃，就係套現部份龍翔，等機會再換跌得多既股票增加回報，所以尋日就幫我隻龍翔set左止蝕價，本來見今日個市咁好，都有諗過cancel個止蝕價唔賣住，不過今朝同事個群組入面，有個年輕同事post左張圖出黎，就更加令我按自己既計劃而行，無取消到個止蝕價。呢位同事以炒股為主，呢排都有即日炒賣，似乎都有d斬獲，而今日cap左張復星國際升左17%既圖上群組，似乎又有執。到底佢係咪咁堅成日有得執，還是報喜不報憂就真係無人知，但係同事一場我都望佢富費既。不過亦都因為見到呢張圖，令我覺得都重有唔少人會好似我呢位同事咁火中取栗，似乎普羅大眾仍未去到聞股色變既地步，更加加強我按計劃而行既信心，所以由個止蝕價keep住，有咩依郁都可以盡快套現，不過估唔到竟然係時日低位出貨，今日套現左大幾十五萬，現金水平升理約43萬，坐定定等未來發展，如果大跌就再入返d，就算係咁升都重有唔少貨o係手，唔會食唔到個升浪。

恐怖的一天

今日恆指既表現，可以用恐怖黎形容，一日入面竟然跌過二千點，收市都要跌千五點，都咪話唔得人驚。雖然7月只係過左幾日，不過唔少心水股都已經跌左起碼三成，有d其他bloggers推介過，而我亦覺得都唔錯既股票，直情唔見左一半添，或者唔少網友淨睇推介無任何分析就買入搏有得執，結果個市唔就，佢地一見跌就爭住沽，結果就跌得咁勵害。

經過呢幾日跌市，自己既帳面資產都縮水左唔少，不過總算重有微利，未駛倒蝕，不過遲下都好難講。早排六月尾同呢排都做左幾次買賣，首先係六月尾做左次換馬行動，當時梗係唔係咁叻睇到7月會大跌市啦，只係見其中既業績麻麻地，換入另一隻好似穩陣d既股票，結果到今日，新買既跌左兩成，而換走既就只係跌一成多d，換馬失敗。而尋日就套現左部份股票，今日終於忍唔住手，低位撈左隻blogger介紹過既股票，之後反彈一成多d，即時賣出再買返另一隻今日跌唔少既心水股，咁就使左8萬幾蚊，現金結餘得返28萬左右。

黎緊風高浪急，都係會透過賣股再買返其他，希望透過換馬去提升回報。

套現少少

今日恆指既表現，早段都升到咁上下，不過之後都頂唔住，收市跌兩舊幾。

o係今日開市之前，自己做左兩個部署，第一個係set左龍翔集團既止蝕貨價，觸發價1.01，結果1蚊賣出，套現返廿萬。另一個部署係set個低價睇下入唔入到心水股，結果係唔成功。

賣出左部份龍翔之後，現金水平提升至36萬幾，由於大環境實在唔樂觀，而且相對唔少股票，龍翔既跌幅已經唔算多，套現部份現金睇下有無機會換入跌幅較大既股票，從而提高回報。

又出招救市

大陸股市上星期跌極都有，中央出招都頂唔住。周末再有消息出招救市，到底下星期A股會唔會翻生，都係未知之數。

中央係咁出招救市，係咪真係一件好事，我自己就有所保留。面對跌市，出手穩定股市絕對無可口非，亦都有相當既需要，但個人覺得今次中央出招似乎過密及過勁，反而令我有d戒心。依家大陸既股市，就好似一個人唔舒服，醫生開特效藥，不過依家阿醫生開完一劑又一劑，到底係咪真係咁病，我地行外人邊到識。可能依家真係好嚴重，所以要連執幾劑，如果唔係可能會重傷或者就咁瓜柴，另一個情況就係依家已經病病地，開特效藥係為左等佢快d好，點知食完一劑無起色，即刻整多幾劑佢噗下。

第一個情況，已經唔係幾好，始終病人個情況都幾差下，底子唔好先要執咁多劑，有無效就要睇d藥夾唔夾，雖然情況不佳，但總算對正下藥，不過都唔可以因為有藥食而盲目樂觀。第二個情況睇落無咁嚴重，但我覺得比第一個情況更加差，短線睇起黎，第二個情況病人無咁病，又連執幾劑特效藥，一定好得快d。不過有睇過醫生既都知，特效藥唔係亂開，如果食得多，特效藥既效力會大打折扣，所以就算今次好得返，他朝真係再病既時候，要再好返既難度就高好多，到時既情況可能更加難扭轉。

如果有得揀，我希望依家係第一個情況，而唔係第二個，不過事實可能係第三或者第N個情況，世事又豈是我呢d嘍囉咁易看得清，還是按自己步伐而行。

跌勢未止

呢幾日大陸個市都唔多精神，上證指數同滬深指數今日又跌超過5%，恆指表面跌200點多d，不過好多股其實都跌唔少，我手頭上既最重倉隻龍翔，早幾日都重頂得住，今日終於頂唔住啦！今日跑贏大市，恆指跌1%，佢就跌成10%，加埋另外兩隻既跌幅，一日入面唔見左廿個，都咪話唔傷。

今日跌咁多，都有悔懊早兩日無賣左佢d股票佢，不過又有誰知道聽日個市係點，知既已經發左達啦！所以悔懊左一陣就算lu。大市氣氛的確唔多好，不過自己就未到恐慌既地步，始終手頭上既股票都重有升幅，重要收左一次息，而且有一定既息率，既然帶黎一定既現金流，唔跌太多其實都ok，不過如果股價真係大跌既話，心理上都會有d難受，始終無論短炒定長線投資都好，係人都想可以以更低既價錢買入心水既股票。由於閒錢有限，自己雖然心郁郁，都係俾多d耐性等更佳既機會先入市。

一片紅色

今個星期一股市既表現，應該嚇親唔少人，上網望一望個版面，差唔多全部紅色咁濟。曾經跌過千點，最尾跌六百幾。之後o固日早段都麻麻地，點知中午就倒升返上黎。

總結呢兩日，第一日持股都跟大市跌，不過跌最多o固隻都係3%多d，好過唔少股。第二日最重倉既龍翔發力，令到o係咁既跌市入面，資產反而無少到。呢兩日好多股票都跌唔少，不過咁岩好鬼多野做，都無咩時間睇個市，手頭上又得返十幾萬，到得閒睇既時候，猶豫下又升返唔少，都無入到貨。咁到底入唔到市是福是禍都無人知，唯有再睇下會唔會再有機會啦！

自動增值服務

早兩日由東京玩完返黎，去得五日真係唔多夠喉。今次旅行，機票酒店萬一/二，兌左兩萬蚊，又送左部豬四俾老婆做生日禮物，銀行戶口既錢應該會少咁d。不過之前忙住睇行程，又無咩股票想買，都有一排無login過個理財戶口。今日見得閒少少，於是登入個account望一望，發覺錢無少到不突已，重多左d添，原來係之前收到其中三隻股票既股息，只不過自己掛住攪旅行既野無為意，總共收左接近8萬5蚊息，唔怪得明明最近洗左咁多錢個戶口都會重多左錢，如果以後每次去玩完都會自動增值返又真係唔錯啊！

走火入魔

o尋日睇到單令人好得人驚既新聞，就係警方拉左班人串謀製造炸彈。
http://std.stheadline.com/yesterday/loc/0616ao01.html

之後就見facebook唔少黃絲友share文章，無非提出所謂既疑點，不過睇完入面所謂既疑點，真係得啖笑，大佬呀，依家人贓並獲斷正，反駁都搵好d既理由啦！不過咁，在於佢地既立場，就算小小可疑都要放大黎睇都唔怪得佢地既，不過再睇埋其他人既留言，就真係有d心寒。係依家呢個政治環境，任何可能都有機會發生，但留言只會中共/黑警等插贓駕禍，從沒有人會覺得樹大大枯枝，或者真係有過激份子會採取嚴重既違法行為。做人有立場好正常，但若然俾偏見遮蔽左一切而就盲撐，就真係令人擔心。社會呢種風氣越黎越強烈，對於香港既未來，o係咁既政治氣氛，社會既風氣下，實在令人不感樂觀。

聽日就會離開香港去玩幾日，可以暫別最近既政治紛爭，希望返黎既時候，有關紛爭已經平息就好啦！(雖然無咩機會)

下星期既東京行淺談旅遊業

黎緊下個星期四，會同老婆去東京玩五日，全包宴當係佢既生日禮物。老婆見yen平，當然興致不已，本來我諗住兌住兩萬蚊港紙先，唔夠先簽卡，不過老婆見低到6.18，就忍唔到手兌左兩萬五蚊，佢就話唔使我俾返多左o固五千蚊，不過咁，既然話左全包，如果唔洗俾返o固五千蚊佢，就買份禮物補返啦，不過咁就無啦啦駛左多幾千蚊。

由於機票酒店已經俾晒錢，所以呢兩萬五蚊淨係五日既洗費黎，姐係每日洗5千銀，試問平時有幾何會預一日五千蚊既洗費? 大時大節都唔會啦！雖然無話兌左就一定要洗晒佢，不過兌得既，亦都唔排除有洗晒既可能。就算話唔係次次去旅行都預成五千蚊洗費一日，但去旅行時洗錢既心態的確同平時好唔同，豪好多。當然唔係人人去旅行都會豪洗，不過唔少人去旅行洗錢應該都會好似我咁手鬆d。相比起本土消費，我相信旅遊業帶黎既效果應該大得多，香港一直都好依賴旅遊業，而近年主打自由行既旅行，不過黎緊旅遊業應該面對唔少既挑戰，到底會為香港經濟帶黎幾大衝擊，我都有d擔心。

不過，船到橋頭自然直，本土消費就留返我去完旅行先再支持啦！

二百幻

早排因為隻愛股升唔少，水漲船高下，身家扣除負債終於突破二百萬大關。不過呢排股市唔多精神，雖然無實際計下自己既資產，不過都應該由二百萬變成二百幻，落返兩舊樓下。

話就話只係曩花一現，幻覺一場，我倒沒任何難過，反正現金流依舊，只係少左剎那既快感。不過咁，如果個幻象唔係二百幻，而係突然間變成三百幻，我就可能有少少傷感，因為突然變成三百幻我好有可能透過換馬去增加現金流，咁就可以加快到我既財務進程。

不過財不入急門，現金流唔減少就已經ok，反正方向對既話，最終都會到目的地既。

突破二百萬

今日我做左早排好多散戶會做既事，就係不時上網check股價。原因係我今日上網既時候睇到我既愛股龍翔集團有成15%+既升幅，於是一得閒就忍唔住上網睇下重有冇再升多d，結果高峰升超過20%，不過到收市得12.5%，雖然升幅收窄左，都為我帶黎7個月既人工有多。成日話自己係長線投資，見到愛股有咁上下升幅，原來都同普通散戶一樣咁沉迷股價既變動，呢方面真係要檢討下。

雖然只係賬面上富貴，不過今日既升幅，令到我既總資產扣除負債之後，第一次突破二百萬大關。印象中達至百萬已經係一段長時間之前發生，希望黎緊快d達至三百萬，四百萬，希望唔使太耐可以去到千萬既水平就好啦！

與後生同事吹水看年輕人既想法

上個禮拜拍開個入職一年左右既年輕同事一齊做野，做野之餘都有吹下水，傾過下買股票同埋養車既話題，從中或多或少亦都睇到後生仔既諗法。當然，由一個人既睇法就擴大至所有年輕人既想法，比依家所謂既民調更加唔科學，如果呢到有後生仔睇到，記得睇完就算，千祈咪對號入座。

話說o固日無啦啦講開股票，於是問下個後生仔有無買股票，佢話早排入左隻內房股，依家蝕緊錢，我見早排市況咁好，佢竟然都要輸錢，我問佢輸左幾多，原來幾千蚊，問埋佢買入既數額，大幾蝕左十個%左右，跟住再問下佢買左o固隻咩股，佢講o固隻，我就唔識，不過呢個唔係問題，股票何其多，我唔知都唔等於d咩，我於是問佢點解會買，佢答我睇左呢隻股票好耐，次次升到某個位，之後又會跌返去某個位，來來回回好多次，所以早排見佢跌返去某個位，於是買入。之後我再問佢點解咁多隻股票入面佢會留意到呢隻股票，佢話因為佢老豆有買開。問多兩問，似乎佢都講唔到點解買入，最尾就話自己黑，帳面賺過千幾二千蚊無賣，之後就係咁跌，人黑真係無計。我心諗佢只係貪o固一萬幾千，我收息唔止之餘，又唔使好似佢咁大心理壓力，跟住我就同佢講自己買股既目標係收息，但講無幾句見佢無咩反應，對牛彈琴，都係慳返啖氣。
到底有幾多年輕人好似我呢位同事咁買股? 買入懵查查，贏輸就睇彩數，試問長線又點會贏?

講完股票，知道佢最近買左車，於是又傾o下。我問佢養架車要幾錢，原來佔佢人工成1/4，計埋俾家用屋企，日常洗費，剩低既都係有限數，儲極有限。我話養車咁貴為咩買車，佢話鍾意玩車，襯依家後生無咩負擔咪玩，遲下有負擔就無得玩。我相信呢個諗法，應該都係時下唔少後生仔既諗法。我同佢講，車我未必唔玩，不過會等遲下先，但我相信佢唔會理解點解我會咁做，因為由佢所講既概念，就知佢無好好管理自己財務既概念，而之前同佢講收息亦聽唔入耳，更加難同佢講先買入資產後消費呢個理念。

慶幸自己年輕既時候無好似呢位同事既諗法，否則自己都唔會踏上財務自由之路，雖然離成功仍有萬丈遠，但總算起左步，希望有一日會達到終點啦！

別讓廢青的思維佔據你的人生

唔同人對廢青既定義都唔同，對我黎講，以一個年青人既擁有或者學歷去評論佢係咪一個廢物係唔公道。反而，我認為年青人既心態更加能夠判斷佢係唔係一個廢青。

o尋日睇到報章既報導，
"買樓無望 港青求開心 寧「炒散」拒做長工"
 http://www.skypost.hk/%E6%B8%AF%E8%81%9E/%E8%A6%81%E8%81%9E/20150526/001/%E8%B2%B7%E6%A8%93%E7%84%A1%E6%9C%9B%20%E6%B8%AF%E9%9D%92%E6%B1%82%E9%96%8B%E5%BF%83%20%E5%AF%A7%E3%80%8C%E7%82%92%E6%95%A3%E3%80%8D%E6%8B%92%E5%81%9A%E9%95%B7%E5%B7%A5/178706 ，
呢篇報導有幾多係真，真係唔知，不過如果年輕人真係好似報導入面咁既諗法，就真係同我心目中既廢青一樣。

年青人要外出闖蕩增廣見聞，什至發展自己既興趣，我絕對支持，但唔應該好似文中所講咁因為儲o固幾千蚊儲極都買唔到樓，所以做無幾耐就去旅行，呢種想法極度本末倒置。而且，可以睇到呢d人目光幾咁狹窄，因為買唔到樓，所以就點點點，人生既目標唔應該只係放o係層樓度，若然你係為左放眼世界而外闖，絕對支持，但因為買唔到樓而外遊，重要自我安慰為左見識異地，只不過係逃避現實。出發點唔同，得著亦唔一樣，當你以逃避既心態去所謂廣闊視野，係永遠都睇唔到人地為放眼世界而外闖既得著。

而因為儲極都買唔到樓就不如毫無目標咁洗埋佢，咁佢既人生好大機會係失敗者，廢青一條。儲錢唔係為左買樓，對我黎講，儲錢係買機會，而呢個機會，可以係買樓，買股票，投資，創業，或者係進修，出外擴闊視野等，呢個機會，係會為你帶黎改變，但係好係壞，都要睇你買呢個機會既時間。以自己為例，我03年開始做野，o係投資股票方面，當中已經有唔少買機會既時間，例如07年直通車前，09年金融海嘯，以至近期既大升市前，都係買機會既好時候。如果買樓方面，就更加係買機會既黃金十年。但如果連一點資本都唔儲，就算有沙士價既樓，一樣係得個睇字。不過廢青又會反駁，就算儲到一筆錢，樓價跌到沙士價，到時周圍經濟一定唔慌好，工都唔知有無得做，咁重儲黎做咩？佢地咁講又無錯，不過廢青諗野就係咁負面，唔會諗下到時話唔定繼續有野做，可以買到當時既機會。正因為廢青唔改變自己既思維，就算真係有機會都唔會把握得到，由廢青慢慢變成廢佬。

上一輩人的財務思維

早幾日返老家食飯，兩老可能早輪股市暢旺，於是問下我買左咁耐股票，有無賺到十幾萬? 答完佢地之後，又問我依家有幾多股票同有幾多錢o係銀行? 答完之後，可能我既答案遠超佢地所想，又或者最近股市既火熱令到佢地有d擔心，就同我講千祈咪借錢，d息好貴，要用錢開聲問佢地，我就含糊地帶過借錢呢個話題。

我老豆係好典型既上一代人，不過已經比以前進步左。從前佢係連股票都唔會買，淨係識儲蓄，最多做下零儲整富咁。不過經過我一番唇舌，總算會投資下股票，當時我叫佢買股收息，不過佢個方向都係賺價為先，收息為次，咁都無所謂，因為佢係心態上調節得幾好，有耐性等比較低位先入，又唔會高追，而且買既都唔係d咩垃圾股，偶爾買貴左收下息守守下都唔洗輸，最近賣晒所有股票，埋單都叫賺左十幾萬，又再等機會先再買過。 呢十幾萬已經等於佢依家兩年既人工，如果佢好似以前咁保守，資產就唔會有增長得咁快。

雖然我老豆已經進步左，但對於借錢，佢就同好多上一輩既人一樣，覺得借錢唔係一件好事，所以先會叮囑我要用錢可以問佢地。有咁既諗法，原因係佢地一直以黎都係被灌輸負債係壞事，而從來無諗過負債如果利用得當係可以加快財務進程既工具。唔好話上一代，就算我呢一代人，都有唔少重係keep住呢種思維。由於呢種思維已經植根左o係我老豆既腦海已經超過半世人，所以我都無將自己揹住幾十萬既債話俾佢知，而且亦都無諗過改變佢呢種思維，反正佢已經錯過左佢最住借貸投資既時代，而現在投資亦略有回報，對佢地兩老黎講已經相當滿足，就維持現狀就好了。不過我自己就會吼住有冇抵既借貸機會，從而加快財務既進程。

翻看舊書 -- 股壇解碼器

最近執櫃既時候，搵返N年前買落既舊書，叫做股壇解碼器，於是又翻睇一次。

呢本書應該係我第一本買關於投資既書籍，入面講既都係好皮毛既財務知識，我諗俾其他blogger們睇到應該會覺得唔入流，有d內容什至依家既我睇完都覺得得啖笑。但唔等於呢本書無可取之處，內裏有d最基本既財務知識，對於N年前財務知識白痴既我，實際上係獲益唔少，令到我有最基本既概念，亦提升左我對投資既興趣，先令我不停咁搵blogs睇。而呢d基本財務知識，依家翻睇返，亦都有溫故知新既作用。

雖然經歷多年，距離財務自由仍有好遠既距離，但呢本書亦都有助我踏出第一步。對於理財新手，我都建議佢地可以睇下呢本書，有個基本既概念，或許會對未來既財務進程有所彼益都唔奇。

又做多少少善事，拜仁出埋局

之前經過我細心分析，歐聯冠軍不外乎車仔同拜仁既囊中物，不過就以車仔機會大d。於是買左一千銀車仔冠軍，再搭五舊拜仁冠軍，諗住都好穩陣下。

點知車仔早早俾巴黎做瓜左，次選拜仁八強首回合輸緊幾粒，次回合發威大炒對手晉級。四多對住美斯領軍既巴塞，首回合已經俾打到體無完膚，輸緊三粒，想好似八強咁大翻身，巴塞始終同八強既對手唔同層次，輸緊咁多粒想晉級真係無咩可能。結果拜仁叫保住少少面子，次回合主場贏3-2，叫無咁肉酸。而本人歐聯之路亦隨住拜仁出埋局而落幕，總共為馬會進貢左千五蚊做善事。

其實賭波最緊要清楚自己係賭緊，就算幾多分析都好，賭就係賭。同投機炒股一樣，有唔少人可能道聽途說炒股，但就誤以為自己係投資，咁就等於將賭波包裝成投資一樣咁危險，當然，唔排除有人可可以將賭波變成投資，贏既居多，但呢d人又有幾多??

買得安心

o係呢個大時代入面，好彩既求祈買都會有幾十%什至倍升既股票，我手頭上既股票雖然都要一定既升幅，但相比o固d一升就幾十%咁升既真係一d都唔入流。雖然係揼心，不過勝在安心，依家揸住既股票，大升又無份，大跌又唔會，平平淡淡，無什刺激感。不過咁都好，坐過山車咁刺激都係唔係幾岩我，早兩日就有隻股票，一日內可以升兩倍，但最尾收市竟然可以倒跌四成，試問買左呢隻股票既人，真係感受到坐過山車既刺激感覺。

強積金既部署

最近股市水漲船高，連帶強積金都有唔錯既表現。依家強積金既資產，唔經唔覺，竟然有現有股票資產既一半。有咁既成績，第一係公司既供款比法定既5%高，所以本身個底比同期既人多。第二係佔中之前一直將大部份供款擺晒入高風險既香港同中國股票基金入面，儲落唔少較低位既貨，雖然佔中期間將一半既強積金資產轉左做保本基金，食唔足今次升浪，但淨低o固一半因為入價貴相對較低，都有唔少升幅。

現有強積金既部署，就係維持返之前佔中時期所做既操作，就係所有新既供款就擺落保本基金，避免越買越貴既情況出現，而且本身大部份既資產已經擺左o係股市入面，所以將新供款擺落保本基金亦可以提升備用資金，一個唔該突然大跌都可以趁低轉返去股票基金。而現有既強積金就照舊一半股票基金，再升都重可以跟到呢轉，其他就撥埋去備用。

雖然好多人話強積金無用，但個人因公司供款比其他人多，先天有少少著數，如果自己能夠好好管理既話，應該都可以有些微作為，為財務進程出一分力。

咚兄所問既好問題

打blog除左係一種興趣，分享自己所寫既野之餘，其實有時從其他blog友既回應，自己亦獲益良多。好似早幾日發表左篇文章，講開最近又問銀行做既信用卡套現分期，當中咚兄問左一個好好既問題，就係有冇被收信用卡既年費。之前一直都冇諗過呢個問題，因為一黎我做信用卡套現o固兩張卡都係永久免年費既，而另外平時簽開o固張就第一年免年費，之後試過收，個數目都唔少，不過只要打電話去就可以waive到。就咁睇，信用卡既年費好似唔係d咩問題，不過咚兄呢個問題對於信用卡套現其實有更深層既意義。

用永久免年費既信用卡做現金分期，問題不大。但如果唔係永久免年費既卡，會唔會就有慳左息但係要俾年費偷雞唔到蝕幾渣米呢個風險? 咁又真係唔敢包。雖然我認為風險真係極微，不過又唔係一定無可能發生，始終唔同永久免年費既卡一早講明，好多卡都只係話豁免首年年費，無包以後打電話去都waive 喎，到時又做緊現金分期，想即刻cut又唔得，真係騎虎難下。不過，如非必要，銀行都唔會殺雞取卵既，因為一咁做，就等於呢個客永遠都唔會返轉頭，所以機率真係微乎其微。

不過，既然手上有永久免年費既卡，就連呢少少×N次既風險都無必要冒，就用免年費既卡做現金分期好了。

錢已到手了

上個星期五落實再做信用卡現金分期套現，借兩萬六，分四十八期還，每個月五舊幾。錢o尋日星期一就已經到手，第一期還款既deadline去到六月中，計埋呢幾日，其實有2/3個月既時間係唔使俾息，叫到抵多少少。

呢兩期幾蚊再加埋心頭上既資金，應該會分開兩次黎入貨，因為心水既股票雖然有升到，但同大市仍有一大段距離，現價仍接近自己想入貨既價位，如果再回多少少，就決定入貨長期持，睇睇黎緊有冇咁既機會先入一轉，另一轉則待機等更好既機會。

又借dd

本來今年都唔諗住做新既貸款，因為依家月供款已經佔人工既三分之二，不過尋日銀行職員打電話黎撩借錢，話可以用返上次月平息0.12%既offer，即係實際年利率2.96%，借兩萬六蚊，問我有冇興趣，咁又真係幾令人心動，始終無抵押既貸款可以做到三厘樓下又真係幾抵。個實係就係少左d，不過分48期，每個月還$573，咁又唔辛苦，始終依家每個月還款已經唔少，如果個額太大，就真係會有少少辛苦。

雖然話港股升左唔少，但個人認為仍處於合理水平，仍有唔少值得投資既機會。以唔駛三厘既息率去增加現金水平，相信會有一定值搏既機會。依家手頭上借貸，成本相比起以前真係慳左唔少，最貴既都係三厘半，三厘樓上既大約佔未償還貸款既2/3多少少，而最近做既已經既全部做緊三厘樓下，佔未償還既貸款1/3左右。希望遲下可以將三厘樓上既貸款全部轉晒做三厘樓下，可以越借越抵就好啦！

平有平玩

我諗唔少80頭既宅男，應該都同我一樣鍾意高達，以前我都有玩下模型，不過依家已經無玩lu，唔係因為貴，係因為屋企無咁多位擺。不過早排行經樓下既扭蛋機，見到依家d扭多都相當精緻下，上埋色而且手腳可有限度活動，我最愛既Z Gundam重可以變身添，廿蚊都算抽得過 (我o靚仔既時候五蚊炸)。結果抽左兩隻就俾我抽到想要o固隻，返屋企砌好o係陽光下幫佢映返張靚仔相先。

其實有時做人簡單d未嘗唔係好事，心態影響你既消費，廿蚊已經令我好滿足。有時唔係唔追求，不過亦無需強求。

典型既散戶

呢輪股市火熱時表現，令到唔少股民相當驚喜。o尋日上網睇到東方有段報導，直擊十二位股友慶功宴。
http://hk.on.cc/hk/bkn/cnt/finance/20150421/bkn-20150421195630675-0421_00842_001.html

唔知有幾多股民好似報導入面既股友咁既反應，不過睇完呢篇報導，我相信呢班股民都係賺粒糖居多亦都係大部份散戶典型既表現。報導入面既股民，少部份人見有咁上下盈利就選擇賣左佢賺左先，呢方面都無可厚非，我亦無咩意見。不過，更多既係見市好持有多年既蟹貨終於重見天日什至有繩頭小利就急急腳沽左去，而且有幾位受訪者直言自己成日心思思，係咪都想去銀行或者證券行走轉，呢兩種情況就要留意。

當你終於賣左d蟹貨既時候，而因為市好，呢隻你揸左等左N年既股票好似坐左火箭係咁升既時候，揼春程度真係好難令人接受，對於呢隻股真係又愛又恨，因為揸左咁耐始終有感情，但又因為蟹左咁耐，令你又唔敢重投佢既懷抱。結果睇住佢繼續再升上去，你終於按捺唔到自己既感情，與佢重修舊好，但好可惜，當時佢已經升到好高既位置，太陽溶化了他那蠟做的翅膀，又跌返落地下，你又重新蟹多次。而心癮難耐亦同樣危險，試問連去銀行或者證券行既衝動都忍唔住，一去到俾現場既氣氛包圍住，更加無可能冷靜分析，結果就係俾當時既氣氛沖氛頭腦，做錯決定居多。

自問都係老散一名，有時都會俾大市既氣氛所影響，亦都心思思留意多左股票，不過大方向總算叫做按住自己步調行，未至於亂晒方串。相信黎緊報章應該重有更加多呢d相關既文章，越多既話，等於提我要越小心，對我黎講都未嘗不是好事。

世事如棋

倉卒歲月，世事如棋，每局都光怪陸離。呢幾句係歌神許冠傑首世事如棋既歌詞，依家既d歌詞真係同以前既無得比，以前d歌真係正好多。

上個星期五先有中証監針對卷商兩融業務出招，再有歐美股市大跌，重要無線星期一晚開始重播大時代，丁蟹效應出現，人人見之前港股升左咁多，咁多壞消息星期一港股一定會跌唔少，港股ADR都跌成700點，淡友真係開心到笑。

點知星期六中証監就o係官方微博出澄清，叫市場唔好過份解讀。之後重有人行宣佈降低存款準備金率，重要係一個百分點咁多，個形勢即刻唔同晒。

結果今日開市恆指高開百鬆d少少，之後都係o係上星期五埋單個數百幾二百點咁上上落落。自問真係無本事o係呢個光怪陸離既股市短炒獲利，只能夠"但求共你財藝相比較，了解長線道理"。

剎那的興奮

上個星期，股巿突然連爆幾日，所有人既話題都集中晒o係d股票度，當時聽得最多既，除左邊隻股票唔知升幾多之外，其次就係埋怨自己放早左，賺少好多，之後就係d蟹貨終於鬆綁見返家鄉。不過隨住之後漸漸轉趨平穩，股票又開始慢慢淡出人們既話題。o固幾日既大升，令到唔少人都興奮異常，滿以為隨便買都會賺錢，易過食菜既時候，轉頭又回返唔少，只為佢地剎那的興奮。不過，黎緊星期一應該又有話題，不過今次可能唔係爆升，而係大跌，相信唔少人又會被影響到其情緒啦！

聽天由命

今日將屈o係心入面好耐既說話講左出黎，到底對事情發展係好定壞都係未知之數，只能夠由天來決定。

心癮

經歷左o尋日咁火熱既一日，今朝恆指一開市已經升過千點，高峰期升成千六點，收市雖然回返唔少，不過都重有成7百幾點升幅。

尋日都講過自己係以長線投資為主，不過亦會留意股價，睇下會唔會有加快回報進程既機會。之但係，所謂留意股價，其實不外乎每日跟進下股價既變動，正常以自己既持股，每日上落應該有限，都唔需要成日望個價。不過睇到呢兩日恆指既火熱，自己都心癢難耐，偶爾都忍唔住開個網黎睇下自己既持股有冇驚人既爆升，結果係同平時差唔太多。

自問都買左好多年股票，對股價都算睇得頗開，亦都唔會常追看股價，不過呢兩日都忍唔住，有少少沉醉左落個股票市場既氣氛入面。o係呢個氣氛入面，真係好容易令人樂而忘返，未經歷過大跌市既人，更容易沉溺落去，因為o係佢地心目中贏錢可能易過買菜。所以我都要多d提醒自己, 唔好俾現有既氣氛沖昏頭腦，按返自己所計劃去行事。

群股亂舞

今朝一起身，其中一個同事whatsapp群組已經有幾十條messages，原來係其中幾個有玩股票既同事講賺左幾多，之後上網睇，恆指已經升超過五百幾點，隻隻股都綠色咁濟，升唔夠10%以上都嫌少既情況下，唔怪得o固幾個同事咁興奮啦！

恆指越升越有，收市升成九百幾點，成交破紀錄成2500幾億，真係so crazy。可惜小弟既組合就唔多爭氣，最叻o固隻先升7%左右，之後有隻升1.8%，而最大份o固隻升得1.2%左右，重有隻要跌1%添。o係今日咁火熱既情況，自己都不時忍唔住開黎睇下個股價。雖然自己係以長期投資為主，但都未做到完全唔理會股價既變動，今日睇到求祈一隻股票都升十幾%，個心都有d不是味兒。

可能有人會話長線投資唔需要太過在意股價既變動，我又唔多認同。因為股價既變動可能會帶黎更佳既回報，例如一隻股票原本有五厘既回報，之後升左五成，如果可以o係市場搵返同樣五厘回報既股票，透過換馬就會將回報加速至7厘半。所以個人認為係需要留意股價，不過千祈唔好太過沉醉賬面既變動。

復活節台北遊 (上篇)

今個復活節，同屋企人去左台北行下。今次既旅程，係我同老婆一齊之後第一次分開去旅行，我陪我屋企人去台北，佢陪佢家人去澳洲，因為我屋企人唔鍾意去太長既旅程，咁既安排，陪到雙方家人之餘，又唔使陪完一家又一家，咁樣下次既行程就可以係我自己既旅程。

今次去台北，只係去左短短四日，真係短左d，不過我老豆適應能力好低，平時已經瞓得唔係幾好，一去旅行生保床就瞓唔著，所以都唔去得耐。

住宿:
由於復活節假，酒店都唔平，我地一行四人要租兩間房，於是上網搵下民宿，結果搵到間o係忠孝敦化站隔離既民宿，兩房一廳兩廁所，方便之餘地方又闊落d，價錢比租cheap既酒店平接近兩成。由於飛機延誤，本來plan左一到步就先去民宿再去食到飽，點知遲左到鬼咁肚餓，所以落機之後就直接去食野，直到中段既時候check email發現民宿主人email過我，打返俾佢原來佢已在附近等我一段時間，由於我未住過，以為好似酒店咁隨時可以check in， 只要到民宿前一陣通知佢就ok，完全無諗過人家會等既問題，不過食到中段無理由就咁走，只能夠約定佢晏少少。到步主人都無黑面，依然笑容可掬，我就係咁講唔好意思，有過今次經驗，下次唔會之後我唔會咁架啦！民宿地點方便，環境唔錯，夠整潔，兩老覺得比住酒店更好，讚口不絕。

食:
今個行程最貴係食左餐自助餐，下午茶時段港幣兩舊水一個人唔使，食物種類唔少，不過水準一般，但以咁既價錢算唔錯。亦都食左次食到飽既火鍋，一人百四蚊有找，都係下午茶時段，食材有水準，特別係肉類，絕對超值。有日早餐去食左all day breakfast, 亦有試過幾間小店，都算唔錯。最失望既反而係有少少名氣既食店高記，食物大多在水準以下。

現有資產分佈

現有資產既分佈，大約9成股票1成現金，負債佔總資產約33%。

股票方面有四隻，分別:
1)    935 龍翔集團，佔近7成。
2-4) 2788 精熙國際
        610 偉氏控股
        281 川河集團 ，各佔10%左右。

成績月小回顧

今年既三月，都算係豐收既月份，差二/三千蚊就有六位數字，已經比上年全年既收入88k多，四隻持股入面，有三隻重會有中期股息，順利既話，應該可以做到每個月五位數字既收入，不過如果扣埋供款都重係負現金流，預計下年第一季有兩筆供款完結時現金流都重負緊三/四千蚊。

三十三歲生日

早幾日過左自己三十三歲生日，由於之前出左份唔鈤既成績，當然要賀一賀去。

之前已經想去試試1881入面間酒樓隆濤院，見食評介紹點心相當唔錯，特別想食佢個香檳蝦餃，就趁生日去試一試佢。午市有做任食套餐，閒日$209一個，本來原價都會去食，點知早排上網睇到visa infinite張卡有 buy one get one 優惠，百一蚊一位，平時去間好少少既酒樓都差唔多，真係抵到爛。

之後老婆就安排左上山頂去蠟像館既節目，生日o固個唔使錢之餘，同行既亦半價，結果百廿蚊鬆d兩個人就入到去參觀，慳返三百幾蚊。入面d展品真係幾似真人，未去過都值得去參觀下。

夜晚就同老婆既屋企人食飯，因為佢姨丈六十大壽。今年生日咁就過左，能夠用個相對較抵既消費去慶祝，真係不奕樂乎。

對我地長線投資者黎講，適當既享受，係能夠提高對財務進程既追求，苦行憎既生活只會令人堅持唔到落去。而能夠以相對便宜既消費去達致同等既享受，可以o係享受之餘亦可加快丁點財務既進程。

第四張成績表

今日小弟牛一，生日前公佈埋最後一張成績表，成績遠超預期，算係收到份唔錯既生日禮物。

之前公司已經預期今年盈利會有增長，所以預期末期股息應該有一定保障，不過上年末期股息有部份係特別息，所以自己都有少少保留，驚呢部份今年唔一定有，個人希望最起碼維持現狀，可以既話，最好有5-10%增長。點知業績出黎，盈利比上年多98%，末期股息+特別息重比上年既多40%，共帶黎萬一蚊既進賬，比預期既多二千幾三千蚊。以買入價計，單係今轉已經有7厘9息，相當唔錯。

咁多張成績表入面，呢張都算係超額完成，等我可以過個開心既生日。

第三張成績表

o尋日出左第三張成績表，呢張成績表係咁多張入面最重要既，因為持股佔整體資產一個頗大既比例。結果出黎既成績令人有少少失望，純利減少22%，派息維持上年既水平，共收六萬四千幾蚊，本來預期派息會有輕微增長，可惜只係原地踏步。以買入價單計末期股息率為四厘三左右，叫不過不失。

賣關子

今個月會有四張成績表公佈，已經出左兩張，聽日會再出多張。o係之前兩篇關於之前既成績表既文章，都無透露到買左d咩，唔係驚俾人知，只係賣個關子，呃下留言，之後又可以借機出多篇文章，唔使搵題材。等埋黎緊兩份成績表，就出編文章交帶下自己既資產分佈，到時大家不紡提點下。

第二張成績表

早兩日出左第二張成績表，比上年賺少左三成，每股基本盈利接近七仙四，不過派息照舊，同上年一樣兩仙，雖然未得閒睇業績內容，但表面都睇都重可以，以買入價計有五厘四，帶黎萬二蚊既進帳，遲下得閒再睇返業績既內容了解多d。

預祝結婚兩週年 — 廣州兩天遊

正式既兩週年應該係17號，不過因為正日係閒日，所以提早週末去慶祝。由於我地兩個復活節都各自同屋企人去旅行，想去轉耐d既都唔易攞假，唯有去轉短既。澳門又去過幾次，諗起廣州唔算遠又未去過，不如走返轉。

上網怉左輪blog，睇到間酒店既SPA好似唔錯，既然去唔到遠，去轉短既都可以豪少少嘆下佢。本來想搭直通火車，又俾我上網睇到屋企附近有直通巴去到酒店隔離，方便過搭火車之餘重要平三分之二添。由於本身都無咩planning，本來只係諗住上網跟住人地個blog周圍去，點知上到去用朋友借既卡，唔知因為網速太慢還是祖國block左d網站，結果好多網都load唔到，整個行程只能夠盲中中咁去左兩個熱門步行街，分別係上下九路步行街同北京路步行街，行下食下嘆返個SPA。如果鍾意影相既話，廣州有唔少老建築，都幾有味道。

成個行程酒店+車費千二蚊左右，食野食地度野多，應該唔使五舊水，最貴就係酒店個SPA，兩個人差唔多三千蚊，不過以酒店級數其實真係唔貴，難得之前出左第一張成績表，使一半多d就已經夠去玩。既然今年唔去得邊，就將今年黎緊既成績儲起佢，等下年去轉豪d既先。

出成績月

今個月會有四份成績表出爐，o尋日出左第一份成績表，比預期中好，本來見佢中期股息派少左，比上年少左三成，所以預期佢全年業績都冇上年咁好，年終既股息會比上年少，但喜出望外，全年業績反而唔錯，單計末期股息，竟然比上年多三成，拉返暈全年既股息重要比上年有增長，不過我係中期股息派發之後先入。

計返買入價，單計末期股息已經有五厘九，接近六厘既回報，帶黎九千蚊既收入。期待黎緊三份成績表都keep住有好表現。

車仔出局了

早排先嘔心瀝血咁分析左邊隊最大機會拎歐聯冠軍，重點球隊車仔再搭次選拜仁，點知今朝一起身，睇到車仔比巴黎迫和2:2慘被淘汰，就係咁我就做左一千蚊善事俾馬會，以幫助有需要既人。

睇返精華，場波都幾精彩，互有攻守，講真，形勢理應對車仔有利，對家大將呂布早被趕出場，人多蝦人少對實力相當既賽事有著重大既影響，可惜尾段俾自己前隊員頭鎚破網，加時入左球十二碼最尾都守唔住，只能夠講巴黎意志力太強，任憑我所謂既分析，都係人算不如天算，巴黎竟然o係缺少大將之下強韌至此，抵佢贏波。

慶幸拜仁大炒對手進級，希望拜仁能夠過關斬將奪冠，到時收返成本之餘都有幾舊飲餐茶。

物極必反，盛極而衰，香港經濟玩x完

2003 年 香港既經濟因為SARs去到谷底，之後靠自由行既帶動，香港既經濟復甦得好快，近年更將香港既經濟推至高峰。不過，隨住過多既自由行，漸漸就引起唔少既社會問題，好似天價租金扼殺小店既生存空間、水貨客、中港矛盾等，市民逐漸感覺自由行帶黎既反效果比效益大，民怨日深但政府只盲目追求更多既自由行，直至有市民出黎遊行示威，政府先後知後覺，開始檢討相關政策，但香港既經濟對自由行已經在相當既依賴，政府都唔可以一下子做咩大動作，否則可能對經濟造成相當大既打擊。而別在用心既人，利用市民對自由行以及政府既不滿，激化最近既反水貨示威活動，包圍辱駡疑似大陸人、查閱佢地既既行李、踢人地既喼或者物品、衝出馬路阻礙巴士行駛等，藉此換取政治籌碼。

坦白講，我都覺得過度既自由行影響到香港人既生活，但就算爭取認為對既事，都唔代表可以做d咁唔文明既行為，我相信大部份香港人都唔會認同最近既野蠻舉動。然而，小數人既粗暴行為，卻要全香港一齊去承受，現今既社會，好野無咩人傳，但衰野傳千里，重要以光速咁快咁傳出去，最近借反水客實質針對大陸人既示威，應該好快傳到各省各地，呢o的消息應該會令好多大陸人對香港有個壞印象，覺得香港人不可一世，自以為比大陸人高一等，從而影響到佢地訪港既興趣，而且依家世界各地都向佢地招手想賺人仔，各地貨幣又貶值唔少，同以前比變相去其他地方又抵玩o的，種種原因都令大陸遊客流失加劇。

可能唔少人會話，如果針對大陸人既野蠻行為能夠令到佢地唔黎，對香港係好事。當然，有序咁控制返自由行既人數，對香港旅遊業發展絕對係好事，始終依家香港既配套及接待能力已經飽和有突，勉強加大自由行或者維持落去只會為社會帶黎更多反效果。但如果因為負面形象令大陸人選擇去其他地方，對香港既旅遊業打擊好大，試想當年菲律賓既人質事件，令到幾多香港人唔再去，以自己為例，對菲律賓既負面印象一直存在至今，咁多年都無考慮去當地旅遊。

另外，有人會話旅遊業佔香港既GDP既比例好細，影響有限。講得出咁既說話，都唔知話佢天真定白痴好，佢地梗係以為旅遊業無運行，最多只係影響到酒店、零售、飲食業咁，而且少左旅客鋪租又會平返，無咩唔好，然而佢地淨係睇到直接受影響既行業，而睇唔到背後各行各業既千絲萬縷。最簡單既例子旅遊業不景氣直接影響零售業，而零售業不景氣影響物流運輸行業，零售及物流運輸從業員減薪或者俾人炒魷魚，少左人去消費又影響返零售業，造成惡性循環。呢個比如，同現實既覆雜情況真係完全無得比，如果旅遊業只係慢速調整，都重可以慢慢適應同埋有時間發展其他行業從而減少打擊，但如果係一個較劇烈既衰退，恐怕唔只旅遊業及其相關行業有大影響，整個香港經濟都會受到嚴重既打擊。個人真係希望香港現時既政治形勢，唔好令到經濟陷入一個返唔到轉頭既境地。

高風險投資—買歐聯冠軍

今日做左樣好耐無做既野，就係去左買波。平時自己都有留意下足球資訊，亦都有睇賽事精華，有大賽偶爾都會睇下直播咁，不過對上一次買波，已經係幾年前既事，o固時一齊做野比較熟既同事都有睇下波買下波咁，自己於是又細細地玩下，大家支持同一隊既時候可以一齊嗌下，唔同隊時又可以打個牙較戰，都係一個建立良好關係既好方法。不過自從調走左，大家各散東西之後，都無再玩過lu。

尋日睇足球消息既時候，睇到車仔贏左聯賽杯既時候，領隊摩連奴高興到瞓o係地手舞足蹈咁慶祝，又重拾多左對足球既熱誠，於是留意下有冇波仔買下，不同於以前買波，今次希望以一個多少少既投資心態去買，所以就試下做少少分析。

當然每個買波既人，都會做唔少自己認為既分析，所以我都唔否認今次既投資有賭既成分。而經過自己既分析，決定落注買一千蚊車仔歐聯冠軍，賠率8倍，同埋五百蚊拜仁，3.75倍，到底點解咁決定?

首先有買開波既，都知道波係人踢既，有人既地方自然會有做假既時候，講得今次買波，係以投資心態所做，平時買股都盡量避開唔精神既股票，所以今次買波，都希望揀較少機會做假既。歐聯冠軍為球隊帶黎既既收益係天文數字，而依家進入到十六強既階段，賽制係淘汰制，一場既失利，將會影響奪冠既機會，平常既聯賽一場失利對冠軍既影響相對細好多，o係歐聯冠軍背後既龐大收益之下，做假既機會相對細好多。

既然買歐聯冠軍，就分析下邊隊奪冠機會最高。入到歐聯十六強，每隊都有一定實力，不過就好似以前讀書既中學咁，雖然大家都係band 1學校，都有band 1頭 band 1尾既分別，先剔除band 1尾既球隊先, 剩返較強既皇馬、巴塞、曼城、祖記、拜仁、車仔、巴黎聖日耳門。

十六強賽入面，曼城既形勢最壞，主場輸俾巴塞1:2，進級形勢唔樂觀。車仔同巴黎首回合賽和1:1，下場車仔主場叫有個作客入球有少少著數。
其餘幾隊首回合都贏波，晉級形勢更佳。
聯賽形勢對歐聯賽事都有一定影響。巴塞同皇馬係西甲分差唔大，兩隊都重有機會爭冠軍，依家都重爭崩頭。巴黎同第一位都只係差一分，都重有機會，呢幾隊黎緊聯賽場場都唔可以大意，硬仗連場可能會分心歐聯。而祖記、拜仁、車仔o係聯賽已經帶左出黎，相對比較從容。
正如我所講，剔除左band 1尾既球隊，剩返既隊隊人腳實力都差唔多，不過領隊既功力可以令到球隊再上一個層次。而咁多隊入面，拜仁既哥帥同車仔既摩帥功力明顯技高一籌。

綜合以上既原因，拜仁同車仔最大機會。然而，揀個人認為車仔比拜仁更有機會奪冠，原因係見到摩帥o係贏到聯賽杯既高興表現，就連佢賽後指自己像一名孩子好重要，而且佢當日既感覺就好似首次領軍一樣，足見佢對勝利既熱誠。而且另一段短片映到車仔球員o係頒獎台上面，球員遂一捧杯，當傳到兩個無咩表現既年青球員時，可能佢地見摩帥就o係後面，想就直接傳隻杯俾摩帥，但俾摩帥拒絕，要佢地先嘗捧杯既滋味。呢件事俾到我既感覺係o係摩帥旗下，球員會更加甘心為佢賣命。當然，可能其他領隊都有做到只係我唔知姐。所以決定投注一千蚊落車仔度，五舊水落拜仁。

雖然加左唔少所謂既分析，將今次既買波包裝成高風險既投資，但實際都知道自己係賭波，所以只係投注一千五蚊咁大把，試下自己既眼光就算啦！

男性看女性

一直以黎，呢個blog都只係隨心咁寫下個人既理財鎖碎事，不過今日突然心血來潮，想講講兩性關係，既然係自己既blog，鍾意寫咩就寫咩，唔使俾之前set落既框框所束縛住。

不過事先聲明，以下所寫既對女性可能有所冒犯，如果接受唔到，就唔好睇落去，亦都先講聲唔好意思。

唔知點解，無啦啦想講男性對女性既睇法，o係我心目中，男人睇女人，會歸納為兩類，第一類係可食用，第二類係不可食用。可唔可以食用，其實就係男人有機會既時候會唔會同呢個女人上床既意思，而呢個就好睇個人既要求，有d人要國色天香先認為食得，有d可能但求就手，而事實上有唔少人係認為有食唔食罪大惡極。當男人將女人歸納為不可食用既時候，大部份人真係睬妳都有味，不過都有少部份有gentlemen風度既會照做朋友既。

就算男人歸納左個女仔係可食用，都唔等於佢地會出手，因為佢地都會衝量食到既機會，而好多所謂既契哥契妹就係男人想食但食唔到所產生出黎，因為佢地知道食到既機會好細(或者出過手不過失敗)，但又想有機會去食，契契下希望提高成功率。

而可食用中，除左契外，大部份都會變成左朋友，好大程度係因為男人想食佢地既慾望有限，所以男人唔會出手，慢慢大家變成朋友。最後剩返少數既就係男人對佢好有感覺，好想食因而出手，成功既就可能成為情侶夫妻或者情婦什至×完鬆，唔成功既可能返轉頭做返契兄妹好朋友咁。

所以當男人做妳身邊既好朋友既時候，千祈咪咁天真當真呀！

政府又加辣

700萬以下物業劃一降至六成 金管局「辣」緊按揭 撲熄細價樓熱火

https://hk.mobi.yahoo.com/story/?key=hk:data:story:163fd0ac-2612-3008-8d52-bba1d152930f&site=news&ctg=featured

細價樓升整都有，政府又再出招，收緊按揭成數。之後就有唔少朋友o係fb上面留言，都係話買樓越黎越難，政府出招令到上車族更加買唔起樓，令到租金上升，樓價更加唔跌反升。

網上睇好樓市既blogger亦認為樓價係合理反映左QE的水份，而政府出招對於首次上車的人無乜大影響，因為9成係仲有的，只係會將marginal的買家推去買唔到。之但係本身係諗住買多層收租的，一般都可能預左攞一百幾十萬黎上會，而呢一批人就可能唔夠能買600-700萬的樓，而家一撳落黎唔係話買500-600，因為攞走你多一成資金同埋壓低10%收入供款，好大機會就會由600-700萬隊落去300-450萬呢一類別的樓。將所有資金推向超級細的上車盤，預期300-450萬呢堆樓將會極度受惠。(節錄自求生隊長blog)

對於樓市，唔同人有唔同既睇法，支持既自有一堆理據，反之亦然。到底誰對誰錯，時間自會証明。支持既人會話全世界都QE水浸，資產只會升唔跌，咁石油又點解咁既價錢? 石油同樓兩樣野都唔同，竟然係咁，點解日本樓升極都升唔起? 世界咁大，係咪得樓先有投資價值? 就算當係，係咪得香港既樓先有? 反對既就會話美國黎緊加息，咁但係講加息都講左唔知幾耐，到底幾時先加? 供應黎緊增加唔少，咁點樣通過地區既阻力去改變土地用途?

自己對樓市完全唔熟悉，自己絕無資格去質疑他人既理據，只不過無論支持或者反對既理據，其實係咪真係咁有理? 而就算真係有理，市場係咪真係咁理解? 

但我認為最重要既理據，唔係咩QE咩供應，而係政府越黎越多辣招，政府既行動永遠都係滯後唔少，原因就係政府永遠都係跟據所得既數據之後先再擬訂政策，到政策出台已經唔知係幾耐之後，政府越多動作，就越接近終結既時候。

新春小禮物

今日收到銀行寄黎既信，一拆開原來係兩張五十蚊既惠康coupons，原來係我之前申請既套現計劃所送既，之前個姐姐都無話我知。雖然只係駒駒一百蚊既coupons，不過計返我個套現計劃，借四年總利息支出要$5680，呢一百蚊現金卷，就等於總利息支出又慳返1.7%左右。雖然只係雞毛蒜皮小數目，不過無啦啦又可以慳dd，又真係感覺唔錯wow。

羊年快樂!!!

中國人都係舊曆年先係真正既過年，在此祝咁多身體健康，財源滾滾。不過咁，自己就麻麻地鍾意過年，因為呢d日子超多野做，忙到甩碌。如果唔係，過年都叫算係我最鍾意既日子之一。

之前佔中賣股既資金，舊曆年之前已經投入返晒市場有突，剩返借返黎既資金都蠢蠢欲動，寄望三月業績前有機會再入。

過年見到表妹，聽佢講之前買落既樓花，有人願意出多五十個同佢買，不過佢諗住第時自住唔賣，最近又加多廿幾個，只能夠嘆句so crazy。有時都唔怪得d人點解係咁仆入樓市，計埋做按揭既高杆桿，升時既回報真係好和味。而且睇住樓價係咁升，普通打工仔睇住樓價升幅遠超自己人工既加幅，真係有好難按捺得住入市既衝動。

最後希望羊年個人既長線投資能夠生生性性，好好反映長線投資既威力。

依家買樓既迷思

最近有新樓盤推出，又或者之前居屋交申請表，總係大排長龍，人山人海。o係我眼中，依家既樓價真係貴得誇張，完全唔值，不過o係大前提下係有自住實際需要同埋經濟能力，我都唔反對人地依家上樓，始終無人可以準確預知樓市既動向。以自己為例，我大幾兩年前結婚，有自住需要，經濟方面亦負擔得起，當時樓價雖然都唔平，但買既話都未嘗不可，不過因為老婆屋企有個單位平租，而當時預計應該兩年左右可以輪候到宿舍，所以先決定唔買，不過依家輪極都未到，眼見可能要再等多一兩年，又要俾多兩年租，都有dd咁多後悔當時無買到。因為自己既經歷，對於自用又有經濟能力者，更加唔敢話現時買樓係對定錯。

但如果達唔到是但一個條件，我對依家仆到入市，係有所保留。我見依家唔少人，都未必真係有自住既需要，好似岩岩畢業無耐既大學生咁，佢地係咪真係有即時需要買樓自住? 可能有d人話準備結婚有自住需要，但連首期都俾唔起，要屋企人幫手，咁係咪真係需要依家結婚買樓?

唔少人會反駁，依家唔買第時更加難買，但我都講過，無人可以準確咁睇通樓市。其實睇返歷史，97之後每隔幾年都有機會上樓，03年梗係最佳時候，09年個時機亦都唔差，之後幾時再有機會，真係無人知，不過o係力有不逮既時候仆到入去，話唔定真係會仆親，有能力者，當然可以起返身，閉在依家都要人扶既，可能真係跌到頭破血流都唔定。話唔埋依家儲埋d戰鬥力，機會一到重有威力啦！

個人感覺

到底經歷過多少次失望?

之前竟然重抱有些少期望，但依家都唔太差，起碼個人開竅，以後無期望，就唔會再失望。

喔！射左啦！

話說上星期三下晝去銀行填表攪射倉既動作，之後夜晚返屋企上一通個網click幾個制，尋日d股票已經到左大新個戶口，有左呢批股票打底，就算將手頭上資金調去一通都超過到戶口資產既最低要求。
有時話平野無好，又唔一定既，好似一通咁，雖然平，但唔嫌棄樣樣野要自助既話，普普通通咁做下買賣，其實又唔係太差姐，好似咁似射倉咁，都係兩日度就射左，都算幾快，不過男人就d避忌太快既。

第一次去一通酒會

一通今晚o係港麗酒店攪左個慶祝晉升B組既酒會，第一次獲邀出席。之前都無去過呢d場合，就當去見識下。

7點左右去到會場，係一個唔大既宴會聽，席間大多數都係有返咁上下年紀既人士，目測四十樓上，少量我呢一輩三字頭既，二字頭係稀有動物。到咁上下時間，一通既boss級人物上枱講左陣野，同大家祝酒，之後就係自由時間，有小點果汁酒精飲品等提供，數量都算充裕，參與者亦相當斯文，無搶食情況發生。席間上左年紀o固一輩，唔少都幾個幾個一黨，應該彼此最少有數面之緣，二/三字頭既，通常好似我咁，on居居咁食下野飲下野咁，而一通既職員就四處寒暄，不過都係以上左年紀既來賓為先。到咁上下，可能d職員真係見我太on居，而且部份人離開左，一個應該有咁上下職位既男職員，帶埋兩個cs妹妹仔過黎同我吹水，反正我都係吹得之人，難得有後生女傾下計，我亦來者不拒啦！傾到咁上下，個男職員係咁縱容我同d妹妹仔交換電話，費事掃佢興，我都厚顏無恥咁攞左佢地電話，有冇聯絡就後話啦！估唔到吹吹下都吹到尾聲。

今次出席，講真對投資得著有限，不過又唔係完全係得著。首先知道一通比想像中穩陣，原來晉身到B組證券行，係排名十五至六十五位(好似)既證券行，咁証明一通規模都唔算細，而且知道佢上年年尾排四十左右，又係一間無負債既公司，睇黎遲下就算擺多少少股票o係一通都會放心d。其次叫做有得飲下食下。最後就係有得同後生女傾下計，重可以抄到兩個牌添，算係咁啦。唯一可惜既係70後兄無出席，如果唔係可以同佢打聲招呼。

射倉，一通去大新

以前一直都貪方便，用開大新個理財戶口買賣股票，不過自從睇到70後兄既blog，先留意到證券行既洗費其實可以平好多，之後就o係一通開左個戶口，用呢個戶口做買賣。而大新個理財戶口就荒廢左好耐，只係將借返黎既資金擺o係入面當做儲備，因為個大新戶口係VIP account，要有一定資產擺o係度責下袋先達到minium requiement。

由於之前增持左幾次股票，手頭上已經得返少量資金，如果之後想再入貨，將要用到儲備既資金，而為左慳返d佣金，都係將d資金調返去一通個戶口，用一通買抵d。不過調走左d資金之後，戶口既資產又唔夠最抵要求，所以尋日就做左射倉呢個動作，將3/4股票轉返去大新既戶口，之後就可以調返d資金去一通，咁做之後買股d佣金又慳返d，而大新個戶口又keep到有一定資產水平，而且心理上硬係好似銀行比証卷行安全d，所以將咁上下股票擺返去銀行，感覺好似比放晒o係証卷行良好dd。最後，大新依家做緊推廣，六月前存入市值五十萬股票有五舊水，一百萬以上有一千，三百萬以上就三千，咁又多少少著數。

負債累累(ii)

上回講到又問銀行借多筆錢，計埋新借呢筆，依家手頭上既總欠款，大約係兩年兩個月既人工，而月供款佔我既人工2/3左右，計埋每個月既開支同俾老婆既家用，其實份糧係唔夠使，入不敷支。就咁睇，似乎真係唔多掂，如果係做按揭買樓既話，直頭過唔到壓力測試添。不過我既財政狀況係咪真係表面咁壞?? 咁我又唔覺得wow。

雖然份人工唔夠洗，不過如果計埋股息收入，又唔係咁講。如果以依家手頭上持有既股票，再以一個好保守既預估，只要將一半多dd既股息撥入日常支出就已經夠洗有突。而且，依家只係用左20%多d既借貸資金，剩餘既資金適時會再投入，到時保守預期只要將四成股息撥入日常支出就已經夠用。所以就算股息收益連咁保守既預估都達唔到，只要減派幅度唔多過一半，入息加股息都都唔會變成負數。

之但係，就算係保守既估算都好，都有機會有更差既情況發生，自己亦都有預期過更壞既情況發生，就係持有既股票唔派息。到時無左股息既補貼，就真係每個月都係唔夠錢洗，較好既情況係剩餘既資金無投入市場，咁都係慢慢還返俾銀行，當蝕息。面最壞既情況係所有資金已經買晒股票但又一毫子息都無得收，個個月負數，不過就算遇到呢個情況，都會捱得過。首先，依家俾老婆既家用，其實同預期股息補貼開支既金額相若，話就話係家用，但事實屋企大部份開支好似租水電媒係我俾，另外行街食飯多數都係我出，老婆偶爾先俾返一次半次，所以係似零用多過家用，到時情況真係咁惡劣既話唯有老婆幫幫手，唯有將俾佢既零用幫補下。其次住緊既地方係老婆屋企人，租金平過出面，亦唔擔心會大幅加租，所以支出方面應該都可以係控制之內。而o係艱難既情況，最重要係確保收入，呢方面更加唔係問題，我份工唔會大富大貴，飛黃騰達，但相對穩定非常，唔出大錯應該一直有得撈，亦絕對唔會好似亞視咁拖糧，收入相當平穩。
而呢個完全無息收既情況，我認為出現既機會真係好微。

可能有人會覺得無咁大個頭唔好戴咁大頂帽，無咁高人工唔好借咁多錢，不過衡量過承擔得到，我又唔認為負擔真係好似表面咁大。不過唔同人唔同背景，借之前自己真係要諗清諗楚，千祈咪人借幾多你又跟住借幾多。

負債累累(i)

唔覺唔覺，原來呢篇係第一百篇文章，估唔到自己有恆心寫落去，完全成為自己其中一個興趣。不過第一百編文章講負債，好似唔係咁老黎咁，如果俾着以前既我，可能真係會咁諗，好人好姐攪到要借錢，幾咁折墜。不過，依家既我唔認為負債一定係壞事，如果運用得恰當既話，負債係可以提升你財務進展既工具。

今個月終於加左人工，前日即刻print埋張糧單，實行加大信用卡個額再借既計劃。 早兩個月用月平息0.12%借左6萬，見幾抵想再借多d，可惜個姐姐話個額用晒，印象中我俾銀行既糧單應該係有一段時間之前，我於是問個姐姐如果俾返新既人工，個額有冇得加大返? 佢答要等銀行批，不過應該無問題，所以等今個月出埋新人工，前日就打俾上次幫我o固位小姐，email埋份糧單等佢幫我攪。o尋日就覆我無問題，可以借多9萬8，佢話銀行方面做緊月平息0.19%，我即刻話諗諗先，跟住佢再問我幾多先會考慮，我又無獅子開大口，我話做返上次咁就會做，跟住佢計左陣，話應該無問題，本來想做60期，可惜佢話最長得48期，就咁決定啦！由於月供銀行收整數，所以計返實際年利率係2.9x，不過免抵押做到3厘樓下其實都算幾抵下。而且錢今日就到手，第一期月結單就3月中先找數，變相又用多半個月。

不過借左錢，就唔係好似依家d借錢廣告，講到好似唔洗還咁，下一篇文章就講下負債下每月既還款情況。

續約用緊既月費計劃

話咁快又到約滿既時候，唔經唔覺都用左呢個台成兩年咁耐，點解用佢? 無他既，貪平lor。依家用開個plan，72蚊任砌，不過一分錢一分貨，咁平俾你任用，梗係唔會係4豬啦，係慢到死既3豬，姐係想睇片要load好很耐都只係睇到少少o固種。不過對我黎講，又真係無咩所謂，我用電話除左打出打入，最大用途就係睇blog，其次就玩games，不過我玩開既只要上到網就ok，都唔使上網速度好快既。有時會睇下漫畫睇下戲咁，不過又會o係屋企download定。我又呢會好似人地咁在線追劇又或者踢波，所以速度其次，價錢行先。不過今次約滿，月費加到96蚊，其實本來上年都加到80蚊架啦，不過因為我續約所以先維持72蚊原價，今次感覺貴左咁多，本來都有心動upgrade 4豬plan，成兩舊幾一個月，不過轉plan可以優惠價換部電話，部機又真係平過市價唔少，自己部電話都用左兩年有多，真係有d心郁郁。不過最尾諗清諗楚，都係決定唔換機，我依家用緊部機，雖然係兩年前既產物，但當時算係部性價比相當高既機，4核2Gb ram 1300萬象相機等，到依家都重function得唔錯，而且好似之前所講，自己亦用唔著太高階既機能，既然無需要，就無謂亂洗錢換機。無左換機既衝動，就周圍睇下邊間d plan抵用，結果就係雖然加左價去到96蚊，呢個plan都係相當抵既，就再續一年。

好多年輕人都話d錢唔知洗左去邊，其實係洗埋o係d無謂既地方，好似我咁，如果轉左4豬plan，每個月俾多舊半之餘，又洗多幾千換部電話，有時唔好話人地點解可以儲到錢，檢討一下自己洗錢洗左去邊重好啦！

襟錯制

最近個股票事場，指數就上上落落，都有咁上下既波幅，但係我d股票就唔係幾關事，不過都無所謂既，反正諗住長線持用，除非有換馬機會或者前景唔對路，否則都唔會賣住。

而之前睇中隻心水股，亦都無跟恆指波幅咁大，只係o係8豪半子到8豪9子左右走黎走去，呢d價錢其實自己都覺得入得過，既然觀察左一段時間，都等唔到再低既價位，見今日股價8豪7子，自己衡量過入得過，就扑鎚買入。即刻上一通網做野，一襟制即刻有通知話已經成交左，咪check下個交易紀錄，發現買入價係8豪8子，原來自己手快快襟錯左，雖然長線o固一仙影響唔大，但明明可以8豪7入到，無啦啦俾多成千銀先入返同樣既數，個心都係有dd不爽。

下次都係睇清睇楚先襟制，唔好洗埋d無謂錢，始終小數怕長計。

一個人的下午

由於份工係需要返shift, 所以好多時放假，老婆都要返工，不過又真係無咩所謂，我都不知幾enjoy一個人既時間，能夠o係假期悠悠閒閒咁過，好好咁叉下電，真係寫意到不得了，而且我份人好簡單，一個人既時候都唔使點洗錢，反而重儲到多個錢。

好似早兩日放咁，我瞓到十點幾十一點自然醒，之後就落樓下買麵包，返屋企沖返杯熱奶茶做早餐，
之後就上網睇下野睇下漫畫睇下波，又去d blog友度睇下新文章，睇下點樣增進理財知識，咁上下就打陣手機games，又或者玩陣xbox, 有時又會睇下心水股票既年報，雖然好多內容都未必識睇，但都希望了解多少少，又可能上網search下有冇持股同心水股既資訊或者其他人既評價，咁上下時間肚餓，見耐無食燒味飯就買盒叉雞飯食下。飯後抖陣就掃下地拖地做家務。咁上下就去跑過步，做下運動。之後就去街市買少少o野煮個蕃茄煮仔湯加個烏冬，再淥條菜，簡單健康又一餐。夜晚就睇下電視，睇星星的你睇下千頌伊, 幾咁梳乎。

成日都用左唔洗一百蚊，雖然係洗得少，但係又唔等於唔足夠，事實上能夠享受呢種咁簡單既生活，我已經心滿意足！！

二百五蚊的教訓

今日收到銀行寄黎既信，原本以前係普通月結單，點知一睇，原來係有一條o係另一間銀行做既分期貸款既數因為户口唔夠錢自動轉賬唔到，銀行於是扣左我百五蚊手續費，呢個都唔緊要，最怕係過唔到數，銀行除左手續費之外，又唔知重有咩費用要俾，於是即刻搵返借貸銀行既電話，打去同銀行方面講返，佢問我依家户口有冇錢，有既就即刻幫我過返數只係扣返一百蚊手續費就無其他要俾。
本身自己有三個户口，一個係平時既出糧户口，基本上所有支出/卡數/分期貸款都o係呢個户口，一個係同銀行既綜合理財户口，以前用黎買股票既，最後一個就係一通，係依家用黎買賣股票。我差唔多所有既資產都o係晒個理財户口同一通個户口度，但係平時正常個出糧户口應該夠俾所有支出，點知年近歲晚，買左三斤花膠準備過年送俾我同老婆既至親，就因為呢筆額外支出，攪到差幾舊水先夠過數。
今次無啦啦俾多左兩舊半，好在無其他額外費用，算係不幸中之大幸，如果唔係慳埋既息口都無用。為左避免重蹈覆轍，之後都係過返少少錢去過出糧户口度，費事過年多左洗費唔夠錢扣就閉。

2015 展望

話晒又到新一年，都應該要展望一下既。

長線投資方面，今年既目標係120k-150k，預期要達致下限，應該都無問題，因為手頭上既股票，應該可以帶黎90k左右既股息，如果現時將手頭上剩餘既現金投入股票市場，以上年既派息計，已經超過下限，不過就會無晒現金，而且要達致上限，就要今年既派息比上年多先有機會成功。所以現有既計劃係分階段將餘下既現金分階段投入市場，務求o係股價較低既時候入到心水既股票，變相享受一個相對較高既股息率，從而更易達更目標既上限。而且分階段投入，亦都可以避免遇到大跌市無資金有得睇無得買既慘況。
如果情況許可，亦都可能套過換馬，賣出手持既股票換入其他心水股，以提高股息回報。

短線投資方面，盡量控制注碼，下注既目標亦都要自己有相當信心先去做。不過據往績，成績亦不寄厚望，務求以唔虧損為首要目標。

借貸方面，由於一月會加人工，稍後可能會聯絡銀行睇下可唔可以再借多d，希望可以以上年年尾既息率借到5-10萬，盡量分48期或以上還，以提高備用現金額。

希望今年既展望，o係年尾回顧既時候全部都可以達成。

2014年小回顧

唔經唔覺，話咁快就過左2014年。展望15年之前，先回顧一下14年既回顧。

今年投資回報都算唔錯，股息收益大約88k，相當好意頭，比上年多近7成。主要原因係慢慢累積左一定既資產以及之前加大左借貸加快左資產既累積。

長線投資操作方面，於9月賣走左持有多年既o固兩隻愛股，獲利共三十九萬左右，但因為唔同時間買入，回報率就好難計得清楚。之後陸陸續續投入返套現出黎既資金，用左大約8成半既套現資金買入另一隻股票。

短線投機方面，做過兩次投機買賣，一次係聽朋友既消息，一次係自己想炒業績，但都係損手收場，不過都係輕輕咁親下，唔係流好多血。

借貸方面，除左用比之前既平既息率續借左之前用開既貸款，亦都計返息咁朋友借左十萬蚊，年尾再同銀行以平息再借多6萬，總負債約六十萬左右。

最後係檢討時間，先係長線投資方面，之前因為個人睇法，認為佔中會帶黎震盪所以賣走持有多年既愛股，之後買返另一隻心水股，現時賬面已升左10%樓上，而且預期股息收益比繼續持有愛股更好，雖然錯有錯著，但當中既操作有唯本意，未來除非有換馬目標或者升至癲價，否則唔會胡亂減持。短線投機方面，會控制注碼小注投機測試個人眼光，但會避免聽消息去做買賣。借貸方面，之後唔會再問朋友借貸，唔係因為錢銀問題有爭吵，亦有信心唔會發生，只係銀行似乎俾到更好或者接近既offer。